ນະຄອນຫຼວງວຽງຈັນ, ສປປ ລາວ – ວັນທີ 25 ຕຸລາ 2024. ມື້ນີ້, ອົງການ ສະຫະປະຊາຊາດ ກອງທຶນສໍາລັບປະຊາກອນ (UNFPA) ໄດ້ມອບຊຸດເຄື່ອງໃຊ້ທີ່ຈໍາເປັນສໍາລັບແມ່ຍິງລວມມູນຄ່າ 20,200 ໂດລາ (466 ຊຸດ) ໃຫ້ແກ່ສະຫະພັນແມ່ຍິງລາວ (ສຍລ) ເພື່ອຊ່ວຍເຫຼືອປະຊາຊົນເຂດປະສົບໄພນໍ້າຖ້ວມ ຢູ່ແຂວງຫຼວງພຣະບາງ, ໄຊຍະບູລີ ແລະ ຫຼວງນ້ຳທາ. ວຽກງານນີ້ໄດ້ຮັບຜົນສໍາເລັດຍ້ອນການສະໜັບສະໜູນຂອງລັດຖະບານອົດສະຕາລີ.
ໃນປີນີ້, ໄພນໍ້າຖ້ວມໜັກໜ່ວງໄດ້ສົ່ງຜົນກະທົບຕໍ່ຫຼາຍແຂວງພາກເໜືອ, ລວມທັງແຂວງບໍ່ແກ້ວ, ຫຼວງນ້ຳທາ, ໄຊຍະບູລີ, ຫຼວງພຣະບາງ, ຫົວພັນ ແລະ ນະຄອນຫຼວງວຽງຈັນ. ເພື່ອຕອບໂຕ້ໄພພິບັດດັ່ງກ່າວ, ອົງການ UNFPA ຮ່ວມມືກັບກະຊວງສາທາລະນະສຸກ ເພື່ອແຈກຊຸດເຄື່ອງໃຊ້ທີ່ຈໍາເປັນສໍາລັບແມ່ຍິງຈໍານວນ 200 ຊຸດໃຫ້ແກ່ແມ່ຍິງ ແລະ ເດັກຍິງ ໃນເຂດທີ່ໄດ້ຮັບຜົນກະທົບ. ການມອບຮັບໃນມື້ນີ້ ໄດ້ເສີມຂະຫຍາຍຄວາມພະຍາຍາມທີ່ຜ່ານມາ ພ້ອມທັງເປັນການແກ້ໄຂຄວາມຕ້ອງການທີ່ເພີ່ມຂຶ້ນ ຂອງແມ່ຍິງ ແລະ ເດັກຍິງ.
ການປະເມີນພາກສະໜາມໄດ້ຖືກດໍາເນີນໂດຍທີມງານຕອບໂຕ້ໄພພິບັດແຫ່ງຊາດ - ເຊິ່ງປະກອບດ້ວຍບັນດາກະຊວງຂອງລັດຖະບານ, ອົງການຈັດຕັ້ງທີ່ບໍ່ຂຶ້ນກັບລັດ ແລະ ອົງການສະຫະປະຊາຊາດ - ໄດ້ລະບຸເຖິງຄວາມຕ້ອງການອັນຮີບດ່ວນ, ລວມທັງເຄື່ອງນຸ່ງ, ໄຟສາຍແບບພົກພາ, ເຄື່ອງໃຊ້ສໍາລັບສຸຂະອະນາໄມ, ຜ້າອະນາໄມ ແລະ ຂໍ້ມູນກ່ຽວກັບການບໍລິການຕ່າງໆ ເພື່ອຫຼຸດຜ່ອນຄວາມສ່ຽງຕໍ່ຄວາມຮຸນແຮງບົນພື້ນຖານທາງເພດ (GBV) .
