ວັນທີ 25 ພະຈິກ, ນະຄອນຫຼວງວຽງຈັນ ສປປ ລາວ — ເພື່ອເປັນການສະເຫຼີມສະຫຼອງວັນສາກົນ ເພື່ອລົບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ລັດຖະບານແຫ່ງ ສປປ ລາວ ໂດຍສົມທົບກັບອົງການສະຫະປະຊາຊາດ ແລະ ບັນດາຄູ່ຮ່ວມງານ  ໄດ້ມີການຈັດພິທີຍ້ອມປະຕູໄຊເປັນສີສົ້ມ ໃນວັນທີ 25 ພະຈິກນີ້ ພ້ອມທັງເປີດບັ້ນຂະບວນການ 16 ວັນແຫ່ງການເຄື່ອນໄຫວ ເພື່ອຢຸດຕິການໃຊ້ຄວາມຮຸນແຮງຕໍ່ຄວາມຮຸນແຮງຕໍ່ແມ່ຍິງ ແລະ ເດັກຍິງ.

ການເຄື່ອນໄຫວດັ່ງກ່າວຈະດໍາເນີນການເປັນເວລາ 2 ອາທິດ, ໂດຍການມີສ່ວນຮ່ວມຈາກ 40 ຄູ່ຮ່ວມງານ, ເຊິ່ງໄດ້ຮັບການສະໜັບສະໜູນໂດຍ ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA), ສະຫະພາບເອີຣົບ (EU) ແລະ ອົງການຮ່ວມມືສາກົນ ສ. ເກົາຫຼີ (KOICA), ເພື່ອແນໃສ່ການປູກຈິດສໍານຶກ ແລະ ຊຸກຍູ້ບັນດາການເຄື່ອນໄຫວຕ່າງໆ ເພື່ອປ້ອງກັນ ແລະ ລົບລ້າງຄວາມຮຸນແຮງຕໍ່ ແມ່ຍິງ ແລະ ເດັກຍິງ. ຢູ່ໃນປະເທດລາວ, ແມ່ຍິງປະມານ 1 ໃນ 3 ຄົນ ເປັນຜູ້ຖືກເຄາະຮ້າຍຈາກຄວາມຮຸນແຮງທາງເພດ, ທາງຮ່າງກາຍ ຫຼື ຈິດໃຈ, ແຕ່ໃນຈຳນວນເຫຼົ່ານີ້, ມີພຽງ 1 ໃນ 10 ຄົນເທົ່ານັ້ນທີ່ລະດົມການຊ່ວຍເຫຼືອຈາກອໍານາດການປົກຄອງເຊັ່ນ: ຕຳຫຼວດ, ສູນປິ່ນປົວ ຫຼື ສະຫະພັນແມ່ຍິງລາວ ແລະ ຂະແໜງການທີ່ກ່ຽວຂ້ອງ. ຕົວເລກເຫຼົ່ານີ້, ເນັ້ນໜັກເຖິງຄວາມຈໍາເປັນອັນຮີບດ່ວນ ໃນປັບປຸງການປະສານງານ ແລະ ຄວາມພະຍາຍາມ ເພື່ອປ້ອງກັນຄວາມຮຸນແຮງ, ສະໜອງການບໍລິການຊ່ວຍເຫຼືອ ທີ່ສາມາດເຂົ້າເຖິງໄດ້ ພ້ອມທັງ ຮັບປະກັນວ່າ ຜູ້ລອດຊີວິດໄດ້ຮັບການຊ່ວຍເຫຼືອ ດ້ວຍຄວາມເມດຕາ, ມີກຽດສັກສີ ແລະ ໄດ້ຮັບຄວາມເອົາໃຈໃສ່.

