ບົດຄວາມຄິດຄວາມເຫັນຂອງບັນນາທິການ ເນື່ອງໃນໂອກາດວັນຜະດຸງຄັນສາກົນ [ວັນທີ 5 ເດືອນພຶດສະພາ ປີ 2023], ໂດຍທ່ານ ບີອອນ ແອນເດີສັນ, ຜູ້ອໍານວຍການ UNFPA ປະຈໍາພາກພື້ນອາຊີ ແລະ ປາຊີຟິກ
ການປັບປຸງສຸຂະພາບຂອງແມ່ ແລະ ເດັກເກີດໃໝ່ແມ່ນພາກສ່ວນໜຶ່ງທີ່ສຳຄັນຂອງເປົ້າໝາຍການພັດທະນາແບບຍືນຍົງ, ເຊິ່ງໃນຖານະປະຊາກອນໂລກ ພວກເຮົາມີຄວາມມຸ່ງໝັ້ນທີ່ຈະຢຸດຕິການເສຍຊີວິດຂອງແມ່ ແລະ ເດັກເກີດໃໝ່ທີ່ສາມາດປ້ອງກັນໄດ້. ສະຫະປະຊາຊາດໄດ້ຍົກໃຫ້ເຫັນຢູ່ສະເໝີກ່ຽວກັບບົດບາດສຳຄັນຂອງຜະດຸງຄັນໃນການບັນລຸເປົ້າໝາຍດັ່ງກ່າວ. ເຖິງວ່າຈະມີຄວາມຈຳເປັນເພື່ອເພີ່ມທະວີການລົງທຶນໃສ່ວຽກງານຜະດຸງຄັນກໍ່ຕາມ, ແຕ່ອາຊີບນີ້ກໍຍັງຂາດທຶນຮອນຢ່າງໜັກໜ່ວງ, ຊຶ່ງ ສົ່ງຜົນສະທ້ອນຢ່າງຮ້າຍແຮງຕໍ່ແມ່, ເດັກ ແລະ ທົ່ວສັງຄົມ.
ໃນທົ່ວໂລກ, ຄວາມຕ້ອງການການດູແລສຸຂະພາບຂອງແມ່ ແລະ ເດັກເກີດໃໝ່ທີ່ມີຄວາມຊໍານິຊໍານານແມ່ນໃຫຍ່ຫຼວງ. ອີງຕາມ ອົງການອະນາໄມໂລກ (WHO), ໃນປີ 2020, ແມ່ຍິງ 287,000 ຄົນເສຍຊີວິດໃນໄລຍະການຖືພາ ແລະ ໄລຍະການເກີດລູກ, ໂດຍ 94% ຂອງການເສຍຊີວິດເຫຼົ່ານີ້ເກີດຂື້ນໃນບ່ອນທີ່ມີຊັບພະຍາກອນຕໍ່າ. ໃນແຕ່ລະມື້, ແມ່ຍິງປະມານ 800 ຄົນເສຍຊີວິດຈາກ ສາເຫດທີ່ສາມາດປ້ອງກັນໄດ້ທີ່ກ່ຽວຂ້ອງກັບການຖືພາ ແລະ ການເກີດລູກ. ຄວາມຈິງທີ່ໂຫດຮ້າຍນີ້ແມ່ນການເຕືອນວ່າ ການລົງທຶນໃນການຜະດຸງຄັນບໍ່ແມ່ນທາງເລືອກເທົ່ານັ້ນ, ແຕ່ແມ່ນຄວາມຈໍາເປັນອັນຮີບດ່ວນ.
ອາທິດແລ້ວນີ້, ຂ້າພະເຈົ້າໄດ້ໄປຢ້ຽມຢາມໂຮງໝໍແມ່ ມາກອຍໃນເຂດຊານເມືອງຊູວາ, ປະເທດ ຟີຈີ - ໂຮງໝໍແມ່ທີ່ນຳພາໂດຍ ຜະດຸງຄັນແຫ່ງທຳອິດໃນປະເທດ. ເຊິ່ງຂ້າພະເຈົ້າຮູ້ສຶກເປັນກຽດທີ່ຈະໄດ້ພົບກັບບັນດາຜະດຸງຄັນຢູ່ທີ່ນັ້ນຊຶ່ງເປັນຜູ້ອຸທິດຊີວິດຂອງຕົນ ເພື່ອຮັບປະກັນວ່າການຖືພາ ແລະ ການເກີດລູກແມ່ນປອດໄພ. ຜະດຸງຄັນມີທັກສະ ແລະ ຄວາມຊ່ຽວຊານໃນການດູແລທີ່ຈໍາເປັນສໍາລັບແມ່ຍິງໃນໄລຍະທີ່ສໍາຄັນໃນຊີວິດຂອງພວກເຂົາ ແລະ ການສືບຕໍ່ລົງທຶນໃສ່ການຍົກລະດັບດ້ານທັກສະ ແລະ ການຝຶກອົບຮົມພວກເຂົາ, ໂດຍສະເພາະໃນການຄຸ້ມຄອງອາການແຊກຊ້ອນໃນໄລຍະການຖືພາ, ແລະ ໄລຍະການເກີດລູກ ແລະ ຫຼັງເກີດລູກ.
