ນະຄອນຫຼວງວຽງຈັນ ວັນທີ 26 ກັນຍາ 2022. ເພື່ອສະເຫຼີມສະຫຼອງວັນຄຸມກຳເນີດໂລກໃນປີນີ້, ກະຊວງສາທາລະນະສຸກ, ອົງການສະຫະປະຊາຊາດກອງທຶນສໍາລັບປະຊາກອນ (UNFPA) ແລະ ບັນດາຄູ່ຮ່ວມງານ ໄດ້ເຕົ້າໂຮມກັນທີ່ເດີ່ນພຣະທາດຫຼວງ ເຊິ່ງເປັນສະຖານທີ່ສຳຄັນໃນນະຄອນຫຼວງວຽງຈັນ ໃນງານແລ່ນສາມັກຄີ ຈັດຂຶ້ນໃນຕອນເຊົ້າຂອງ ວັນທີ 24 ກັນຍາ 2022. ນັກແລ່ນຫຼາຍພັນຄົນມີໜ້າຢູ່ໃນງານ ເພື່ອຮ່ວມກັນເປັນສັກຂີພະຍານຕໍ່ຄວາມສໍາຄັນຂອງການຕັດສິນໃຈຂອງແມ່ຍິງ ທີ່ຈະຖືພາໂດຍຕັ້ງໃຈ, ບໍ່ແມ່ນໂດຍບັງເອີນ ເພື່ອຫຼຸດຜ່ອນການຕາຍຂອງແມ່.
ທ່ານ ປອ ໄພວັນ ແກ້ວປະເສີດ ຮອງລັດຖະມົນຕີກະຊວງສາທາລະນະສຸກ ກ່າວວ່າ: “ຈຸດປະສົງຂອງການຈັດກິດຈະກຳໃນມື້ນີ້ ແມ່ນເພື່ອສະແດງໃຫ້ ຜູ້ວາງນະໂຍບາຍ, ໄວໜຸ່ມ, ແມ່ຍິງ ແລະ ຜູ້ຊາຍ ໄດ້ເຫັນເຖິງຄວາມສຳຄັນຂອງການຄຸມກຳເນີດ ແລະ ຜົນໄດ້ຮັບຈາກການລົງທຶນດ້ານການວາງແຜນຄອບຄົວ.”
“ພວກເຮົາຕ້ອງເຂົ້າໃຈເປັນເອກະພາບກັນວ່າ ການວາງແຜນຄອບຄົວບໍ່ແມ່ນການຈຳກັດຈຳນວນລູກ ແຕ່ຈຸດສຸມແມ່ນເພື່ອປົກປ້ອງສຸຂະພາບຂອງ ແມ່ຍິງ ແລະ ເດັກນ້ອຍ. ແມ່ຍິງສາມາດມີລູກໄດ້ຕາມຄວາມຕ້ອງການ, ແຕ່ຕ້ອງມີໄລຍະຫ່າງ 2 ປີຂື້ນໄປ ເພື່ອໃຫ້ແມ່ຍິງໄດ້ມີການຟື້ນຟູສຸຂະພາບຮ່າງກາຍ ແລະ ເດັກໃຫ້ແຂງແຮງ, ປະຢັດຄ່າໃຊ້ຈ່າຍໃນຄອບຄົວ, ມີເວລາໃນການທຳມາຫາກິນ ແລະ ສ້າງເສດຖະກິດຄອບຄົວ. ນອກນັ້ນ ການຄຸມກໍາເນີດ ກໍ່ຍັງເໝາະສຳລັບຜູ້ທີບໍ່ພ້ອມຈະມີລູກ ຫຼື ມີລູກພຽງພໍແລ້ວ.”
ທ່ານນາງ ມາຣຽມ ເອ ຄານ, ຜູ້ຕາງໜ້າອົງການ UNFPA ປະຈຳ ສປປ ລາວ, ກ່າວວ່າ, “ການຄຸມກຳເນີດ ຫຼື ການວາງແຜນຄອບຄົວ ແມ່ນຄວາມຮັບຜິດຊອບຮ່ວມຂອງທັງຍິງ ແລະ ຊາຍ. ຄວາມສາມາດຂອງແມ່ຍິງໃນການຕັດສິນວ່າ ເມື່ອໃດທີ່ນາງຕ້ອງການມີລູກ ແລະ ຕ້ອງການມີລູກຈັກຄົນ ອາດເປັນປັດໄຈສຳຄັນທີ່ສຸດທີ່ຊີ້ຊະຕາຊີວິດຂອງນາງ. ແມ່ຍິງ ຫຼື ເດັກຍິງ ຍິ່ງມີຄວາມສ່ຽງຫຼາຍ ເຊັ່ນ ລະດັບການສຶກສາບໍ່ສູງ, ຄວາມທຸກຍາກ, ຄວາມພິການ, ບໍ່ເວົ້າພາສາກາງ, ຍິ່ງເຮັດໃຫ້ ສຸຂະພາບຈະເລີນພັນ ແລະ ສຸຂະພາບທາງເພດຂອງພວກເຂົາໜ້າເປັນຫ່ວງຫຼາຍຂຶ້ນ, ໂດຍສະເພາະຕໍ່ການຖືພາທີ່ບໍ່ໄດ້ວາງແຜນ ເຊິ່ງເປັນສິ່ງກີດຂວາງຕໍ່ໂອກາດອື່ນໆໃນຊີວິດຂອງນາງ.”