ການມອບຮັບບັນດາລາຍການທີ່ຈຳເປັນດັ່ງກ່າວ ເປັນຂີດໝາຍສຳຄັນໃນການແກ້ໄຂການຕອບໂຕ້ ທັງໃນທັນທີ ແລະ ໃນໄລຍະຍາວ ສໍາລັບການໃຊ້ຄວາມຮຸນແຮງບົນພື້ນຖານທາງເພດໃນສະພາບການດ້ານມະນຸດສະທຳ. ໃນເວລາເກີດໄພນໍ້າຖ້ວມ ແລະ ເຫດການສຸກເສີນອື່ນໆ, ຊຸດເຄື່ອງໃຊ້ທີ່ຈໍາເປັນສໍາລັບແມ່ຍິງຂອງອົງການ UNFPA ແມ່ນສິ່ງຊ່ວຍຊີວິດທີ່ສຳຄັນ ສຳລັບແມ່ຍິງ ແລະ ເດັກຍິງ. ຊຸດເຄື່ອງໃຊ້ເຫຼົ່ານີ້ປະກອບມີສິ່ງຂອງທີ່ຈຳເປັນທີ່ມັກຈະຖືກເບິ່ງຂ້າມ ໃນຊ່ວງທີ່ຕ້ອງການຄວາມປອດໄພ, ອາຫານ ແລະ ນ້ຳ ຢ່າງຮີບດ່ວນ. ຊຸດເຄື່ອງໃຊ້ນີ້ ເປັນເຄື່ອງມືໜຶ່ງທີ່ຊ່ວຍສ້າງຄວາມເຂັ້ມແຂງໃຫ້ບຸກຄົນມີຄວາມຮູ້ສຶກປອດໄພ ແລະ ຮັກສາກຽດສັກສີຂອງເຂົາເຈົ້າໃນຊ່ວງເວລາທີ່ທ້າທາຍ. ນອກຈາກເປັນການຕອບສະໜອງຄວາມຕ້ອງການດ້ານສຸຂະອະນາໄມ, ຊຸດເຄື່ອງໃຊ້ທີ່ຈໍາເປັນ ຍັງຊ່ວຍໃຫ້ບຸກຄົນສາມາດເຄື່ອນໄຫວໄດ້ດີຂຶ້ນ ພ້ອມທັງສົ່ງເສີມຄວາມໝັ້ນໃຈຂອງຕົນເອງ. ນອກຈາກນີ້, ຊຸດເຄື່ອງໃຊ້ຍັງຊ່ວຍສົ່ງເສີມບຸກຄົນໃຫ້ຮູ້ສຶກເຫັນຄຸນຄ່າຂອງຕົນເອງ ແລະ ການເຄົາລົບຕົນເອງ, ອໍານວຍຄວາມສະດວກໃນການມີສ່ວນຮ່ວມທາງສັງຄົມ ແລະ ຮູ້ສຶກເປັນຕົວຕົນຂອງຕົວເອງ. ທ້າຍທີ່ສຸດ, ຊຸດເຄື່ອງໃຊ້ ແມ່ນບໍ່ພຽງແຕ່ການຊ່ວຍເຫຼືອດ້ານວັດຖຸ; ມັນສາມາດຊ່ວຍໃຫ້ບຸກຄົນຟື້ນຟູກຽດສັກສີ ແລະ ສິດຂອງຕົນ.
ທ່ານ ນາງ ອາລີ ວົງບຸນທຳ ປະທານສະຫະພັນແມ່ຍິງລາວ ໄດ້ກ່າວວ່າ:
ຊຸດເຄື່ອງໃຊ້ທີ່ຈໍາເປັນສໍາລັບແມ່ຍິງທີ່ພວກເຮົານຳມາແຈກຢາຍໃນມື້ນີ້ ແມ່ນສິ່ງຈຳເປັນໃນການຊ່ວຍແມ່ຍິງ ແລະ ເດັກຍິງທີ່ໄດ້ຮັບຜົນກະທົບຈາກໄພນ້ຳຖ້ວມ. ຊຸດເຫຼົ່ານີ້ສະໜອງຜະລິດຕະພັນອະນາໄມທີ່ຈໍາເປັນ, ເຄື່ອງນຸ່ງສະອາດ ແລະ ເຄື່ອງມືຮັກສາຄວາມປອດໄພທີ່ຊ່ວຍຟື້ນຟູກຽດສັກສີ ແລະ ສົ່ງເສີມສຸຂະພາບໃນສະຖານະການທີ່ທ້າທາຍ. ມັນຊ່ວຍສະທ້ອນໃຫ້ເຫັນເຖິງຄວາມມຸ່ງໝັ້ນຂອງພວກເຮົາ ເພື່ອຮັບປະກັນວ່າທຸກໆຄົນສາມາດຮັກສາຄວາມເປັນຢູ່ທີ່ດີ ແລະ ຄວາມຢືດຢຸ່ນຂອງເຂົາເຈົ້າ ໃນຊ່ວງເວລາທີ່ຫຍຸ້ງຍາກນີ້.
