21 ທັນວາ 2022, ນະຄອນຫຼວງວຽງຈັນ, ສປປ ລາວ - ກະຊວງແຜນການ ແລະ ການລົງທຶນ (MPI) ແລະ ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ໄດ້ຈັດກອງປະຊຸມປະຈຳປີ ເພື່ອທົບທວນຄວາມຄືບໜ້າຂອງແຜນຮ່ວມມືຄັ້ງທີ 7 (CP7). ກອງປະຊຸມດັ່ງກ່າວໄດ້ເຊື້ອເຊີນເອົາບັນດາຄູ່ຮ່ວມຈັດຕັ້ງປະຕິບັດ ແລະ ບັນດາຄູ່ຮ່ວມມືແຫ່ງຊາດ ມາຮ່ວມນໍາສະເໜີການຈັດຕັ້ງປະຕິບັດວຽກງານຂອງປີທໍາອິດຂອງຮອບວຽນດັ່ງກ່າວ, ນໍາສະເໜີສິ່ງທ້າທາຍ ແລະ ແຜນບຸລິມະສິດປີ 2023.
ໃນລະຫວ່າງການກ່າວມີຄໍາເຫັນ, ທ່ານ ນາງ ສີສົມບູນ ອູນາວົງ, ຫົວໜ້າກົມຮ່ວມມືສາກົນ, ກະຊວງແຜນການ ແລະ ການລົງທຶນ ໄດ້ສະແດງຄວາມຊົມເຊີຍມາຍັງ ອົງການ UNFPA ຕໍ່ກັບຜົນງານອັນພົ້ນເດັ່ນໃນປີທີ່ຜ່ານມາ. ທ່ານ ນາງ ສີສົມບູນ ກ່າວວ່າ, “ຂ້າພະເຈົ້າຫວັງເປັນຢ່າງຍິ່ງວ່າ ໃນປີ 2023 ນີ້, ອົງການ ສປຊ ກອງທຶນສຳລັບປະຊາກອນ ແລະ ບັນດາກະຊວງຂະແໜງການທີ່ເປັນຄູ່ຮ່ວມງານ ຈະສຶບຕໍ່ເຮັດວຽກຮ່ວມກັນຢ່າງສະນິດແໜ້ນ ໃນການຈັດຕັ້ງແຜນກິດຈະກຳ ປະຈຳປີ 2023 ໃຫ້ສຳເລັດຕາມຈຸດປະສົງແລະຂາດໝາຍທີ່ວາງໄວ້ ໂດຍສະເພາະການສຸມງົບປະມານໃຫ້ການຊ່ວຍເຫຼືອແກ່ ລັດຖະບານ ສປປ ລາວ ກໍ່ຄືບັນດາກະຊວງ / ຂະແໜງການ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໃຫ້ສາມາດບັນລຸໄດ້ຕາມຄາດໝາຍ ແລະ ປະກົດຜົນເປັນຈິງ.”
“ສະນັ້ນ, ຈຶ່ງຮຽກຮ້ອງໃຫ້ທຸກໆພາກສ່ວນຕ້ອງເອົາໃຈໃສ ແລະ ໃຫ້ຄວາມສໍາຄັນ, ເປັນເຈົ້າການໃນການຈັດຕັ້ງປະຕິບັດວຽກງານທີ່ຕິດພັນກັບກະຊວງຂະແໜງການຂອງຕົນ ເຊິ່ງແຜນງານການຮ່ວມມື ຮອບວຽນ 7 (2022-2026) ນີ້ແມ່ນປະກອບມີ 4 ຜົນໄດ້ຮັບຫຼັກ ຄື: ສຸຂະພາບຈະເລີນພັນ; ໄວໜຸ່ມ ແລະ ເຍົາວະຊົນ; ຄວາມສະເໝີພາບລະຫວ່າງ ຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແມ່ຍິງ; ການປ່ຽນແປງດ້ານປະຊາກອນ ທີ່ຢູ່ພາຍໃຕ້ຄວາມຮັບຜິດຊອບໃນຂະແໜງການຜູ້ຈັດຕັ້ງປະຕິບັດຕົວຈິງ ທີ່ສາມາດສູ້ຊົນປະກອບສ່ວນໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ກໍ່ຄືການປະກອບສ່ວນເຮັດໃຫ້ ສປປ ລາວ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ບັນລຸເປົ້າໝາຍການພັດທະນາແບບຍືນຍົງ ໃນປີ 2030.”
