ອົງການ UNFPA ແລະ ໂຮງແຮມ ຄຣາວ ພລາຊ່າ ຮ່ວມມືກັນສ້າງຄວາມເຂັ້ມແຂງໃຫ້ແກ່ຊາວໜຸ່ມ ແລະ ສົ່ງເສີມຄວາມສະເໝີພາບຍິງ-ຊາຍ ໃນ ສປປ ລາວ
ວັນທີ 29 ສິງຫາ 2024, ນະຄອນຫຼວງວຽງຈັນ, ສປປ ລາວ – ງານອັນສຳຄັນໃນວັນນີ້, ອົງການ ສະຫະປະຊາຊາດກອງທຶນສຳລັບປະຊາກອນ (UNFPA), ໂຮງແຮມ ຄຣາວ ພລາຊາ ແລະ ໂຮງແຮມ ຮໍລີເດອິນ ແອນ ສວີດ ວຽງຈັນ ໄດ້ສານຕໍ່ການຮ່ວມມືກັນໂດຍຜ່ານຂໍ້ຕົກລົງອັນສຳຄັນ ເພື່ອເສີມຂະຫຍາຍການສ້າງຄວາມເຂັ້ມແຂງ ແລະ ຂີດຄວາມສາມາດຂອງຊາວໜຸ່ມ ແລະ ເຍົາວະຊົນໃນຂອບເຂດທົ່ວປະເທດ ສປປ ລາວ. ການຮ່ວມມືດັ່ງກ່າວໄດ້ປະກາດໃນພິທີລົງນາມທີ່ຈັດຂຶ້ນຢູ່ໂຮງແຮມ ຄຣາວ ພລາຊາ ວຽງຈັນ ຮ່ວມກັບກະຊວງສຶກສາທິການ ແລະ ກິລາ.
ປະຊາກອນ ສປປ ລາວ ຫຼາຍກວ່າ 60% ມີອາຍຸຕ່ຳກວ່າ 30 ປີ, ຂໍ້ລິເລີ່ມນີ້ຊີ້ໃຫ້ເຫັນເຖິງບົດບາດສຳຄັນຂອງຊາວໜຸ່ມໃນປະຈຸບັນ ແລະ ອານາຄົດຂອງຊາດ. ການຮ່ວມມືແມ່ນເພື່ອແນໃສ່ນຳໃຊ້ຄວາມສາມາດບົ່ມຊ້ອນຂອງຊາວໜຸ່ມ ໂດຍການເຊື່ອມໂຍງການສະໜັບສະໜູນຈາກລັດຖະບານ, ຄູ່ຮ່ວມມືພັດທະນາ ແລະ ພາກເອກະຊົນ.
ທ່ານ ດຣ ແບັກທີຢໍ ຄາດີເລິບ, ຜູ້ຕາງໜ້າອົງການ UNFPA ປະຈຳ ສປປ ລາວ ກ່າວວ່າ: “ມື້ນີ້, ພວກເຮົາໄດ້ມີບາດກ້າວອັນສຳຄັນເດີນໄປຂ້າງໜ້າຮ່ວມກັນ ໃນການສ້າງຄວາມເຂັ້ມແຂງໃຫ້ແກ່ຊາວໜຸ່ມຂອງພວກເຮົາ. “ຂໍ້ຕົກລົງການຮ່ວມມືກັນໃນມື້ນີ້ກັບ ໂຮງແຮມ ຄຣາວ ພລາຊາ ແລະ ໂຮແຮມ ຮໍລີເດອິນ ແອນ ສວີດ ວຽງຈັນ ຮ່ວມກັບກະຊວງສຶກສາທິການ ແລະ ກິລາ ສະທ້ອນໃຫ້ເຫັນເຖິງຄວາມມຸ່ງໝັ້ນຂອງພວກເຮົາໃນການສົ່ງເສີມການເປັນຜູ້ນຳຂອງຊາວໜຸ່ມ ແລະ ການພັດທະນາເສດຖະກິດ-ສັງຄົມ ໃນ ສປປ ລາວ. ຂໍ້ລິເລີ່ມນີ້ແມ່ນກຸນແຈໃນການສ້າງຄວາມເຂັ້ມແຂງໃຫ້ແກ່ຊາວໜຸ່ມ. ດັ່ງຄຳສຸພາສິດລາວເວົ້າວ່າ "ຊາວໜຸ່ມເປັນກະດູກສັນຫຼັງຂອງຊາດ."