ພິທີຍ້ອມປະຕູໄຊເປັນສີສົ້ມ ແມ່ນໄດ້ຈັດຂຶ້ນພາຍໃຕ້ ຫົວຂໍ້ “ກ້າວເຂົ້າສູ່ 30 ປີ ແຫ່ງຖະແຫຼງການ ແລະ ແຜນປະຕິບັດງານປັກກິ່ງ: ຮ່ວມກັນ ເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ເຊິິ່ງໄດ້ມີການເຕົ້າໂຮມຜູ້ເຂົ້າຮ່ວມຈາກຫຼາຍພາກສ່ວນ ທັງພາຍໃນ ແລະ ຕ່າງປະເທດ. ບັນດາຜູ້ເຂົ້າຮ່ວມ ໄດ້ນຸ່ງເສື້ອສີສົ້ມຢ່າງສາມັກຄີ, ເພື່ອເປັນການຮ່ວມແຮງຮ່ວມໃຈກັນ ຊຸກຍູ້ເຜີຍແຜ່ໂຄສະນາ. ຂະບວນການດັ່ງກ່າວນີ້ ຈະດໍາເນີນໄປຈົນຮອດວັນທີ 10 ທັນວາ (ວັນສິດທິມະນຸດ).

ໃນໂອກາດດັ່ງກ່າວ ບັນດາພາກສ່ວນທີ່ກ່ຽວຂ້ອງຈາກຫຼາຍຂະແໜງການ ໄດ້ມີການເຂົ້າຮ່ວມຢ່າງຕັ້ງໜ້າ, ໃນນັ້ນລວມມີ ຜູ້ຕາງໜ້າຈາກຝ່າຍລັດຖະບານ, ອົງການສະຫະປະຊາຊາດ, ສະຖານທູດ ແລະ ຄູ່ຮ່ວມພັດທະນາ, ອົງການຈັດຕັ້ງທາງສັງຄົມ, ຜູ້ສະໜັບສະໜູນສົ່ງເສີມຄົນພິການ ແລະ ຜູ້ຕາງໜ້າຈາກທັງພາກລັດ ແລະ ເອກະຊົນ. ການເຕົ້າໂຮມສາມັກຄີນີ້ ໄດ້ສະແດງໃຫ້ເຫັນເຖິງຄວາມມຸ່ງໝັ້ນ ທີ່ຈະຢຸດຕິທຸກຮູບການຄວາມຮຸນແຮງຕໍ່ ແມ່ຍິງ ແລະ ເດັກຍິງ ໃນ ສປປ ລາວ, ເຊິ່ງເປັນການປ່າວປະກາດຄໍາວ່າ “ບໍ່”' ຜ່ານການເຂົ້າຮ່ວມກິດຈະກໍາຕ່າງໆໃນງານ.

ໃນພິທີດັ່ງກ່າວ, ໄດ້ມີການສາຍວີດີໂອການກ່າວຄຳປາໄສ ຂອງທ່ານນາຍົກລັດຖະມົນຕີແຫ່ງ ສປປ ລາວ, ພະນະທ່ານ ສອນໄຊ ສີພັນດອນ, ໃຫ້ແກ່ຜູ້ເຂົ້າຮ່ວມຮັບຊົມ ແລະ ຮັບຟັງ, ເຊິ່ງເປັນການຢືນຢັນຄືນເຖິງຄວາມມຸ່ງໝັ້ນ ຂອງລັດຖະບານລາວ ໃນການປ້ອງກັນ ແລະ ລົບລ້າງຄວາມຮຸນແຮງທຸກຮູບແບບ ບໍ່ວ່າຈະເປັນເພດໃດກໍຕາມ.