CP7 ໄດ້ຖອດຖອນບົດຮຽນຈາກຮອບວຽນທີ່ຜ່ານມາ ແລະ ນໍາໃຊ້ຂໍ້ມູນຈາກການສຶກສາດ້ານປະຊາກອນລາວ 2030 ຄຽງຄູ່ກັບການສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ XI ປີ 2021-2025, ຄໍາໝັ້ນສັນຍາແຫ່ງຊາດຕໍ່ກອງປະຊຸມສາກົນກ່ຽວກັບການພັດທະນາປະຊາກອນ (ICPD25) ຄັ້ງທີ 25 ແລະ ຂອບການຮ່ວມມືການພັດທະນາແບບຍືນຍົງຂອງສະຫະປະຊາຊາດ (UNSDCF).
ແຜນງານການຮ່ວມມືດັ່ງກ່າວມີເປົ້າໝາຍທີ່ຈະເລັ່ງຄວາມຄືບໜ້າຂອງການເຂົ້າເຖິງການບໍລິການ ແລະ ສິດທິທາງສຸຂະພາບທາງເພດ ແລະ ສຸຂະພາບຈະເລີນພັນຢ່າງຄອບຄຸມຜ່ານການລົງທຶນໃນການພັດທະນາຊັບພະຍາກອນມະນຸດຄື: ຊ່ວຍໃຫ້ເດັກຍິງ ແລະ ເດັກຊາຍ ຖືພາ ແລະ ແຕ່ງງານໃນໄວອາຍຸທີ່ເໝາະສົມ, ຊ່ວຍໃຫ້ພວກເຂົາໄດ້ຮັບທັກສະ ແລະ ຄວາມສາມາດຕ່າງໆ, ໄດ້ຜ່ານການຮຽນຫຼັກສູດເພດສຶກສາ, ຮັບປະກັນວ່າທຸກໆການຖືພາແມ່ນທາງເລືອກ ແລະ ບໍ່ໃຫ້ມີແມ່ຍິງ ຫຼື ເດັກຍິງເສຍຊີວິດຍ້ອນການເກີດລູກ, ພ້ອມນັ້ນແມ່ຍິງ ແລະ ເດັກຍິງຈະຕ້ອງສາມາດດຳລົງຊີວິດໄດ້ໂດຍປາສະຈາກການລ່ວງລະເມີດ ແລະ ຄວາມຮຸນແຮງ. ສິ່ງເຫຼົ່ານີ້ລ້ວນມີຄວາມຈຳເປັນຕໍ່ການເຮັດໃຫ້ໄວໜຸ່ມສາມາດເຕີບໂຕພັດທະນາໄດ້ຢ່າງເຕັມທີ່ ແລະ ເພື່ອໃຫ້ປະເທດລາວສາມາດໝູນໃຊ້ການປັນຜົນດ້ານປະຊາກອນຢ່າງເຕັມສ່ວນ.
ທ່ານ ນາງ ມາຣຽມ ຄານ, ຜູ້ຕາງໜ້າອົງການ UNFPA ກ່າວວ່າ, “ພວກເຮົາຈະສືບຕໍ່ຮ່ວມມືກັບລັດຖະບານລາວເພື່ອບັນລຸຜົນການຫັນປ່ຽນ 3 ປະການຄື: ຫຼຸດການຕາຍຂອງແມ່ທີ່ປ້ອງກັນໄດ້ໃຫ້ເປັນສູນ; ຫຼຸດຄວາມຕ້ອງການວາງແຜນຄອບຄົວທີ່ບໍ່ໄດ້ຮັບການສະໜອງໃຫ້ເຫຼືອສູນ; ແລະ ຫຼຸດການໃຊ້ຄວາມຮຸນແຮງບົນພື້ນຖານທາງເພດໃຫ້ເຫຼືອສູນ, ເພື່ອບໍ່ປະຖິ້ມໃຜໄວ້ຢູ່ເບື້ອງຫຼັງ.”
***************
ອົງການ UNFPA ແມ່ນໜ່ວຍງານໜຶ່ງຂອງອົງການສະຫະປະຊາຊາດທີ່ເຮັດວຽກໃນດ້ານ ສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ ລວມທັງ ສປປ ລາວ. ມີເປົ້າໝາຍໃນການຫຼຸດການຕາຍຂອງແມ່ທີ່ສາມາດປ້ອງກັນໄດ້ໃຫ້ເປັນ 0, ຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງໃຫ້ເປັນ 0, ຄວາມຮຸນແຮງບົນພື້ນຖານທາງເພດ ໃຫ້ເປັນ 0.
ສຳລັບຂໍ້ມູນເພີ່ມຕື່ມຕິດຕໍ່:
