ໃນວັນທີ 8 ພະຈິກ 2024, ທີ່ນະຄອນຫຼວງວຽງຈັນ: ສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ຮ່ວມກັບ ອົງການສະຫະປະຊາຊາດ ກອງທຶນສຳລັບປະຊາກອນ ໃນ ສປປ ລາວ (UNFPA) ໄດ້ຈັດກອງປະຊຸມລະດົມການສ່ວນຮ່ວມຂອງບັນດາພາກສວ່ນກຽ່ວຂ້ອງແນໃສ່ ເສີມຂະຫຍາຍ ການກະກຽມ ຄວາມພ້ອມ ໃນວຽກງານສຳຫຼວດ ພົນລະເມືອງ ແລະ ທີ່ຢູ່ອາໄສຄັ້ງທີ V ຂອງ ສປປ ລາວ, ເຊິ່ງຈະຈັດຂື້ນໃນປີ 2025.
ກອງປະຊຸມ ຈັດຂື້ນພາຍໃຕ້ການເປັນປະທານຂອງ ທ່ານ ນາງ ພອນສາລີ ສຸກສະຫວັດ, ຮອງລັດຖະມົນຕີ ແລະ ຫົວໜ້າສູນສະຖິຕິແຫ່ງຊາດໄດ້ຍົກໃຫ້ເຫັນຄວາມຄືບໜ້າອັນສຳຄັນໃນການກະກຽມການຄວາມພ້ອມວຽກງານສຳຫຼວດພົນລະເມືອງ ພ້ອມທັງບັນດາສິ່ງທ້າທາຍ ແລະ ມາດຕະການແກ້ໄຂ ເພື່ອຮັບປະກັນການສຳຫລວດພົນລະເມືອງດຳເນີນໄປດ້ວຍຜົນສຳເລັດ ໃນປີ 2025.
ໃນໄລຍະເຄິ່ງປີ 2024 ທີ່ຜ່ານມາ, ພາຍໃຕ້ການ ສະໜັບສະໜູນຈາກອົງການ UNFPA, ສູນສະຖິຕິແຫ່ງຊາດ ໄດ້ບັນລຸບາດກ້າວສຳຄັນໃນການສ້າງຄູ່ຮ່ວມຍຸດທະສາດໃນການກະກຽມຄວາມພ້ອມສຳຫຼວດພົນລະເມືອງຄັ້ງນີ້ເປັນຕົ້ນແມ່ນ ອົງການຊ່ວຍເຫລືອ ແລະ ພັດທະນາປະເທດສະວິດເຊີແລນ ແລະ ລຸກຊຳບວກ.
ການຮ່ວມມືກັບບັນດາອົງການໃໝ່ເຫຼົ່ານີ້ໄດ້ເປັນສິ່ງ ເສີິມສ້າງການຮ່ວມມືທີ່ມີຢູ່ແລ້ວກັບ USAID ແລະ DFAT ຂອງປະເທດອອສເຕຣເລຍໃຫ້ດີຂຶ້ນກວ່າເກົ່າໂດຍສະເພາ ການສະໜັບສະໜູນທາງການເງິນທີ່ສຳຄັນສຳລັບການກະກຽມ ແລະ ການດຳເນີນປະຕິບັດການສຳຫຼວດພົນລະເມືອງ ແລະ ທີ່ຢູ່ອາໄສ. ນອກຈາກນີ້ ຍັງມີການຊ່ວຍເຫຼືອຈາກ ອົງການຊວຍເຫລືອ ສປ ຈີນ ເຊິ່ງເປັນການຮ່ວມມືໂດຍກົງກັບສູນສະຖິຕິແຫ່ງຊາດ.
ນອກຈາກນີ້, ການຮ່ວມມືກັບພາກລັດ, ພາກເອກະຊົນ, ນັກຊ່ຽວຊານສາກົນ ກໍ່ໄດ້ຮັບການເພີ່ມທະວີຂຶ້ນ, ເຊິ່ງປະກອບສ່ວນເຂົ້າໃນຜົນສຳເລັດຂອງການດຳເນີນການທົດລອງສຳຫຼວດພົນລະເມືອງ ແລະ ທີ່ຢູ່ອາໄສ ໃນຕົ້ນປີນີ້. ຂີດໝາຍສຳຄັນອີກອັນໜຶ່ງ ກໍແມ່ນການສ້າງນະໂຍບາຍດ້ານການສຳຫຼວດທີ່ຮັບປະກັນ ຄວາມສະເໝີພາບ ລະຫວ່າງຍິງ-ຊາຍ.
ໃນບົດກ່າວເປີດກອງປະຊຸມ, ໃນນາມຕາງໜ້າ ສປປ ລາວ, ທ່ານ ນາງ ພອນສາລີ ສຸກສະຫວັດ ໄດ້ສະແດງ ຄວາມຂອບໃຈຕໍ່ UNFPA ແລະ ບັນດາຄູ່ຮ່ວມພັດທະນາ ພ້ອມທັງຂອບໃຈບັນດາກະຊວງທີ່ໄດ້ປະກອບສ່ວນ ເຂົ້າໃນການກະກຽມການສຳຫຼວດພົນລະເມືອງ ແລະ ທີ່ຢູ່ອາໄສຢ່າງຕໍ່ເນື່ອງ.
