ນະຄອນຫຼວງວຽງຈັນ, ວັນທີ 23 ພຶດສະພາ 2022. ແສງຈັນ, ແສ່ວ, ໝອນ, ລອຍ ແລະ ພູວຽງ ເປັນໄວໜຸ່ມຍິງ 5 ຄົນ ທີ່ມາຈາກເມືອງເຊໂປນ, ແຂວງສະຫວັນນະເຂດ. ພວກເຂົາເດີນທາງມາຮອດ ໂຮງແຮມ ຄຣາວ ພລາຊາ ວຽງຈັນ ເພື່ອມາຝຶກງານຢູ່ທີ່ໂຮງແຮມແຫ່ງນີ້ ແລະ ວິທະຍາໄລເຕັກນິກປາກປ່າສັກ ເປັນເວລາ 03 ເດືອນ ເພື່ອຝຶກຝົນທັກສະດ້ານວິຊາຊີບໃນການກະກຽມອາຫານ, ເພີ່ມຄວາມຮູ້ດ້ານການເງິນ ແລະ ຄວາມຮູ້ພື້ນຖານດ້ານການຕະຫຼາດ. ພວກເຂົາຈະຈົບອອກໄປດ້ວຍຄວາມພ້ອມດ້ານທັກສະ ແລະ ຄວາມຮູ້ທີ່ຈະເຮັດວຽກເພື່ອສ້າງລາຍຮັບໃຫ້ຕົນເອງເມື່ອກັບໄປເຊໂປນ.
ສໍາລັບກິດຈະກໍາລິເລີ່ມໃນຄັ້ງນີ້ແມ່ນເກີດຂຶ້ນໄດ້ ຕ້ອງຂອບໃຈການຮ່ວມມືລະຫວ່າງ ອົງການສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA) ແລະ ໂຮງແຮມ ຄຣາວ ພລາຊາ (Crowne Plaza) ທີ່ເປັນສ່ວນຫນຶ່ງໃນວຽກຂອງ UNFPA ກັບກະຊວງສຶກສາທິການ ແລະ ກິລາ (MoES) ເພື່ອຄວາມຮອບດ້ານຂອງ "ລະບົບນິເວດນາງນ້ອຍ". ກອບວຽກຂອງນາງນ້ອຍ ຈະດຶງເອົາການມີສ່ວນຮ່ວມກັບພາກເອກະຊົນໃນການພັດທະນາເສດຖະກິດແບບຍືນຍົງໃນ ສປປ ລາວ, ໂດຍສຸມໃສ່ການສ້າງຄວາມເຂັ້ມແຂງໃຫ້ແກ່ແມ່ຍິງໄວທີ່ເປັນເຍົາວະຊົນ ແລະ ໄວໜຸ່ມ.
ທ່ານ ນາງ ມາຣຽມ ເອ ຄານ, ຜູ້ຕາງໜ້າອົງການ UNFPA ປະຈຳ ສປປ ລາວ ກ່າວວ່າ: “ໃນ ສປປ ລາວ ມີໄວໜຸ່ມຍິງຫຼາຍກວ່າ 700.000 ຄົນ, ແຕ່ລະຄົນມີທ່າແຮງໃນການປະກອບການ, ສາມາດປະກອບສ່ວນເຂົ້າໃນການເຕີບໂຕທາງດ້ານເສດຖະກິດຂອງລາວ. ການຮ່ວມມືລະຫວ່າງພາກລັດ ແລະ ພາກເອກະຊົນຢ່າງມີນະວັດຕະກໍາ ເຊັ່ນການຮ່ວມມືລະຫວ່າງກະຊວງສຶກສາທິການ ແລະ ກິລາ (MOES), ຄຣາວ ພລາຊາ ແລະ UNFPA ໃນຄັ້ງນີ້ ຈະຊ່ວຍເລັ່ງໃຫ້ມີການລົງທຶນຈາກຊຸມຊົນ ພ້ອມທັງເລັ່ງໃຫ້ເກີດການປ່ຽນແປງຕ່າງໆໃນຊີວິດເພື່ອການພັດທະນາແບບຍືນຍົງ”