ການຂະຫຍາຍຕົວຢ່າງຫຼວງຫຼາຍໃນການດູແລຂອງຜະດຸງຄັນສາມາດຫຼີກລ້ຽງການຕາຍຂອງແມ່ຫຼາຍກວ່າ 40% ພາຍໃນປີ 2035. ເຖິງຢ່າງໃດກໍຕາມອີງຕາມບົດລາຍງານສະຖານະການວຽກງານຜະດຸງຄັນຂອງໂລກ (ປີ 2021), ທົ່ວໂລກພວມປະເຊີນກັບການຂາດແຄນຜະດຸງຄັນ 900,000 ຄົນ, ດ້ວຍກໍາລັງແຮງງານທີ່ມີຢູ່ພາຍໃຕ້ເງື່ອນໄຂທີ່ທ້າທາຍ.
ເພື່ອປິດຊ່ອງຫວ່າງທີ່ສຳຄັນນີ້, ສະຫະປະຊາຊາດ ແລະ ບັນດາຄູ່ຮ່ວມມືໄດ້ເລີ່ມຕົ້ນດຳເນີນຂໍ້ລິເລີ່ມຕ່າງໆເພື່ອເສີມຂະຫຍາຍກຳລັງແຮງງານຜະດຸງຄັນ. ໂຄງການຕ່າງໆ ເຊັ່ນ: ພັນທະມິດເພື່ອປັບປຸງການສຶກສາດ້ານຜະດຸງຄັນ (Alliance to Improve Midwifery Education) ກ້າວໄປສູ່ການບໍລິການສຸຂະພາບທາງເພດ ແລະ ສຸຂະພາບຈະເລີນພັນທີ່ມີຄຸນນະພາບໂດຍການໃຫ້ ຄວາມສຳຄັນຕໍ່ການຝຶກອົບຮົມ, ການສຶກສາ ແລະ ການປະກອບອາຊີບຂອງຜະດຸງຄັນທັງຫຼາຍ.
ຍັງມີຫຼາຍຢ່າງທີ່ຕ້ອງໄດ້ດຳເນີນການ. ປະຊາຄົມໂລກຍັງລົງທຶນບໍ່ພຽງພໍໃສ່ການສຶກສາ, ລະບຽບການ ແລະ ການນຳໃຊ້ ຜະດຸງຄັນໃຫ້ພຽງພໍ, ຍ້ອນວ່າໃນຫຼາຍບ່ອນທີ່ມີຊັບພະຍາກອນຕ່ຳ, ຜະດຸງຄັນໄດ້ຮັບການຝຶກອົບຮົມບໍ່ໄດ້ດີເທົ່າທີ່ຄວນ, ບໍ່ໄດ້ຮັບການສະໜັບສະໜູນ ແລະ ໄດ້ຮັບຄ່າແຮງງານຕ່ຳ.
ນອກຈາກຜົນໄດ້ຮັບດ້ານສຸຂະພາບໂດຍທັນທີສໍາລັບ ແມ່ ແລະ ເດັກແລ້ວ, ກໍາລັງແຮງງານຜະດຸງຄັນທີ່ໄດ້ຮັບການຝຶກອົບຮົມ ແລະ ການສະໜັບສະໜູນທີ່ດີສາມາດເສີມສ້າງລະບົບສາທາລະນະສຸກ ແລະ ປະກອບສ່ວນເຂົ້າໃນການພັດທະນາເສດຖະກິດ. ອີງຕາມທະນາຄານໂລກ, ທຸກໆ 1 ໂດລາທີ່ລົງທຶນໃນການດູແລສຸຂະພາບແມ່ ແລະ ເດັກເກີດໃໝ່ນໍາເອົາຜົນຕອບແທນ $9 ໃນບັນດາປະເທດທີ່ມີອັດຕາການຕາຍສູງ. ຜະດຸງຄັນຍັງຊ່ວຍສົ່ງເສີມຄວາມສະເໝີພາບລະຫວ່າງຍິງ-ຊາຍ, ຍ້ອນວ່າພວກເຂົາ ມີຈຸດພິເສດເພື່ອສົ່ງເສີມສິດທິຂອງແມ່ຍິງ ແລະ ຄວາມເປັນເອກະລາດທາງຮ່າງກາຍ. ພ້ອມກັນນັ້ນ, ຍັງມີຫຼັກຖານທີ່ສະແດງໃຫ້ເຫັນການລົງທຶນໃສ່ຜະດຸງຄັນ ແລະ ວຽກງານຜະດຸງຄັນສາມາດຊ່ວຍຊີວິດຄົນ ແລະ ຫັນປ່ຽນຊຸມຊົນໄດ້ອີກດ້ວຍ.
ການສ້າງຄວາມເຂັ້ມແຂງໃຫ້ແກ່ຜະດຸງຄັນສາມາດສ້າງຜົນໄດ້ຮັບໃນທາງບວກທີ່ຍືນຍົງໂດຍການຊ່ວຍຊີວິດ, ສ້າງຄອບຄົວທີ່ມີສຸຂະພາບດີຂຶ້ນແລະ ຊຸກຍູ້ຊຸມຊົນໃຫ້ມີຄວາມເຂັ້ມແຂງ. ຮອດເວລາແລ້ວທີ່ເຮົາຕ້ອງຮ່ວມກັນປະຕິບັດຜະດຸງຄັນຢ່າງຕັ້ງໜ້າ.
///****///
ທ່ານ ບີຢອນ ແອນເດີສັນ ຜູ້ອໍານວຍການສຳນັກງານປະຈຳ ພາກພື້ນອາຊີ-ປາຊີຟິກຂອງສະຫະປະຊາຊາດ ກອງທຶນສຳລັບປະຊາກອນ, ອົງການດ້ານສຸຂະພາບທາງເພດ ແລະ ສຸຂະພາບຈະເລີນພັນຂອງສະຫະປະຊາຊາດ.
