ວັນທີ 27 ເດືອນມັງກອນ ປີ 2022, ທີ່ນະຄອນຫຼວງວຽງຈັນ - ເພື່ອສ້າງຄວາມເຂັ້ມແຂງໃຫ້ແກ່ການບໍລິການທີ່ເປັນມິດກັບເຍົາວະຊົນ ແລະ ໄວໜຸ່ມ (AYFS), ອົງການ UNFPA ໄດ້ມອບໂທລະໂຄ່ງຈໍານວນ 11 ເຄື່ອງ ແລະ ກະເປົາສຳລັບວຽກງານສຸຂະພາບທາງເພດ ແລະ ສຸຂະພາບຈະເລີນພັນຈໍານວນ 12 ໃບໃຫ້ແກ່ແຂວງຈຳປາສັກ ໃນເດືອນທັນວາທີ່ຜ່ານມາ. ແຂວງສະຫວັນນະເຂດ ກໍໄດ້ຮັບເຄື່ອງລະບົບສຽງ ແລະ ໂທລະໂຄ່ງຈໍານວນ 50 ເຄື່ອງຈາກອົງການ UNFPA ເຊັ່ນກັນ.
ທ່ານດຣ. ວຽງສີສຸກ ສຸພັກດີ, ຫົວໜ້າພະແນກສາທາລະນະສຸກແຂວງຈຳປາສັກ ກ່າວວ່າ: “ເຄື່ອງມືເຫຼົ່ານີ້ແມ່ນສິ່ງຈຳເປັນສຳລັບທັງການເຄື່ອນໄຫວລົງບ້ານ ແລະ ການບໍລິການຢູ່ສະຖານທີ່ສາທາລະນະສຸກ. ພວກເຮົານຳໃຊ້ອຸປະກອນເຫຼົ່ານີ້ເພື່ອນໍາເອົາຂໍ້ມູນຂ່າວສານສຳຄັນກ່ຽວກັບສຸຂະພາບທາງເພດ ແລະ ສຸຂະພາບຈະເລີນພັນ ລວມທັງການປ້ອງກັນພະຍາດໂຄວິດ-19 ໄປສູ່ປະຊາຊົນ ເພື່ອໃຫ້ພວກເຂົາສາມາດປ້ອງກັນຕົນເອງ ແລະ ຄອບຄົວຂອງພວກເຂົາໄດ້,”
ການເຂົ້າເຖິງການບໍລິການຮັກສາສຸຂະພາບທ່າມກາງພະຍາດໂຄວິດ -19 ມີຄວາມຫຍຸ້ງຍາກຫຼາຍຂຶ້ນ, ໂດຍສະເພາະເຍົາວະຊົນ ແລະ ໄວໜຸ່ມຜູ້ທີ່ສະແຫວງາການບໍລິການສຸຂະພາບທາງເພດ ແລະ ສຸຂະພາບຈະເລີນພັນ, ຊຶ່ງແມ່ນແຕ່ກ່ອນການລະບາດຂອງພະຍາດກໍເປັນສິ່ງທ້າທາຍຢູ່ແລ້ວ. ອົງການUNFPA ແລະ ກະຊວງສາທາລະນະສຸກສະໜັບສະໜູນໂຄງການ AYFS ໂດຍມີຈຸດປະສົງເພື່ອຕອບສະໜອງຄວາມຕ້ອງການຂອງໄວໜຸ່ມໃນສະພາບແວດລ້ອມແບບເປັນມິດປິດລັບ ແລະ ແບບສະບາຍໃຈເພື່ອໃຫ້ພວກເຂົາສາມາດສົນທະນາກ່ຽວກັບສຸຂະພາບທາງເພດ ແລະ ສຸຂະພາບຈະເລີນພັນຂອງຕົນໄດ້ຢ່າງເປັນອິດສະລະໂດຍບໍ່ຕ້ອງຢ້ານກົວຫຼືເຂີນອາຍ.