ເນື່ອງຈາກເປັນສ່ວນໜຶ່ງຂອງແຜນທຸລະກິດຢ່າງມີຄວາມຮັບຜິດຊອບໄລຍະ 10 ປີ ໃນໂຄງການ “Journey to tomorrow” ຂອງກຸ່ມໂຮງແຮມ InterContinental (IHG), ຄຣາວ ພລາຊາ ວຽງຈັນ ໄດ້ຮ່ວມມືກັບ UNFPA ປະຈໍາ ສປປ ລາວ ເພື່ອສະໜັບສະໜູນ ກອບວຽກຂອງນາງນ້ອຍຮອດປີ2030 ກ່ຽວກັບການສ້າງຄວາມເຂັ້ມແຂງໃຫ້ແກ່ເຍົາວະຊົນ ແລະ ໄວໜຸ່ມຍິງ. ຜູ້ເຂົ້າຮ່ວມຊຸດທໍາອິດໃນການຝຶກອົບຮົມຄັ້ງນີ້ ຈະໄດ້ຮຽນຮູ້ການປຸງແຕ່ງໝາກໄມ້ຕາມລະດູການ, ຮຽນຮູ້ດ້ານການເງິນ ແລະ ການຕະຫຼາດຂັ້ນພື້ນຖານ ເພື່ອເຮັດໃຫ້ເຂົາເຈົ້າສາມາດເຮັດກິດຈະກຳເພື່ອສ້າງລາຍຮັບຂອງຕົນເອງ. ຄຣາວ ພລາຊາ ຈະອໍານວຍຄວາມສະດວກດ້ານ ການວາງຜະລິດຕະພັນ ແລະ ການເຂົ້າເຖິງຕະຫຼາດເມື່ອແມ່ຍິງກຸ່ມນີ້ເລີ່ມສ້າງຜະລິດຕະພັນ ເພື່ອຊ່ວຍເຮັດໃຫ້ພວກເຂົາສາມາດເປັນເອກະລາດທາງດ້ານການເງິນໄດ້ຢ່າງໄວວາ.
ຮູບທີ 2: ໄວໜຸ່ມຍິງຈາກໂຄງການນາງນ້ອຍໃນຂະນະຮ່ວມພິທີບາສີຮັບພອນຈາກ UNFPA, ຄຣາວ ພລາຊາ ແລະ ກະຊວງສຶກສາທິການ ແລະ ກິລາ. ໂດຍ: sisavath/UNFPA Laos.
ທ່ານ ນາງ Patria Puyat, ຜູ້ຈັດການຂອງ ຄຣາວ ພລາຊາ ວຽງຈັນ ໄດ້ສະແດງການສະໜັບສະໜູນຢ່າງເຕັມທີ່ຕໍ່ການເຮັດວຽກ ແລະ ໜ້າທີ່ຂອງ UNFPA ໂດຍກ່າວວ່າ: “ພວກເຮົາເຊື່ອໝັ້ນໃນໄວໜຸ່ມ. ພວກເຂົາແມ່ນອະນາຄົດຂອງຊາດ, ດັ່ງນັ້ນພວກເຮົາຢືນຢູ່ຄຽງຂ້າງພວກເຂົາເພື່ອຊ່ວຍໃຫ້ເຂົາສ້າງຄວາມສາມາດຂອງຕົນ ແລະ ເຊື່ອໃນຕົນເອງ. ກິດຈະກໍານີ້ເປັນພຽງການເລີ່ມຕົ້ນ ແລະ ຈະມີໄວໜຸ່ມຍິງຫຼາຍກວ່ານີ້ ທີ່ຈະໄດ້ຮັບການສະຫນັບສະຫນູນເພື່ອສານຝັນຂອງເຂົາເຈົ້າສໍາລັບອະນາຄົດທີ່ດີກວ່າ".
ໃນອາຊຽນ, ສປປ ລາວ ມີອັດຕາສ່ວນການແຕ່ງງານໄວ ແລະ ອັດຕາການເກີດລູກໃນໄວໜຸ່ມສູງທີ່ສຸດ. ເກືອບ 1 ໃນ 5 ໄວໜຸ່ມຍິງອາຍຸ 15-19 ປີແມ່ນແຕ່ງງານ ແລະ ຫຼາຍກວ່າ 1 ໃນ 10 ໄດ້ເລີ່ມມີລູກ. ບັນຫານີ້ເມື່ອບວກກັບອັດຕາການປະລະການຮຽນທີ່ສູງຫຼາຍຍິ່ງເຮັດໃຫ້ຜົນກະທົບຈາກການລະບາດຂອງພະຍາດໂຄວິດ-19 ຮ້າຍແຮງຂຶ້ນ, ເຊິ່ງເຮັດໃຫ້ໂອກາດໃນອະນາຄົດຂອງໄວໜຸ່ມຍິງຫຼຸດລົງ.