ການຖືພາທີ່ບໍ່ໄດ້ວາງແຜນ ອາດຈະບໍ່ເປັນທີ່ບໍ່ຕ້ອງການສະເໝີໄປ. ມີຫຼາຍກໍລະນີການຖືພາທີ່ບໍ່ໄດ້ວາງແຜນ ກໍ່ມີການຊ່ວຍເຫຼືອ. ແຕ່ກໍ່ມີອີກຫຼາຍກໍລະນີ ທີ່ການຖືພາໂດຍບໍ່ໄດ້ວາງແຜນຈະຈົບລົງທີ່ການເອົາລູກອອກທີ່ບໍ່ປອດໄພ. ການເອົາລູກອອກທີ່ບໍ່ປອດໄພແມ່ນໜຶ່ງໃນສາເຫດຫຼັກຂອງການຕາຍຂອງແມ່ໃນທົ່ວໂລກ. ມີຫຼາຍກໍລະນີ ການຖືພາໂດຍບໍ່ໄດ້ຕັ້ງໃຈເກີດຂຶ້ນ ເນື່ອງຈາກແມ່ຍິງບໍ່ມີເອກະລາດໃນການຕັດສິນໃຈກ່ຽວກັບຮ່າງກາຍຂອງຕົນເອງ. ສະນັ້ນ ການເຂົ້າເຖິງການຄຸມກຳເນີດທີ່ທັນສະໄໝ ຈະຊ່ວຍຮັກສາ ແລະ ປ່ຽນຊີວິດຂອງແມ່ຍິງ, ຄອບຄົວ, ຊຸມຊົນ ແລະ ສັງຄົມຂອງເຂົາເຈົ້າ.
ການບັນລຸເປົ້າໝາຍການວາງແຜນຄອບຄົວ ແລະ ໂພຊະນາການຢ່າງເຕັມທີ່ ພ້ອມທັງ ວຽກງານປົກປ້ອງສຸຂະພາບແມ່, ເດັກເກີດໃໝ່, ເດັກ ແລະ ເຍົາວະຊົນ (RMNCAH) ໃນ ສປປ ລາວ ຮອດປີ 2030 ແມ່ນສາມາດເຮັດໃຫ້ໄດ້ ແລະ ສາມາດສ້າງຜົນຕອບແທນທາງດ້ານເສດຖະກິດໄດ້ 6 ໂດລາ ສະຫະລັດ ຕໍ່ການລົງທຶນທຸກໆ 1 ໂດລາ (ອັດຕາສ່ວນຜົນປະໂຫຍດຕໍ່ຕົ້ນທຶນ = 6:1).
ໃນວຽກງານ RMNCAH ແລະ ໂພຊະນາການ, ຜົນຕອບແທນສູງສຸດຈາກການລົງທຶນ ແມ່ນຜ່ານວິທີການວາງແຜນຄອບຄົວທີ່ອີງໃສ່ສິດທິ ທີ່ມີຢູ່ໃນທຸກແຂວງເພື່ອຫຼຸດຜ່ອນການຖືພາທີ່ບໍ່ໄດ້ຕັ້ງໃຈ. ການຫຼີກລ່ຽງການຖືພາໂດຍບໍ່ຕັ້ງໃຈ ສາມາດຫຼຸດຜ່ອນການຕາຍຂອງແມ່ ແລະ ການຕາຍຂອງເດັກ ແລະ ການເອົາລູກອອກທີ່ບໍ່ປອດໄພ. ນອກນັ້ນຍັງສາມາດຫຼຸດຄ່າໃຊ້ຈ່າຍດ້ານສຸຂະພາບອື່ນໆ ແລະ ສ້າງຜົນປະໂຫຍດທາງດ້ານເສດຖະກິດ ຈາກການມີສ່ວນຮ່ວມຂອງກໍາລັງແຮງງານທີ່ເພີ່ມຂຶ້ນ, ການໄດ້ຮຽນຕໍ່ຂອງໄວໜຸ່ມຍິງ, ແລະ ການເພີ່ມຂຶ້ນຂອງລາຍຮັບຕະຫຼອດຊີວິດຂອງແມ່ຍິງ. ການຂະຫຍາຍການວາງແຜນຄອບຄົວຍັງສາມາດປັບປຸງໂພຊະນາການ ແລະ ຫຼຸດຜ່ອນອັດຕາທີ່ບໍ່ໄດ້ມາດຕະຖານ.
***************
ອົງການ UNFPA ແມ່ນໜ່ວຍງານໜຶ່ງຂອງອົງການສະຫະປະຊາຊາດທີ່ເຮັດວຽກໃນດ້ານ ສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ ລວມທັງ ສປປ ລາວ. ມີເປົ້າໝາຍໃນການຫຼຸດການຕາຍຂອງແມ່ທີ່ສາມາດປ້ອງກັນໄດ້ໃຫ້ເປັນ 0, ຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງໃຫ້ເປັນ 0, ຄວາມຮຸນແຮງບົນພື້ນຖານທາງເພດ ໃຫ້ເປັນ 0.
ສໍາລັບຂໍ້ມູນເພີ່ມຕື່ມ, ກະລຸນາຕິດຕໍ່:
ສິຣິພອນ ສະກຸນຄູ
ຜູ້ປະສານງານ ແຜນງານສຸຂະພາບທາງເພດ ແລະ ສຸຂະພາບຈະເລີນພັນ
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: ssakulku@unfpa.org
ວັນນະແສງ ອິນສານ
ຫົວໜ້າໜ່ວຍງານສື່ສານ ແລະ ການຮ່ວມມື
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: insal@unfpa.org
