ໃນລະຫວ່າງວັນທີ 6-8 ຕຸລາ 2024 ທີ່ ແຂວງ ຫຼວງພະບາງ, ສປປ ລາວ –ກອງປະຊຸມເວທີສົນທະນາຊາວໜຸ່ມອາຊຽນຄັ້ງທີ 3 ໄດ້ຈັດຂຶ້ນທີ່ ແຂວງຫຼວງພຣະບາງ, ສປປ ລາວ ໃນລະຫວ່າງວັນທີ 6-8 ຕຸລາ 2024, ພາຍໃຕ້ຫົວຂໍ້: “ເສີມສ້າງຄວາມເຂັ້ມແຂງ ແລະ ການຊຸກຍູ້ແບບຮອບດ້ານ ເພື່ອການພັດທະນາຊາວໜຸ່ມອາຊຽນທີ່ຍືນຍົງ” ກອງປະຊຸມຄັ້ງນີ້, ຈັດຂຶ້ນໂດຍ ສູນກາງຊາວໜຸ່ມປະຊາຊົນປະຕິວັດລາວ (ສຊປລ) ຮ່ວມກັບ ກອງເລຂາອາຊຽນ, ອົງການ UNFPA ແລະ ອົງການ UNICEF, ເຊິ່ງມີຜູ້ແທນເຈົ້າໜ້າທີ່ອາວຸໂສ ແລະ ຊາວໜຸ່ມ ຈາກ ບັນດາປະເທດອາຊຽນ ແລະ ປະເທດ ຕີມໍ-ເລສເຕ ເຂົ້າຮ່ວມ ທັງໝົດ 33 ທ່ານ ເພື່ອຮ່ວມກັນປຶກສາຫາລືແກ້ໄຂບາງສິ່ງທ້າທາຍໃນອາຊຽນ ແລະ ພາກພື້ນ ເພື່ອພ້ອມກັນຊອກຊ່ອງທາງ ການພັດທະນາຊາວໜຸ່ມໃນກຳນົດອະນາຄົດ.
ດັ່ງທີ່ເຮົາຮູ້ນໍາກັນແລ້ວວ່າ ຈຳນວນປະຊາກອນໜຸ່ມ ໃນພາກພື້ນອາຊຽນ ຈະມີຫຼາຍກວ່າ 220 ລ້ານຄົນ ໃນປີ 2038, ເພາະຊາວໜຸ່ມຈະເປັນກຳລັງແຮງໃນການສ້າງສາ ແລະ ພັດທະນາປະເທດຊາດ. ກອງປະຊຸມເວທີສົນທະນາຊາວໜຸ່ມອາຊຽນຄັ້ງນີ້ ຈະໄດ້ທົບທວນຄືນບາງຂົງເຂດທີ່ຊາວໜຸ່ມໄດ້ມີການ ປະກອບສ່ວນເປັນຕົ້ນແມ່ນເລື່ອງສຸຂະພາບ, ຄວາມເປັນຢູ່ທີ່ດີ, ການສຶກສາ, ການເປັນຜູ້ປະກອບການ ແລະ ການຮ່ວມໂຕກັນທາງສັງຄົມ, ໂດຍໃຫ້ຊາວໜຸ່ມເປັນຜູ້ກໍານົດວິທີແກ້ໄຂ ແລະ ມີຂໍ້ສະເໜີ ໃນຕອນທ້າຍຂອງກອງປະຊຸມ.
ທ່ານ ມອນໄຊ ລາວມົວຊົ່ງ ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ ໄດ້ກ່າວວ່າ:
ການລົງທຶນໃສ່ຊາວໜຸ່ມແມ່ນມີຄວາມສຳຄັນຕໍ່ການພັດທະນາຂອງພາກພື້ນ. ໂດຍສົ່ງເສີມການສຶກສາ, ສາທາລະນະສຸກ, ການສ້າງວຽກເຮັດງານທໍາ ແລະ ການສ້າງຄວາມເຂັ້ມແຂງໃຫ້ຊາວໜຸ່ມ ໃຫ້ກາຍເປັນຊາວໜຸ່ມທີ່ມີຄຸນນະພາບຊີວິດທີ່ດີ, ມີຄວາມໝັ້ນຄົງທາງເສດຖະກິດ ແລະ ສັງຄົມ ແມ່ນມີຄວາມສໍາຄັນ ຕໍ່ການພັດທະນາແບບຍືນຍົງ. ກອງປະຊຸມຄັ້ງນີ້ເປັນເວທີສົນທະນາສຳລັບຊາວໜຸ່ມ ທີ່ຈະໄດ້ສະແດງບົດບາດ ແລະ ຄວາມເປັນຫ່ວງເປັນໃຍຂອງຕົນເອງ. ພ້ອມກັນນັ້ນ, ກໍຍັງຮ່ວມກັນ ຄົ້ນຄ້ວາ ວິທີການສ້າງຄວາມເຂັ້ມແຂງໄປສູ່ການພັດທະນາ ແບບຍືນຍົງຂອງຊາວໜຸ່ມອາຊຽນທັງໝົດ.
ການມີສ່ວນຮ່ວມຂອງຊາວໜຸ່ມອາຊຽນ ຈະຫັນໄປສູ່ການເປັນດິຈິຕອນເພື່ອບັນລຸເປົ້າໝາຍ ການພັດທະນາແບບຍືນຍົງ. ຜົນຂອງກອງປະຊຸມດັ່ງກ່າວຈະນໍາໄປສະເໜີ ໃນກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບ ປີ 2024.