ທ່ານ ດຣ ບັກຕີຢໍ ຄາດີໂຣບ, ຜູ້ຕາງໜ້າຂອງອົງການ UNFPA ໄດ້ເນັ້ນໜັກວ່າ,
ເຖິງວ່າພວກເຮົາຈະສຸມໃສ່ການສົ່ງເສີມຄວາມເປັນຢູ່ທີ່ດີຂອງແມ່ຍິງ ແລະ ເດັກຍິງໃນໄວຈະເລີນພັນ, ຊຸດເຄື່ອງໃຊ້ທີ່ຈໍາເປັນ ໄດ້ຖືກອອກແບບມາໃຫ້ສອດຄ່ອງກັບສະພາບການທ້ອງຖິ່ນ ເພື່ອໃຫ້ກົງກັບຄວາມຕ້ອງການຂອງກຸ່ມເປົ້າໝາຍທີ່ຫຼາກຫຼາຍ, ລວມທັງ ໄວໜຸ່ມຊາຍ, ແມ່ຍິງຖືພາ ແລະ ແມ່ໃຫ້ນົມລູກ, ເດັກເກີດໃໝ່, ຄູ່ແຕ່ງງານໃໝ່, ຜູ້ຕິດເຊື້ອ HIV/AIDS, ຄົນພິການ ແລະ ຜູ້ສູງອາຍຸ. ຊຸດເຄື່ອງໃຊ້ທີ່ຈໍາເປັນ ແມ່ນເຄື່ອງມືໃນການຊ່ວຍ ຊຸມຊົນທີ່ເຂົ້າເຖິງຍາກໃຫ້ມີສ່ວນຮ່ວມ, ອຳນວຍຄວາມສະດວກໃນການເຂົ້າເຖິງວຽກງານສຸຂະພາບທາງເພດ ແລະ ສູຂະພາບຈະເລີນພັນທີ່ຈຳເປັນ, ປ້ອງກັນຄວາມຮຸນແຮງບົນພື້ນຖານທາງເພດ ແລະ ສະໜອງການບໍລິການດ້ານສຸຂະພາບຈິດ. ສິ່ງທີ່ສຳຄັນແມ່ນ ມັນເປັນສິ່ງທີ່ສາມາດເຕືອນສະຕິແກ່ຜູ້ຮັບວ່າ ເຂົາເຈົ້າຍັງບໍ່ຖືກປະລະ ແລະ ຍັງມີຄົນເປັນຫ່ວງເປັນໄຍໃນຊ່ວງເວລາທີ່ຫຍຸ້ງຍາກ, ເຊິ່ງຄວາມຮູ້ສຶກນີ້ຈະຊ່ວຍຍົກສູງຄຸນຄ່າ ແລະ ກຽດສັກສີຂອງຕົນເອງ.
ທ່ານ ນາງ ມີແກນ ໂຈນຊ໌, ເອກອັກຄະລັດຖະທູດແຫ່ງປະເທດອົດສະຕຣາລີ ປະຈຳ ສປປ ລາວ, ໄດ້ກ່າວວ່າ:
ປະເທດອົດສະຕຣາລີ ສືບຕໍ່ເພີ່ມທະວີການພົວພັນຄູ່ຮ່ວມມືກັບ ສປປ ລາວ, ພວກເຮົາໃຫ້ຄຳໝັ້ນສັນຍາໃນການສະໜັບສະໜູນບັນດາການລິເລີ່ມຕ່າງໆ ທີ່ສົ່ງເສີມການສ້າງຄວາມເຂັ້ມແຂງ ແລະ ຄວາມຢືດຢຸ່ນ. ຍຸດທະສາດຂອງພວກເຮົາແມ່ນສຸມໃສ່ການພັດທະນາແບບຍືນຍົງ, ປັບປຸງຊີວິດການເປັນຢູ່ ແລະ ສ້າງຄວາມຢືດຢຸ່ນພາຍໃນຊຸມຊົນ. ໃນຊ່ວງເວລາທີ່ຫຍຸ້ງຍາກນີ້, ພວກເຮົາຈໍາເປັນຕ້ອງຮ່ວມກັນເພື່ອຍື່ນມືໃຫ້ການສະໜັບສະໜູນ ແລະ ຮັບປະກັນວ່າບໍ່ມີໃຜຖືກປະໄວ້ຢູ່ຂ້າງຫຼັງ.
ການຮ່ວມມືດັ່ງກ່າວນີ້ ຊີ້ໃຫ້ເຫັນເຖິງຄວາມມຸ່ງໝັ້ນອັນໜັກແໜ້ນຂອງອົງການ UNFPA, ສະຫະພັນແມ່ຍິງລາວ ແລະ ລັດຖະບານອົດສະຕຣາລີ ໃນການສົ່ງເສີມສຸຂະພາບ, ຄວາມປອດໄພ ແລະ ກຽດສັກສີຂອງແມ່ຍິງ ແລະ ເດັກຍິງ ໃນ ສປປ ລາວ ໃນທຸກສະພາບການ. ການຮ່ວມມືນີ້ ໄດ້ສະທ້ອນໃຫ້ເຫັນເຖິງ ຄວາມພະຍາຍາມອຸທິດຕົນຂອງຄູ່ຮ່ວມງານ ເພື່ອແກ້ໄຂສາເຫດຕົ້ນຕໍຂອງຄວາມຮຸນແຮງບົນພື້ນຖານທາງເພດ ແລະ ສູ້ຊົນເພື່ອອະນາຄົດທີ່ແມ່ຍິງ ແລະ ເດັກຍິງທຸກຄົນສາມາດດຳລົງຊີວິດໄດ້ໂດຍປາສະຈາກຄວາມຮຸນແຮງ, ມີຄວາມປອດໄພ ແລະ ມີກຽດສັກສີ.
