“ການບໍລິການສຸຂະພາບທາງໂທລະສັບເຮັດໃຫ້ມີຄວາມສະດວກໃນການເຊື່ອມຕໍ່ກັບຄົນເຈັບ ແລະ ການໃຫ້ຄໍາປຶກສາແກ່ເຂົາເຈົ້າ. ພວກເຮົາຍັງສາມາດໝັ້ນໃຈໄດ້ວ່າພວກເຂົາຖືກນຳສົ່ງໄປໂຮງໝໍ ທັນເວລາໃນກໍລະນີສຸກເສີນ. ນອກຈາກນັ້ນ, ການບໍລິການສຸຂະພາບທາງໂທລະສັບ ຍັງເປັນວິທີທີ່ດີທີ່ຈະສືບຕໍ່ໃຫ້ບໍລິການດ້ານສຸຂະພາບໃນໄລຍະ COVID-19 ເພື່ອຫຼຸດຜ່ອນຄວາມສ່ຽງຕໍ່ການຕິດເຊື້ອ ແລະ ການແຜ່ເຊື້ອ. ” ກ່າວໂດຍທ່ານໝໍ ຈຸນອຸມຶນ.

ທ່ານໝໍ ຈຸນອຸມຶນ ອາຍຸ 32 ປີ, ຜູ້ຊ່ຽວຊານປະສູດພະຍາດຍິງ  ຢູ່ໂຮງໝໍແຂວງເຊກອງ, ໄດ້ເຂົ້າຮ່ວມການຝຶກອົບຮົມກ່ຽວກັບ ການບໍລິການສຸຂະພາບທາງໂທລະສັບ ໂດຍກົມບຸກຄະລາກອນການແພດ, ກະຊວງສາທາລະນະສຸກ ໂດຍໄດ້ຮັບການສະໜັບສະໜູນຈາກ ອົງການ ສະຫະປະຊາຊາດກອງທຶນສຳລັບປະຊາກອນ UNFPA.

ພາຍໃນເດືອນທັນວາ ປີ 2021 ໄດ້ມີຜູ້ໃຫ້ບໍລິການດ້ານສຸຂະພາບຕື່ມອີກ 152 ຄົນຈາກແຂວງເຊກອງ, ໄຊຍະບູລີ, ຜົ້ງສາລີ ແລະ ແຂວງວຽງຈັນ ທີ່ເຂົ້າຮ່ວມການຝຶກອົບຮົມດັ່ງກ່າວ. ຜູ້ໃຫ້ບໍລິການດ້ານສຸຂະພາບດັ່ງກ່າວແມ່ນໄດ້ເຮັດວຽກຢູ່ໃນສູນກັກກັນ ແລະ ສະຖານທີ່ແຍກປ່ຽວນັບຕັ້ງແຕ່ການລະບາດຂອງ COVID-19. ການຝຶກອົບຮົມໄດ້ສຸມໃສ່ການນໍາໃຊ້ ການບໍລິການສຸຂະພາບທາງໂທລະສັບ ເປັນແນວທາງໃນການໃຫ້ບໍລິການທີຈຳເປັນພື້ນຖານ ສຸຂະພາບຈະເລີນພັນ, ແມ່, ເດັກເກີດໃໝ່, ເດັກນ້ອຍ, ແລະ ໄວໜຸ່ມ (RMNCAH), ລວມທັງຂໍ້ມູນການປົກປ້ອງ ແລະ ການປ້ອງກັນ COVID-19 ໃນສະຖານທີ່ບໍລິການເຫຼົ່ານັ້ນ.

ກອງປະຊຸມແບບມີສ່ວນຮ່ວມນີ້ ລວມມີລະບົບການສົ່ງຕໍ່, ການບໍລິການວາງແຜນຄອບຄົວ, ການບັນທຶກເອກະສານ, ການຝາກທ້ອງ, ການເກີດລູກ, ການເບິ່ງແຍງຫຼັງເກີດ, ສຸຂະພາບຈິດ, ແລະ ທັກສະການໃຫ້ຄໍາປຶກສາ, ລວມທັງການສະແດງບົດບາດສົມມຸດ.