ນອກນັ້ນຍັງໄດ້ເນັ້ນເຖິງຄວາມສຳຄັນຂອງການສຳຫຼວດພົນລະເມືອງຕື່ມອີກວ່າ ຂໍ້ມູນໄດ້ຈາກການສຳຫຼວດດັ່ງກ່າວຈະເປັນແຫຼ່ງຂໍ້ມູນທີ່ສຳຄັນເພື່ອອະທິບາຍທ່າອ່ຽງດ້ານປະຊາກອນໃນລາວ ແລະ ກຳນົດສະພາບເສດຖະກິດ-ສັງຄົມ ແລະ ຄວາມສ່ຽງຂອງປະຊາກອນລາວ.
ທ່ານນາງກ່າວວ່າ, ຜົນການສຳຫຼວດທີ່ຈະມາເຖິງຍັງຈະມີບົດບາດສຳຄັນໃນການຕິດຕາມ ແລະ ປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີປະຈຸບັນ (2021-2025) ແລະ ວາງທິດທາງໃໝ່ໄລຍະ 2026-2030.
ແລະ ຍັງກ່າວອີກວ່າ ຂໍ້ມູນທີ່ເກັບກຳໄດ້ນັ້ນຈະເປັນຈຸດອ້າງອິງທີ່ສຳຄັນ ໃນການປະເມີນຄວາມຄືບໜ້າຂອງ ສປປ ລາວ ໄປສູ່ເປົ້າໝາຍການພັດທະນາແບບຍືນຍົງ (SDGs), ICPD PoA ແລະ ຄວາມພະຍາຍາມ ທີ່ຫຼຸດພົ້ນຈາກ ສະຖານະພາບປະເທດດ້ອຍພັດທະນາ (LDC).
ທ່ານ ແກມບິດ ຄາບິຣິ, ຜູ້ປະສານງານດ້ານນະໂຍບາຍ ແລະ ການສຳຫຼວດພົນລະເມືອງ ໄດ້ຂຶ້ນກ່າວໃຫ້ຄຳປາໄສໃນນາມຂອງ UNFPA ທີ່ກອງປະຊຸມ, ໂດຍໄດ້ຮຽກຮ້ອງ ໃຫ້ມີຄວາມຮ່ວມ ມືທີ່ເຂັ້ມແຂງຍິ່ງຂຶ້ນ, ການດຳເນີນງານຮ່ວມກັນ ແລະ ການສະໜັບສະໜູນຈາກພາກສ່ວນທີ່ກ່ຽວຂ້ອງ ແລະ ຜູ້ມີສ່ວນຮ່ວມ ທັງໝົດເພື່ອແກ້ໄຂສິ່ງທ້າທາຍ ແລະ ຊ່ອງຫວ່າງທີ່ມີຢູ່ແລ້ວ ເພື່ອໃຫ້ຮັບປະກັນວ່າ ການສຳຫຼວດພົນລະເມືອງ ແລະ ທີ່ຢູ່ອາໄສ ຄັ້ງທີ V ຈະດຳເນີນຕໍ່ໄປ ຢ່າງຄຸ້ມຄ່າ ມີປະສິທິພາບ ແລະ ປະສິທິຜົນ.
ນອກຈາກນີ້, ທ່ານຍັງໄດ້ຢືນຢັນຄືນຄຳໝາຍໝັ້ນຂອງ UNFPA ທີ່ຈະສະໜັບສະໜູນ ສຳນັກງານສູນສະຖິ ຕິຂອງແຫ່ງຊາດ ໃນທຸກດ້ານ ແລະ ໄລຍະຂອງການສຳຫຼວດພົນລະເມືອງ ແລະ ທີ່ຢູ່ອາໄສ ລວມທັງມາດ ຕະການກ່ອນການນັບ, ໄລຍະການນັບ ແລະ ພາຍຫຼັງການນັບຈຳນວນ.
ໂດຍຮັບຮູ້ເຖິງຄວາມຕ້ອງການອັນສຳຄັນຂອງຂໍ້ມູນທີ່ຖືກຕ້ອງ, ທັນເວລາ, ແລະ ເຊື່ອຖືໄດ້, ສປປ ລາວ ໄດ້ເລີ່ມກະກຽມການຝຶກອົບຮົມລະດັບຊາດທີ່ສຳຄັນນີ້ຕັ້ງແຕ່ປີ 2021. ໂດຍໄດ້ຮັບການສະໜັບສະໜູນ ດ້ານວິຊາການຈາກອົງການ UNFPA ແລະ ຜູ້ຊ່ຽວຊານລະດັບຊາດ ແລະ ສາກົນ, ການສຳຫຼວດພົນລະເມືອງ ແລະ ທີ່ຢູ່ອາໄສຈະນຳໃຊ້ເຕັກໂນໂລຊີດີຈີຕອນ, ການນຳໃຊ້ອຸປະກອນມືຖື ແລະ GIS. ການສ້າງແຜນທີ່ເພື່ອຮັບປະກັນການເກັບກໍາຂໍ້ມູນທັນເວລາ ແລະ ຊັດເຈນ.
ພະນັກງານພາກສະໜາມຈຳນວນປະມານ 13.000 ຄົນ ຈະຖືກຄັດເລືອກເພື່ອເກັບກຳຮວບຮວມ ຂໍ້ມູນຈາກ ປະມານ 1,4 ລ້ານຄົວເຮືອນທົ່ວ 18 ແຂວງ; ການສຳຫຼວດພົນລະເມືອງ ແລະ ທີ່ຢູ່ອາໄສຈະເຮັດໜ້າທີ່ເປັນຮາກຖານສຳຄັນ ສຳລັບການວາງແຜນ ແລະ ພັດທະນາປະເທດຊາດໃນອະນາຄົດ.