ໃນບົດຄໍາປາໄສ, ທ່ານນາຍົກລັດຖະມົນຕີ ໄດ້ກ່າວວ່າ:

ທຸກໆປີ, ໃນໄລຍະ 16 ວັນແຫ່ງການເຄື່ອນໄຫວ, ພວກເຮົາມາຮ່ວມກັນຢືນຢັນຄືນ ຄວາມເປັນເຈົ້າການ, ການຊີ້ນໍາ-ນຳພາ, ການຮ່ວມມື ແລະ ການມີສ່ວນຮ່ວມໃນການຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ. ລັດຖະບານຂອງພວກເຮົາຍຶດໝັ້ນໃນຄຳໝັ້ນສັນຍາໃນການປະຕິບັດກົດໝາຍ ແລະ ນະໂຍບາຍ ທີ່ສົ່ງເສີມຄວາມສະເໝີພາບລະຫວ່າງຍິງ-ຊາຍ ແລະ ປົກປ້ອງສິດຂອງແມ່ຍິງ. ພວກເຮົາອຸທິດຕົນເພື່ອສ້າງຄວາມເຂັ້ມແຂງໃຫ້ແກ່ກົນໄກປ້ອງກັນ ແລະ ແກ້ໄຂຄວາມຮຸນແຮງ, ການຫັນປ່ຽນທັດສະນະຄະຕິທີ່ເປັນອັນຕະລາຍ ແລະ ຮັບປະກັນວ່າຜູ້ກະທຳຜິດ ຕ້ອງຮັບຜິດຊອບຕໍ່ການກະທໍາຂອງຕົນ ຕາມກົດໝາຍ. ໂດຍການຈັດສັນຊັບພະຍາກອນ ແລະ ການລົງທຶນໃນການລິເລີ່ມທີ່ສະໜັບສະໜູນຄວາມສະເໝີພາບລະຫວ່າງຍິງ-ຊາຍ, ພວກເຮົາກຳລັງປູທາງໄປສູ່ອະນາຄົດເພື່ອໃຫ້ແມ່ຍິງ ແລະ ເດັກຍິງທຸກຄົນ ສາມາດດຳລົງຊີວິດໄດ້ໂດຍບໍ່ມີຄວາມຢ້ານກົວ ແລະ ປາສະຈາກຄວາມຮຸນແຮງ. ເຖິງເວລາແລ້ວທີ່ພວກເຮົາ ຕ້ອງສຸມໃສ່ລົງທຶນເພີ່ມຂຶ້ນ ເພື່ອປ້ອງກັນ ແລະ ຕອບໂຕ້ ຕໍ່ຄວາມຮຸນແຮງຕໍ່ແມ່ຍິງ ແລະ ເດັກຍິງ

ພະນະທ່ານ ນາງ ອາລີ ວົງໜໍ່ບຸນທຳ, ປະທານສະຫະພັນແມ່ຍິງລາວ ແລະ ຮອງປະທານ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ໄດ້ກ່າວຄຳເຫັນໃນພິທີວ່າ:

ສີສົ້ມ ຫຼື ສີນໍ້າໝາກກ້ຽງ” ເປັນສີທີ່ສົດໃສ ແລະ ເບິ່ງໂລກໃນມຸມມອງທີ່ດີ, ເປັນສີທີ່ສະແດງເຖິງອະນາຄົດທີ່ສົດໃສ ປາສະຈາກຄວາມຮຸນແຮງຕໍ່ແມ່ຍິງ ແລະ ເດັກຍິງ ໃຫ້ທຸຄົນ ຢືນຢັນຕໍ່ຕ້ານການໃຊ້ຄວາມຮຸນແຮງຕໍໍ່ແມ່ຍິງ ແລະ ເດັກຍິງ, ໃຫ້ການຊ່ວຍເຫຼືອຜູ້ລອດຊີວິດ ແລະ ໃຫ້ຄວາມຮູ້ຂໍ້ມູນຂ່າວສານທີ່ສຳຄັນໃນການເຂົ້າເຖິງຂະບວນການຍຸຕິທຳ; ຂໍໃຫ້ໃຊ້ໜຶ່ງສຽງຂອງທ່ານເພື່ອປັບປ່ຽນປ່ຽນບັນທັດຖານຂອງສັງຄົມທີ່ເປັນອັນຕະລາຍ, ເຂົ້າຮ່ວມໃນການໂຄສະນາ ແລະ ຊຸກຍູ້ໃຫ້ມີການຈັດຕັ້ງປະຕິບັດກົດຫມາຍທີ່ເຂັ້ມງວດ, ການບັງຄັບໃຊ້ທີ່ດີກວ່າ ແລະ ເພີ່ມຊັບພະຍາກອນເພື່ອຢຸຕິຄວາມຮຸນແຮງຕໍ່ແມ່ຍິງ ແລະ ເດັກຍິງ.