ໃນໄລຍະການລະບາດຂອງພະຍາດໂຄວິດ-19, ທັງສອງແຂວງໄດ້ສືບຕໍ່ສະໜອງຂໍ້ມູນຂ່າວສານ ແລະ ການບໍລິການດ້ານສຸຂະ ພາບທາງເພດ ແລະ ສຸຂະພາບຈະເລີນພັນໃນສູນກັກກັນ ແລະ ໃນສະຖານທີ່ປິ່ນປົວຕ່າງໆ, ລວມທັງໃນບັນດາບ້ານໃນທົ່ວທຸກເມືອງ. ພວກເຂົາດໍາເນີນການໃຫ້ສຸຂະສຶກສາໂດຍຜ່ານການເຄື່ອນໄຫວໄປຕາມໂຮງງານ ແລະ ບ້ານຕ່າງໆ. ເຍົາວະຊົນ ແລະ ໄວໜຸ່ມທຸກຄົນ, ທັງນັກຮຽນໃນໂຮງຮຽນ ຫຼື ໄວໜຸ່ມທີ່ບໍ່ໄດ້ເຂົ້າໂຮງຮຽນ ແລະ ແຮງງານໄວໜຸ່ມໃນໂຮງງານຕ່າງໆກໍລ້ວນແຕ່ໄດ້ຮັບບໍລິການດ້ານສຸຂະພາບທາງເພດ ແລະ ສຸຂະພາບຈະເລີນພັນເບື້ອງຕົ້ນ ເຊັ່ນ: ການໃຫ້ຄຳປຶກສາ, ຢາເມັດຄຸມກຳເນີດ, ຢາສັກຄຸມກຳເນີດ, ແລະ ຖົງຢາງອະນາໄມ ໂດຍຜ່ານຄລີນິກເຄື່ອນທີ່.
ທ່ານນາງດຣ. ແສງດາວ ສີດາໄລ, ຫົວໜ້າພະແນກສາທາລະນະສຸກແຂວງສະຫັວນນະເຂດກ່າວວ່າ: "ອຸປະກອນດັ່ງກ່າວຈະຊ່ວຍອຳນວຍຄວາມສະດວກໃຫ້ແກ່ໂຄງການ AYFS ຂອງແຂວງທ່າມກາງການລະບາດຂອງພະຍາດໂຄວິດ-19 ໂດຍສະ ເພາະແຮງງານໄວໜຸ່ມຕາມສູນກັກຕົວຕ່າງໆ. ທີມງານຂອງພວກເຮົາຍັງຈະສືບຕໍ່ໃຫ້ຂໍ້ມູນ ແລະ ການບໍລິການດ້ານສຸຂະພາບທີ່ສໍາຄັນກ່ຽວກັບສຸຂະພາບທາງເພດ ແລະ ສຸຂະພາບຈະເລີນພັນໃຫ້ແກ່ເຍົາວະຊົນ ແລະ ໄວໜຸ່ມທຸກຄົນໄໃນທົ່ວ 15 ເມືອງ."
ອີງຕາມຂໍ້ມູນຂອງກະຊວງສາທາລະນະສຸກ (2020), ກ່ອນການລະບາດຂອງພະຍາດ, ຄວາມຕ້ອງການຕໍ່ການວາງແຜນຄອບ ຄົວທີ່ບໍ່ໄດ້ສະໜອງໃຫ້ແກ່ໄວໜຸ່ມທີ່ບໍ່ໄດ້ແຕ່ງງານອາຍຸ 15-19 ແມ່ນສູງເຖິງ 75%. ນັບຕັ້ງແຕ່ພະຍາດໂຄວິດ-19 ພຸ່ງສູງຂຶ້ນ, ຜູ້ຊົມໃຊ້ການຄຸມກໍາເນີດໃໝ່ກໍຫຼຸດລົງເປັນ 15% ຊຶ່ງສາມາດນໍາໄປສູ່ການເພີ່ມຂຶ້ນຂອງການຖືພາທີ່ບໍ່ໄດ້ວາງແຜນ, ການແຕ່ງງານໃນໄວເດັກ, ແລະ ການລຸລູກແບບບໍ່ປອດໄພ.