ໃນໄລຍະທີ່ຜ່ານມາ, ກະຊວງສາທາລະນະສຸກ ແລະ ອົງການ UNFPA  ໄດ້ຈັດອົບຮົມໃຫ້ແກ່ຜູ້ໃຫ້ບໍລິການດ້ານສຸຂະພາບ  ຈາກ 6 ແຂວງພາກກາງ ແລະ ພາກໃຕ້ ເມື່ອມີຈຳນວນແຮງງານເພດຍິງກັບຄືນບ້ານເພີ່ມຂຶ້ນສູງ. ການສ້າງຂີດຄວາມສາມາດນີ້ ແລະ ການສະໜອງ ອຸປະກອນ ການບໍລິການສຸຂະພາບທາງໂທລະສັບ  ໄດ້ປະກອບສ່ວນໃນການຮັບປະກັນການຕອບສະໜອງ ແລະ ຄວາມຕໍ່ເນື່ອງຂອງການບໍລິການ RMNCAH ໃນຂະນະທີ່ປ້ອງກັນຜູ້ໃຫ້ບໍລິການສຸຂະພາບ ແລະ ຄົນເຈັບໃຫ້ປອດໄພໃນໄລຍະທີ່ມີການລະບາດ.

ການນຳໃຊ້ການບໍລິການ RMNCAH ທີ່ຈຳເປັນທາງດ້ານດິຈິຕອລ ໄດ້ທົດລອງໃນປີ 2020 ແລະ ໄດ້ເຫັນຜົນຕອບຮັບທີ່ດີ ເນື່ອງຈາກຫຼາຍກວ່າ 80% ຂອງປະຊາກອນລາວມີໂທລະສັບມືຖື (ການສຳຫຼວດພົນລະເມືອງ, 2015); ນະວັດຕະກໍານີ້ເຮັດໃຫ້ຄົນເຈັບ ແລະ ຜູ້ໃຫ້ບໍລິການດ້ານສຸຂະພາບໃກ້ຊິດກັນກວ່າແຕ່ກ່ອນ. ມັນສະໜອງການຊ່ວຍເຫຼືອໄວ ແລະ ທັນທີທັນໃດແກ່ແມ່ຍິງ, ໂດຍສະເພາະໃນເວລາທີ່ວິກິດການ.

ການໃຫ້ການບໍລິການ RMNCAH ທີ່ສຳຄັນໃນເຂດຊົນນະບົດ ແລະ ເຂດຫ່າງໄກສອກຫຼີກ ເປັນສິ່ງທ້າທາຍອັນໃຫຍ່ຫຼວງໃນ ສປປ ລາວ. ແມ່ຍິງຫຼາຍຄົນຢູ່ໃນເຂດຫ່າງໄກສອກຫຼີກ ບໍ່ສາມາດເຂົ້າເຖິງສະຖານທີ່ບໍລິການສຸຂະພາບ ຫຼື ມີຄວາມຫຍຸ້ງຍາກໃນການເຂົ້າເຖິງ ເນື່ອງຈາກໄລຍະທາງໄກ ແລະ ຂາດການຂົນສົ່ງ, ແລະ ອື່ນໆ. ການປິດເມືອງ ແລະ ຜົນກະທົບທີ່ກີດຂວາງການບໍລິການ RMNCAH ເນື່ອງຈາກ COVID-19 ໄດ້ເຮັດໃຫ້ສະຖານະການຮ້າຍແຮງຂຶ້ນ.

ພະຍາດໂຄວິດ 19 ຍັງໄດ້ກີດຂວາງຄວາມຄືບໜ້າຂອງຕົວຊີ້ວັດເຊັ່ນ: ການນໍາໃຊ້ຢາຄຸມກໍາເນີດທີ່ຫຼຸດລົງ 15% ໃນປີ 2021, ເຮັດໃຫ້ຈໍານວນການຖືພາທີ່ບໍ່ຕ້ອງການເພີ່ມຂຶ້ນ, ແມ່ຍິງທີ່ຊອກຫາການດູແລຫຼັງການລຸລູກເພີ່ມຂຶ້ນ ຍ້ອນອາການສົນຂອງການລຸລູກທີ່ບໍ່ປອດໄພ ແລະ ການເກີດລູກກ່ອນກຳນົດຍັງເພີ່ມຂຶ້ນເນື່ອງຈາກການຫຼຸດລົງຂອງການເຂົ້າເຖິງການດູແລກ່ອນເກີດ. ບໍລິການສຸຂະພາບທາງໂທລະສັບ ເຊື່ອມຕໍ່ແມ່ຍິງກັບຜູ້ໃຫ້ບໍລິການດ້ານສຸຂະພາບ ທຸກທີ່ທູກເວລາທີ່ເຂົາຕ້ອງການ.