ທ່ານ ແກມບິສ ກາບິຣີ, ຜູ້ປະຈຳການ ອົງການ ສະຫະປະຊາຊາດກອງທືນເພື່ອປະຊາກອນ ກ່າວວ່າ: 

ໃນໄລຍະ 10 ກວ່າປີທີ່ຜ່ານມາ, ສປປ ລາວ ໄດ້ມີການຫັນປ່ຽນບັນດາບັນທັດຖານດ້ານວັດທະນະທຳທີ່ສໍາຄັນຫລາຍພໍສົມຄວນ. ໂດຍຜ່ານການໂຄສະນາເຜີຍແຜ່ເພື່ອປູກຈິດສໍານຶກ, ການຊີ້ນໍາຂອງລັດຖະບານທີ່ເຂັ້ມແຂງ ແລະ ການລົງທຶນທີ່ສຳຄັນ ໃນການປ້ອງກັນການໃຊ້ຄວາມຮຸນແຮງຕໍ່ແມ່ຍິງ, ພ້ອມທັງ ການນຳພາຈາກບັນດາກະຊວງ ແລະ ຄູ່ຮ່ວມພັດທະນາທີ່ກ່ຽວຂ້ອງ, ຈຶ່ງເຮັດໃຫ້ ຄວາມອົດທົນຕໍ່ຄວາມຮຸນແຮງພາຍໃນຄອບຄົວ ມີອັດຕາຫຼຸດລົງຢ່າງຫຼວງຫຼາຍ. ແຕ່ວ່າວຽກງານນີ້ແມ່ນຍັງອີກຍາວໄກ ແລະ ບໍ່ທັນສິ້ນສຸດ. ອົງການ UNFPA ຈະສືບຕໍ່ຮຽກຮ້ອງໃຫ້ມີການປະຕິບັດທີ່ເດັດດ່ຽວ ເພື່ອປູກຈິດສໍານຶກ, ຊຸກຍູ້ການໂຄສະນາເຜີຍແຜ່ ແລະ ຊອກວິທີແກ້ໄຂດ້ວຍນະວັດຕະກຳໃໝ່ ເພື່ອຢຸດຕິການແຜ່ລາມຂອງຄວາມຮຸນແຮງຕໍ່ແມ່ຍິງ ແລະ ເດັກຍິງ.

ພະນະທ່ານ ຈຸງ ຢຸງ ຊູ (Jung Yung SOO), ເອກອັກຄະລັດຖະທູດ ສ. ເກົາຫຼີໄດ້ກ່າວວ່າ:

ສາທາລະນະລັດເກົາຫຼີ ຕີລາຄາ ຄວາມຮຸນແຮງຕໍ່ແມ່ຍິງ ແລະ ເດັກຍິງ ວ່າເປັນສິ່ງທີ່ຕ້ອງຖືກກໍາຈັດ ແລະ ລົບລ້າງໃຫ້ໝົດສິ້ນ. ພວກເຮົາ ພະຍາຍາມແກ້ໄຂບັນຫາດັ່ງກ່າວໂດຍການສະໜັບສະໜູນໂຄງການຄັນຮົ່ມ ແລະ ການສ້າງຕັ້ງ ສູນສົ່ງເສີມຄວາມສະເໝີພາບລະຫວ່າງຍິງ-ຊາຍ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ (ສູນ GEVAW) ເຊິ່ງແມ່ນຂີດໝາຍອັນສຳຄັນໃນການຕອບໂຕ້ ແລະ ລົບລ້າງຄວາມຮຸນແຮງຕໍ່ແມ່ຍິງໃນ ສປປ ລາວ.  ສ. ເກົາຫຼີ ແລະ ອົງກອນຮ່ວມມືສາກົນ ສ.ເກົາຫລີ (KOICA) ຈະສືບຕໍ່ໃຫ້ການສະໜັບສະໜູນ ແລະ ຢືນຄຽງຂ້າງ ສປປ ລາວ ເພື່ອຕໍ່ສູ້ ຕ້ານຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ບັນລຸຄວາມສະເໝີພາບລະຫວ່າງຍິງ-ຊາຍ ໂດຍອີງໃສ່ ຜົນໄດ້ຮັຂອງໂຄງການຄັນຮົ່ມ.