ທ່ານ ດຣ ບາກຄໍເດີ ເບີຄານອບ, ຫົວໜ້າຫ້ອງການປະສານງານ ອົງການ ສະຫະປະຊາຊາດ, ໄດ້ເນັ້ນໜັກເຖິງບົດບາດສຳຄັນຂອງຊາວໜຸ່ມ ໃນການພັດທະນາພາກພື້ນວ່າ:
ໃນນາມຜູ້ນໍາໄວໜຸ່ມ ພວກທ່ານມາຈາກຫຼາກຫຼາຍຮູບແບບການໃຊ້ຊີວິດທີ່ແຕກຕ່າງກັນ. ທ່ານແມ່ນຜູ້ລິເລີ່ມ, ຜູ້ປະກອບການ, ສະໜັບສະໜູນການພັດທະນາ, ຄວາມຍຸຕິທໍາ ແລະ ຄວາມຍືນຍົງ. ທ່ານມີສັກກະຍະພາບໃນການຫັນປ່ຽນຊຸມຊົນທີ່ທ່ານອາໄສຢູ່, ມີອິດທິພົນຕໍ່ພາກພື້ນໂດຍລວມ ແລະ ເຮັດເພື່ອປະໂຫຍດສ່ວນລວມຂອງທຸກໆຄົນ.
ໃນໄລຍະການສົນທະນາ ເປັນເວລາ 3 ວັນ, ຜູ້ແທນຊາວໜຸ່ມອາຊຽນ ຈະເຂົ້າຮ່ວມການສົນທະນາທີ່ຍົກໃຫ້ເຫັນຄວາມສຳຄັນຂອງ ຕໍ່ສຸຂະພາບຈະເລີນພັນ, ນະວັດຕະກຳໃໝ່ໄປສູ່ການພັດທະນາເສດຖະກິດ-ສັງຄົມ.
ທ່ານ ປິໂອ ສະມິດ, ຜູ້ອໍານວຍການພາກພື້ນຂອງ ອົງການ ສະຫະປະຊາຊາດ ກອງທຶນສຳລັບປະຊາກອນ ອາຊີ ແລະ ປາຊີຟິກ, ເນັ້ນຕື່ມວ່າ:
ໄວໜຸ່ມບໍ່ພຽງແຕ່ເປັນຜູ້ນຳໃນອະນາຄົດຂ້ອງໜ້າເທົ່ານັ້ນ; ພວກເຂົາຍັງເປັນຕົວແທນຂອງການປ່ຽນແປງໃນປັດຈຸບັນອີກດ້ວຍ. ໄວໜຸ່ມອາຊຽນສາມາດຂັບເຄື່ອນຄວາມກ້າວໜ້າ ທີ່ມີຄວາມໝາຍ ແລະ ສ້າງຄວາມໝັ້ນໃຈໃຫ້ໄວໜຸ່ມທຸກຄົນຮູ້ສຶກມີພະລັງ ແລະ ປະກອບສ່ວນເຂົ້າໃນການເດີນທາງໄປສູ່ອະນາຄົດ ທີ່ຍືນຍົງ.
ກອງປະຊຸມດັ່ງກ່າວຈະໄດ້ສັງລວມດ້ວຍການສະຫຼຸບ ແລະ ຮັບຮອງເອົາຖະແຫຼງການຂອງໄວໜຸ່ມອາຊຽນ, ເຊິ່ງຈະນຳສະເໜີຂໍ້ສະເໜີແນະໃນການເພີ່ມທະວີການຮ່ວມມືໃນພາກພື້ນ ແລະ ສະໜັບສະໜູນຂໍ້ລິເລີ່ມການພັດທະນາແບບຍືນຍົງໃຫ້ແກ່ໄວໜຸ່ມໃນທົ່ວອາຊຽນ.
ທ່ານ ນາງ ຈູນ ກູນູກິ, ຜູ້ອຳນວຍການຂັ້ນພາກພື້ນອາຊີຕາເວັນອອກ ແລະ ປາຊີຟິກ ຂອງ UNICEF ກ່າວຕື່ມວ່າ:
ອະນາຄົດຂອງອາຊຽນແມ່ນຂຶ້ນກັບການລົງທຶນກັບໄວໜຸ່ມໃນປັດຈຸບັນ ໂດຍສະເພາະ ເພື່ອຮັບປະກັນວ່າເດັກຍິງໄດ້ຮັບໂອກາດທີ່ພວກເຂົາສົມຄວນທີ່ຈະໄດ້ຮັບໃນການຮຽນຮູ້, ເປັນຜູ້ນໍາ, ແລະ ປະສົບຜົນສໍາເລັດ. ພວກເຮົາຕ້ອງຮ່ວມມືກັນສ້າງທາງໃຫ້ເດັກຍິງໄດ້ຮຽນໜັງສື, ມີວຽກເຮັດງານທຳ, ມີຄວາມຕັ້ງໝັ້ນ, ແລະ ປະກອບສ່ວນໃນການພັດທະນາຊຸມຊົນຂອງເຂົາເຈົ້າ.
ພາຍຫຼັງຈາກ ເວທີສົນທະນາ, ຈະມີກອງປະຊຸມຜູ້ນຳອາຊຽນ ພົບປະກັບຊາວໜຸ່ມອາຊຽນ 2024 ເຊິ່ງຈະຈັດຂຶ້ນໃນວັນທີ 9-10 ຕຸລາ 2024, ທີ່ນະຄອນຫຼວງວຽງຈັນ, ໂດຍບັນດາຜູ້ແທນກອງປະຊຸມ ຈະມີການແລກປ່ຽນ ແລະ ປຶກສາຫາລືກ່ຽວກັບຜົນໄດ້ຮັບຂອງເວທີສົນທະນາຊາວໜຸ່ມອາຊຽນ ຕໍ່ກັບຜູ້ນຳຂອງອາຊຽນ.