ການຮ່ວມມືຂອງຫຼາຍຂະແໜງການນີ້ສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດຄັ້ງທີ 9 (NSEDP), ກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (ICPD), ແຜນງານນາງນ້ອຍ 2030, ແລະ ເປົ້າໝາຍການພັດທະນາແບບຍືນຍົງ (SDGs) ລວມທັງແຜນການດຳເນີນທຸລະກິດທີ່ມີຄວາມຮັບຜິດຊອບ 10 ປີ. “ການເດີນທາງສູ່ອະນາຄົດ” ຂອງກຸ່ມໂຮງແຮມ ອິນເຕີຄອນຕີເນັນໂທ (IHG).
ທ່ານ ມູຣາລິ ວິດວັນເນຕັນ (Murali Viswanathan), ຜູ້ຈັດການຂອງກຸ່ມໂຮງແຮມ ໄດ້ສະແດງການສະຫນັບສະຫນູນແຜນງານນາງນ້ອຍຢ່າງເຕັມທີ່, ໂດຍກ່າວວ່າ: "ກຸ່ມໂຮງແຮມ IHG ຖືວ່າການມອບຄືນສິ່ງທີ່ດີໃຫ້ແກ່ຊຸມຊົນທີ່ພວກເຮົາໄດ້ເປັນສ່ວນໜຶ່ງນຳ ໃນປະເທດທີ່ພວກເຮົາດໍາເນີນທຸລະກິດຢູ່ - ເປັນຮາກທີ່ຝັງເລິກຢູ່ໃນຈັນຍາບັນຂອງພວກເຮົາ. ຄໍາໝັ້ນສັນຍາດັ່ງກ່າວແມ່ນໄດ້ສືບຕໍ່ດຳເນີນໄປກັບໂຮງແຮມ ຄຣາວ ພລາຊາ ແລະ ໂຮງແຮມ ຮໍລີເດອິນ ວຽງຈັນ - ເຊິ່ງຈະເຮັດໃຫ້ຊາວໜຸ່ມຍິງ ແລະ ຊາຍ ແລະ ຊາວໜຸ່ມທີ່ຂາດໂອກາດຢູ່ເຂດຊົນນະບົດ ໄດ້ຮັບໂອກາດການຝຶກອົບຮົມໃນຂະແຫນງການບໍລິການໂຮງແຮມ ແລະ ສ້າງເສັ້ນທາງການມີວຽກເຮັດງານທຳທີ່ມີທ່າແຮງ, ສົ່ງເສີມຄວາມສະເໝີພາບຍິງ-ຊາຍ, ລວມທັງ ການລົງທຶນໃສ່ຊາວໜຸ່ມໃນ ສປປ ລາວ ຢ່າງມີຄຸນນະພາບ ແລະ ທັນເວລາ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມ”.
ຜ່ານມາ, ພາຍໃຕ້ແຜນງານນາງນ້ອຍ, ໂຮງແຮມ ຄຣາວ ພລາຊາ ວຽງຈັນ ໄດ້ສະໜັບສະໜູນກຸ່ມເດັກຍິງນາງນ້ອຍ ໂດຍຜ່ານການຝຶກອົບຮົມອັນລ້ຳຄ່າໃນດ້ານການປຸງແຕ່ງ, ການຕັ້ງທຸລະກິດ ແລະ ທັກສະອາຊີບ. ຂໍ້ລິເລີ່ມນີ້ໄດ້ຮ່ວມມືກັບວິທະຍາໄລເຕັກນິກປາກປ່າສັກ, ທະນາຄານ BFL ແລະ ສູນໄວໜຸ່ມນະຄອນຫຼວງວຽງຈັນ ເພື່ອໃຫ້ການສະໜັບສະໜູນຢ່າງຮອບດ້ານ ລວມທັງການຮູ້ດ້ານການເງິນ ແລະ ການບໍລິການສຸຂະພາບຈະເລີນພັນ.