ທ່ານ ບັກໂຮເດຍ ເບີຄະນອ໋ຟ (Bakhodir Burkhanov), ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ກ່າວວ່າ:

ອົງການສະຫະປະຊາຊາດ ໃຫ້ຄຳໝັ້ນສັນຍາວ່າຈະສືບຕໍ່ຮ່ວມມືຢ່າງແໜ້ນແຟ້ນກັບລັດຖະບານແຫ່ງ ສປປ ລາວ ແລະ ທຸກພາກສ່ວນກ່ຽວຂ້ອງ ເພື່ອສ້າງອະນາຄົດໃຫ້ ແມ່ຍິງ ແລະ ເດັກຍິງ ສາມາດດຳລົງຊີວິດໄດ້ໂດຍປາສະຈາກຄວາມຢ້ານກົວຕໍ່ຄວາມຮຸນແຮງ. ຂໍ້ຕົກລົງວ່າດ້ວຍອະນາຄົດ ແມ່ນໄດ້ຖືກຮັບຮອງເອົາໃນວ່າງບໍ່ດົນມານີ້ ໂດຍບັນດາຜູ້ນຳລະດັບໂລກ ລວມທັງ ສປປ ລາວ, ເຊິ່ງໄດ້ຢັ້ງຢືນຄືນ ເຖິງຄວາມສໍາຄັນໃນການລົບລ້າງການຈຳແນກ ແລະ ຄວາມຮຸນແຮງທຸກຮູບແບບ ຕໍ່ແມ່ຍິງ ແລະ ເດັກຍິງ, ຂໍ້ຕົກລົງບໍ່ພຽງແຕ່ເປັນການປົກປ້ອງສິດພື້ນຖານຂອງພວກເຂົາ, ແຕ່ຍັງເປັນການສ້າງຊຸມຊົນທີ່ມີຄວາມຢືດຢຸ່ນ, ສະເໝີພາບ ເພື່ອໃຫ້ທຸກຄົນສືບຕໍ່ສາມາດພັດທະນາຕົນເອງໄດ້

ພະນະທ່ານ ມາກ ແກລາເຈີ (Mark Gallagher), ເອກອັກຄະລັດຖະທູດ ແລະ ຫົວໜ້າຄະນະຜູ້ແທນສະຫະພາບເອຣົບ ປະຈໍາ ສປປ ລາວ