ທ່ານນາງມາຣຽມ ເອ. ຄານ, ຜູ້ຕາງໜ້າອົງການ UNFPA ປະຈຳ ສປປ ລາວ ກ່າວວ່າ: “ພວກເຮົາປ່ອຍໃຫ້ໄວໜຸ່ມຜິດຫັວງ ຖ້າວ່າການບໍລິການທີ່ຈຳເປັນຖືກຂັດຂວາງ, ເພາະວ່າ ການບໍລິການທີ່ຖືກຂັດຂວາງຈະນໍາໄປສູ່ການຖືພາທີ່ບໍ່ໄດ້ວາງແຜນ, ການແຕ່ງງານໃນໄວເດັກ, ການລຸລູກແບບບໍ່ປອດໄພ ແລະ ການຕິດເຊື້ອທາງເພດສຳພັນ (ພຕພ). ການສືບຕໍ່ການບໍລິການດ້ານສຸຂະພາບທາງເພດ ແລະ ສຸຂະພາບຈະເລີນພັນທີ່ສໍາຄັນໃຫ້ເປັນປົກກະຕິ, ໂດຍສະເພາະໃຫ້ແກ່ເຍົາວະຊົນ ແລະ ໄວໜຸ່ມມີຄວາມສຳຄັນຢ່າງຍິ່ງໂດຍຄຽງຄູ່ໄປກັບຄວາມພະຍາຍາມສະກັດກັ້ນການແຜ່ເຊື້ອໄວຣັສ໌, ຖ້າບໍ່ເຮັດແບບນັ້ນຈະເປັນການຂັດຂວາງການຟື້ນຕົວດ້ານເສດຖະກິດ-ສັງຄົມໃນໄລຍະຍາວ.”
ໄປຄຽງຄູ່ກັບໜ່ວຍບໍລິການເຄື່ອນທີ່ ແລະ ຄລີນິກເຄື່ອນທີ່, ຍັງມີເບີໂທສາຍດ່ວນ - 1361 (ສໍາລັບເພດຍິງ) ແລະ 137 (ສໍາລັບເພດຊາຍ) ຊຶ່ງດຳເນີນງານໂດຍຄລີນິກໄວໜຸ່ມນະຄອນຫຼວງວຽງຈັນເພື່ອໃຫ້ຄຳປຶກສາດ້ານສຸຂະພາບທາງເພດ ແລະ ສຸຂະ ພາບຈະເລີນພັນໃຫ້ແກ່ເຍົາວະຊົນ ແລະ ໄວໜຸ່ມ. ອົງການ UNFPA ຮ່ວມມືກັບລັດຖະບານ ແລະ ບັນດາຄູ່ຮ່ວມງານ ເຊັ່ນ: ລັດຖະບານລັກເຊມເບີກ ແລະ ອົງການການຮ່ວມມືເພື່ອການພັດທະນາຂອງສະວິດເຊີແລນ (SDC) ພາຍໃນໂຄງການຮ່ວມມືຂອງສະຫະປະຊາຊາດເພື່ອຮັບປະກັນວ່າເຍົາວະຊົນ ແລະ ໄວໜຸ່ມທຸກຄົນສາມາດເຂົ້າເຖິງຂໍ້ມູນຂ່າວສານ ແລະ ການບໍລິການຕ່າງໆດ້ານສຸຂະພາບທາງເພດ ແລະ ສຸຂະພາບຈະເລີນພັນ.
********************
UNFPA ແມ່ນອົງການສະຫະປະຊາຊາດດ້ານສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກໃນ 150 ກວ່າປະ ເທດ ລວມທັງ ສປປ ລາວ, ເພື່ອບັນລຸຜົນເຮັດໃຫ້ການຕາຍຂອງແມ່ກາຍເປັນ 0, ຄວາມຕ້ອງການໃນການວາງແຜນຄອບຄົວທີ່ໄດ້ສະໜອງກາຍເປັນ 0 ແລະ ການຈໍາແນກໂດຍອີງໃສ່ເພດຍິງ-ຊາຍກາຍເປັນ 0.
ສໍາລັບຂໍ້ມູນເພີ່ມເຕີມຈົ່ງຕິດຕໍ່:
ນາງ ສຸກພັນສາ ສາຍສະໝອນ
ຜູ້ຊ່ວຍໂຄງການ SRH, ອົງການ UNFPA ປະຈໍາສປປລາວ
ອີເມວ: saysamone@unfpa.org
ນາງ ວັນລີ ລໍກວາງມິງ
ນັກວິເຄາະດ້ານການສື່ສານ ແລະ ການເປັນຄູ່ຮ່ວມງານ, ອົງການ UNFPA ປະຈໍາ ສປປລາວ
ອີເມວ: lorkuangming@unfpa.org