ທ່ານ ວິສັນ ສົມພົງ, ຮອງຫົວໜ້າກົມການສຶກສານອກໂຮງຮຽນ, ກະຊວງສຶກສາທິການ ແລະ ກິລາ ໃຫ້ຮູ້ວ່າ: “ການຮ່ວມມືກັບ UNFPA ແລະ ຄຣາວ ພລາຊາ ໃນຄັ້ງນີ້ ເປັນການສະໜັບສະໜູນໃຫ້ແກ່ແຜນພັດທະນາການສຶກສາ ແລະ ເປັນໂອກາດອັນລ້ຳຄ່າໃນການຊຸກຍູ້ສົ່ງເສີມດ້ານບົດບາດທາງເພດ. ຜ່ານການຝຶກອົບຮົມວິຊາຊີບ, ເດັກຍິງໃນໂຄງການນາງນ້ອຍ, ເຖິງວ່າຈະບໍ່ໄດ້ໄປໂຮງຮຽນແລ້ວກໍຍັງສາມາດຮ່ຳຮຽນ, ມ່ວນຊື່ນ ແລະ ແລກປ່ຽນ ຫຼື ຖ່າຍທອດບົດຮຽນເມື່ອເຂົາເຈົ້າກັບຄືນເມືອບ້ານ”.
ລະບົບນິເວດນາງນ້ອຍ ໄດ້ສ່ອງແສງເຖິງຄວາມຈໍາເປັນອັນຮີບດ່ວນໃນການລົງທຶນໄວໜຸ່ມ. ຫຼາຍກວ່າ 80.000 ຄົນ ທີ່ຊອກຫາວຽກເຮັດງານທໍາໃນຕະຫຼາດແຮງງານລາວຕໍ່ປີ, ເຂົາເຈົ້າເປັນໄວໜຸ່ມທີ່ໃນຕອນນີ້ກໍາລັງຕ້ອງການທັກສະ, ຄວາມໝັ້ນໃຈ ແລະ ໂອກາດ. ກອບວຽກຂອງນາງນ້ອຍ, ໄດ້ຖືກຮັບຮອງຈາກລັດຖະບານລາວ ແລະ ໄດ້ຮັບການສະໜັບສະໜູນຈາກອົງການຈັດຕັ້ງທາງສັງຄົມ, ການຮ່ວມຫຼາຍຝ່າຍ, ລວມທັງສື່ມວນຊົນ ແລະ ພາກເອກະຊົນ, ຈະຊ່ວຍເຫຼືອໄວໜຸ່ມຍິງ ແລະ ຊາຍ ແລະ ຄອບຄົວຂອງເຂົາເຈົ້າ, ໃຫ້ການສະໜັບສະໜູນໄວໜຸ່ມຍິງໃຫ້ໄດ້ເຂົ້າໂຮງຮຽນ ແລະ ໄດ້ມີບົດບາດຫຼາຍຂຶ້ນ ແລະ ທັບມ້າງວົງຈອນຄວາມທຸກຍາກ.
ແສງຈັນ ມີອາຍຸ 20 ປີ, ໜຶ່ງຜູ້ເຂົ້າຮ່ວມການຝຶກອົບຮົມ, ຜ່ານມາແມ່ນອາໄສຢູ່ກັບແມ່ຕູ້ຕັ້ງແຕ່ຮຽນຈົບຊັ້ນມັດທະຍົມສຶກສາຕອນຕົ້ນປີທີ 3, ກ່າວດ້ວຍຄວາມຮູ້ສຶກຕື່ນເຕັ້ນວ່າ “ຂ້ອຍດີໃຈຫຼາຍ ແລະ ຂອບໃຈສຳລັບໂອກາດທີ່ມອບໃຫ້ຂ້ອຍ. ເປັນຄັ້ງທຳອິດສຳລັບຂ້ອຍທີ່ໄດ້ມາ ນະຄອນຫຼວງວຽງຈັນ ແລະ ຢູ່ໃນສະຖານທີ່ດີໆ ເຊັ່ນ ໂຮງແຮມ ຄຣາວ ພລາຊາ ເພື່ອຝຶກທັກສະການປຸງແຕ່ງອາຫານ. ຂ້າພະເຈົ້າຈະເຮັດໃຫ້ດີທີ່ສຸດເທົ່າທີ່ສາມາດເຮັດໄດ້ເພື່ອຮຽນໃຫ້ສໍາເລັດ ແລະ ນໍາສິ່ງທີ່ຮຽນມາໄປໃຊ້ໃນອະນາຄົດ”.
ສໍາລັບຂໍ້ມູນເພີ່ມເຕີມກະລຸນາຕິດຕໍ່:
ສີວົງໄຊ ຈັງປິຕິຄຸນ
ຜູ້ວິເຄາະແຜນງານ - ສຸຂະພາບທາງເພດ ແລະ ສຸຂະພາບຈະເລີນພັນຂອງໄວໜຸ່ມ,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: chanpitikoun@unfpa.org
Fatima-Zahra Benyahia Sablonnière
ຊ່ຽວຊານຕ່າງປະເທດດ້ານການຮ່ວມມື ແລະ ນະວັດຕະກໍາຈາກ UNV,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: fbenyahia@unfpa.org