ຄວາມສະເໝີພາບລະຫວ່າງຍິງ-ຊາຍ ບໍ່ແມ່ນພຽງເປົ້າໝາຍເທົ່ານັ້ນ; ແຕ່ມັນແມ່ນສິດທິພື້ນຖານ ແລະ ຄວາມຮັບຜິດຊອບຮ່ວມກັນ, ເປັນໃຈກາງໃນການບັນລຸເປົ້າໝາຍການພັດທະນາແບບຍືນຍົງໃນປີ 2030. ພິທີໃນມື້ນີ້ ເປັນທັງການສະເຫຼີມສະຫຼອງຄວາມຄືບໜ້າ ແລະ ເປັນທັງການຮຽກຮ້ອງໃຫ້ມີການປະຕິບັດ. ພວກເຮົາຕ້ອງເພີ່ມທະວີຄວາມພະຍາຍາມຂຶ້ນຕື່ມອີກ ເພື່ອລົບລ້າງຄວາມຮຸນແຮງບົນພື້ນຖານທາງເພດ (GBV), ຂະຫຍາຍແຜນງານສຸຂະພາບຈະເລີນພັນ ແລະ ເສີມຂະຫຍາຍໂອກາດດ້ານການສຶກສາ ແລະ ດ້ານເສດຖະກິດ ໃຫ້ແກ່ແມ່ຍິງ ແລະ ເດັກຍິງ ເພື່ອຮັບປະກັນວ່າພວກເຂົາສາມາດດຳລົງຊີວິດຕາມເສັ້ນທາງທີ່ເຂົາເຈົ້າເລືອກເອງ

ພະນະທ່ານ ນາງ ເບັນນິຕາ ຊຳເມີວິວ (Benita Sommerville),  ຮອງ ເອກອັກຄະລັດຖະທູດ ອົດສະຕຣາລີ ປະຈໍາ ສປປ ລາວ ກ່າວວ່າ:

ລັດຖະບານອົດສະຕຣາລີ ມຸ່ງໝັ້ນທີ່ຈະບັນລຸຄວາມສະເໝີພາບລະຫວ່າງຍິງ-ຊາຍ ແລະ ຢຸດຕິຄວາມຮຸນແຮງບົນພື້ນຖານທາງເພດທຸກຮູບແບບ. ເພື່ອບັນລຸຄວາມສະເໝີພາບລະຫວ່າງຍິງ-ຊາຍ, ຜູ້ຊາຍຕ້ອງຢຸດຕິການໃຊ້ຄວາມຮຸນແຮງຕໍ່ແມ່ຍິງ, ເພື່ອໃຫ້ແມ່ຍິງມີຄວາມປອດໄພ ແລະ ຮູ້ສຶກປອດໄພ - ຢູ່ເຮືອນ, ຢູ່ໂຮງຮຽນ, ຢູ່ບ່ອນເຮັດວຽກ, ຢູ່ໃນຊຸມຊົນຂອງເຂົາເຈົ້າ ແລະ ຢູ່ທາງອອນລາຍ. ລັດຖະບານອົດສະຕຣາລີ ໃຫ້ຄຳໝັ້ນສັນຍາວ່າ ຈະຈັດຕັ້ງປະຕິບັດບັນດາການສະໜັບສະໜູນຕ່າງໆຢ່າງມີປະສິດທິຜົນ ເພື່ອຊ່ວຍຢຸດຕິການໃຊ້ຄວາມຮຸນແຮງຕໍ່ແມ່ຍິງ. ນະໂຍບາຍວ່າດ້ວຍການພັດທະນາສາກົນ ຂອງປະເທດອົດສະຕາລີ ເນັ້ນໜັກເຖິງຄວາມຈຳເປັນໃນການແກ້ໄຂ, ປ້ອງກັນ ແລະ ຕອບໂຕ້ ຕໍ່ຄວາມຮຸນແຮງບົນພື້ນຖານທາງເພດ, ເພື່ອສ້າງພາກພື້ນຂອງພວກເຮົາ ໃຫ້ມີຄວາມສັນຕິພາບ, ໝັ້ນຄົງ, ແລະ ຈະເລີນຮຸ່ງເຮືອງ. ພວກເຮົາພູມໃຈທີ່ໄດ້ເຮັດວຽກ ຄຽງບ່າຄຽງໄຫຼ່ ກັບລັດຖະບານລາວ ແລະ ຄູ່ຮ່ວມງານ ຂອງພວກເຮົາ ເພື່ອຕ້ານຄວາມຮຸນແຮງບົນພື້ນຖານທາງເພດ ແລະ ເພື່ອບັນລຸສິດທິ ແລະ ກຽດສັກສີຂອງແມ່ຍິງ ແລະ ເດັກຍິງ.