ໃນຂະນະທີ່ ການບໍລິການສຸຂະພາບທາງໂທລະສັບ ເປັນບາດກ້າວທີ່ທີ່ສໍາຄັນໃນການຕອບໂຕ້ການລະບາດຂອງພະຍາດ COVID-19 ຂອງຂະແໜງການສາທາລະນະສຸກ, ມັນກໍ່ຮຽກຮ້ອງໃຫ້ມີການປັບປຸງເພື່ອຜັນຂະຫຍາຍໃຫ້ກວມເອົາແມ່ຍິງໄວຈະເລີນພັນທຸກຄົນໃ, ໂດຍສະເພາະກຸ່ມທີ່ມີຄວາມສ່ຽງ ແລະ ຜູ້ດ້ອຍໂອກາດ. “ພວກເຮົາຕ້ອງຄຳນຶງເຖິງຜູ້ທີ່ບໍ່ມີໂທລະສັບມືຖື ຫຼື ສະມາດໂຟນ, ແລະ ກຸ່ມຊົນເຜົ່າທີ່ບໍ່ໄດ້ເວົ້າພາສາລາວ ເຊັ່ນຕົວຢ່າງ: ຢູ່ແຂວງເຊກອງ ແມ່ນມີຫຼາຍຊົນເຜົ່າ, ກ່າວໂດຍທ່ານໝໍ ຈຸນອຸມຶນ, ເຊິ່ງໄດ້ສະເໜີໃຫ້ສ້າງເຄື່ອງມື ແລະ ຊ່ອງທາງສື່ສານທີ່ຫຼາກຫຼາຍເພື່ອຜ່ານຜ່າສິ່ງກີດຂວາງດ້ານພາສາ.

ໂດຍການຮັບຮູ້ເຖິງການປັບປຸງ, ການບໍລິການສຸຂະພາບທາງໂທລະສັບ ສ່ອງແສງເຖິງອະນາຄົດຂອງການບໍລິການຈຳເປັນພື້ນຖານ RMNCAH ໃນຊຸມຊົນໃນທຸກສະຖານະການບໍ່ວ່າຈະມີຫຼືບໍ່ມີວິກິດກໍ່ຕາມ. ການລົງທຶນເພີ່ມເຕີມແມ່ນມີຄວາມຈຳເປັນ ເພື່ອສະໜັບສະໜູນກະຊວງສາທາລະນະສຸກ ໃນການຂະຫຍາຍການບໍລິການສຸຂະພາບທາງໂທລະສັບ ໄປສູ່ບັນດາແຂວງອື່ນໆ, ເພື່ອໃຫ້ແມ່ຍິງ ແລະ ໄວໜຸ່ມຍິງສາມາດເຂົ້າເຖິງການບໍລິການສຸຂະພາບທີ່ຈຳເປັນພື້ນຖານ, ບໍ່ພຽງແຕ່ໃນໄລຍະການແຜ່ລະບາດຂອງພະຍາດໂຄວິດ 19 ເທົ່ານັ້ນ, ແຕ່ຍັງລວມທັງໄລຍະສະພາບນໍ້າຖ້ວມຕາມລະດູການ ແລະ ສຳລັບເຂດທີ່ມີຄວາມຫຍຸ້ງຍາກໃນການເຂົ້າເຖິງ. ອົງການUNFPA ຈະສືບຕໍ່ໃຫ້ການສະໜັບສະໜູນແກ່ກະຊວງສາທາລະນະສຸກ ເພື່ອຮັບປະກັນໃຫ້ທຸກຄົນສາມາດເຂົ້າເຖິງສິດທິ ແລະ ສຸຂະພາບທາງເພດ ແລະ ສຸຂະພາບຈະເລີນພັນທີ່ມີຄຸນນະພາບຢ່າງທົ່ວເຖິງ.

***************

UNFPA ແມ່ນໜ່ວຍງານດ້ານສຸຂະພາບທາງເພດ ແລະ ສຸຂະພາບຈະເລີນພັນຂອງອົງການສະຫະປະຊາຊາດ, ເຮັດວຽກຢູ່ໃນຫຼາຍກວ່າ 150 ປະເທດ ລວມທັງ ສປປ ລາວ, ເພື່ອບັນລຸເປົ້າໝາຍການເສຍຊີວິດຂອງແມ່ໃຫ້ເປັນສູນ, ຄວາມຕ້ອງການໃນການວາງແຜນຄອບຄົວທີ່ບໍ່ໄດ້ຮັບການຕອບສະໜອງໃຫ້ເປັນສູນ, ແລະ ຄວາມຮຸນແຮງທາງເພດໃຫ້ເປັນສູນ.

ສໍາລັບຂໍ້ມູນເພີ່ມເຕີມກະລຸນາຕິດຕໍ່:

ທ່ານ ນາງ ສິລິພອນ ສະກຸນຄູ ຜູ້ປະສານງານໂຄງການ SRH

UNFPA ສປປ ລາວ

ອີເມວ: ssakulku@unfpa.org

ນາງ ວັນລີ ລໍກ່ວາງມິງ

ນັກວິເຄາະດ້ານການສື່ສານ ແລະ ການຮ່ວມມື

UNFPA ສປປ ລາວ

ອີເມວ: lorkuangming@unfpa.org