ພິທີຍ້ອມໄຟປະຕູໄຊໃຫ້ເປັນສີສົ້ມ ແມ່ນການເປີດຂະບວນການເຄື່ອນໄຫວຢ່າງຂັນແຂງ ຂອງລັດຖະບານຢ່າງເປັນທາງການ  ເພື່ອດຳເນີນການເຄື່ອນໄຫວເປັນເວລາ 16 ວັນ, ເລີ່ມແຕ່ ວັນສາກົນ ເພື່ອລົບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນວັນທີ 25 ພະຈິກ ຈົນເຖິງ ວັນສິດທິມະນຸດ ໃນວັນ 10 ທັນວາ. ຂະບວນການດັ່ງກ່າວຈະປະກອບດ້ວຍບັນດາກິດຈະກໍາສົ່ງເສີມຕ່າງໆ, ລວມທັງການສໍາມະນາ, ການໂຄສະນາໂດຍສື່ມວນຊົນ ແລະ ການເປີດເວທີສົນທະນາສາທາລະນະໃນຫົວຂໍ້ທີ່ສໍາຄັນເຊັ່ນ: ຄວາມສໍາຄັນຂອງສຸຂະພາບຈິດ ສໍາລັບຜູ້ລອດຊີວິດຈາກຄວາມຮຸນແຮງບົນພື້ນຖານທາງເພດ, ພະຍາດ HIV/AIDS ແລະ ສິດທິຂອງຄົນພິການ.

ພາຍຫຼັງພິທີການດັ່ງກ່າວ, ງານສະແດງແຟຊັນໄດ້ຈັດຂຶ້ນ ຢູ່ສວນສາທາລະນະອາຊຽນ ພາຍໃຕ້ຄໍາຂວັນ “ເວທີແຫ່ງຄວາມເຂັ້ມແຂງ” ເຊິ່ງໄດ້ມີການສະແດງໃຫ້ເຫັນເຖິງ ຫຼາກຫຼາຍຮູບແບບຄວາມຮຸນແຮງ, ພ້ອມທັງເປັນການເຜີຍແຜ່ໂຄສະນາ ເພື່ອສ້າງຄວາມເຄົາລົບດ້ານສິດທິ ແລະ ການມີສ່ວນຮ່ວມຂອງແມ່ຍິງທຸກຄົນ, ລວມທັງຜູ້ພິການ, ແມ່ຍິງຈາກເຂດຊົນນະບົດ ແລະ ຊົນເຜົ່າ ແລະ ສະມາຊິກຂອງກຸ່ມເພດທາງເລືອກ (LGBTQIA+).

ຂະບວນການ 16 ວັນແຫ່ງການເຄື່ອນໄຫວ ແມ່ນເວທີທີ່ເຂັ້ມແຂງໃນການປູກຈິດສໍານຶກ, ຊຸກຍູ້ການສົນທະນາ ແລະ ຊຸກຍູ້ການເຄື່ອນໄຫວທີ່ມີໝາກຜົນເປັນຮູບຮ່າງ ເພື່ອລົບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ. ຂະບວນການດັ່ງກ່າວ ຍັງເປັນການຮຽກຮ້ອງໃຫ້ມີຄວາມສາມັກຄີ ແລະ ຮ່ວມແຮງຮ່ວມໃຈເຄື່ອນໄຫວນໍາກັນ, ໂດຍການເຮັດວຽກຮ່ວມກັນ ຢ່າງເອກະພາບປອງດອງ ເພື່ອສ້າງອະນາຄົດທີ່ມີຄວາມປອດໄພ, ຄວາມສະເໝີພາບ ແລະ ກຽດສັກສີໃຫ້ແກ່ແມ່ຍິງ ແລະ ເດັກຍິງທຸກຄົນໃນ ສປປ ລາວ.