ສປປ ລາວ ປະເຊີນກັບສິ່ງທ້າທາຍອັນໃຫຍ່ຫຼວງ ລວມທັງອັດຕາການແຕ່ງງານໄວສູງ (26.6% ຂອງເດັກຍິງໜຸ່ມ ອາຍຸແຕ່ 15 ຫາ 19 ປີ ທີ່ໄດ້ແຕ່ງງານແລ້ວ ຢູ່ໃນ ສປປ ລາວ) ແລະ ການເກີດລູກໃນຊາວໜຸ່ມ (89 ຕໍ່ 1000) ໃນອາຊຽນ, ສົມທົບກັບອັດຕາການອອກໂຮງຮຽນໃນຊັ້ນມັດທະຍົມ. ການສືບຕໍ່ຮ່ວມມືໃນຄັ້ງນີ້ ແມ່ນພະຍາຍາມແກ້ໄຂບັນຫາເຫຼົ່ານີ້ ໂດຍສຸມໃສ່ການພັດທະນາສີມືແຮງງານຂອງຊາວໜຸ່ມ, ການມີວຽກເຮັດງານທຳ, ການສ້າງຄວາມເຂັ້ມແຂງ ແລະ ການເປັນຜູ້ປະກອບການ.
ອົງປະກອບສຳຄັນຂອງການເປັນຄູ່ຮ່ວມງານປະກອບມີດັ່ງນີ້: ສະໜັບສະໜູນຂໍ້ລິເລີ່ມພັດທະນາສີມືແຮງງານຂອງຊາວໜຸ່ມ ແລະ ສ້າງໂອກາດໃນການມີວຽກເຮັດງານທຳ ແລະ ການເປັນຜູ້ປະກອບການ.
- ຈັດຕັ້ງປະຕິບັດເງື່ອນໄຂມາດຖານທຸລະກິດທີ່ເປັນມິດກັບນາງ 'ນ້ອຍ' ເພື່ອຮັບປະກັນການເຂົ້າເຖິງອາຫານທີ່ດີຕໍ່ສຸຂະພາບ, ການສຶກສາ, ຂໍ້ມູນສຸຂະພາບ ແລະ ການປົກປ້ອງສັງຄົມ.
- ປະສານງານໃນການໂຄສະນາເຜີຍແຜ່ ແລະ ການສື່ສານ ເພື່ອສົ່ງເສີມການສຶກສາທັກສະຊີວິດ, ການມີສ່ວນຮ່ວມທາງດ້ານເສດຖະກິດ-ສັງຄົມ, ແລະ ການສ້າງຄວາມເຂັ້ມແຂງໃຫ້ແກ່ຊາວໜຸ່ມທີ່ຂາດໂອກາດ.
ການຮ່ວມມືຄັ້ງນີ້ຈະມີການຝຶກອົບຮົມນັກສຶກສາ TVET 20 ຄົນໃນດ້ານການຕ້ອນຮັບ, ພັດທະນາທັກສະດ້ານການຕ້ອນຮັບໃຫ້ແກ່ຊາວໜຸ່ມ 60 ຄົນທີ່ມາຈາກເຂດຊົນນະບົດ, ແລະ ສະຫນັບສະຫນູນການຕະຫຼາດຜະລິດຕະພັນທີ່ເຮັດໂດຍກຸ່ມທີ່ດ້ອຍໂອກາດ, ເຊັ່ນ: ຫັດຖະກໍາທີ່ສ້າງໂດຍຄົນພິການ. ນອກນີ້, ຍັງຈະລວມເຖິງການໃຫ້ການຝຶກອົບຮົມກ່ຽວກັບສະຫວັດດີການຂອງພະນັກງານ ແລະ ການສະໜັບສະໜູນກິດຈະກໍາສາກົນ ເພື່ອແນໃສ່ສົ່ງເສີມສິດທິ ແລະ ສະຫວັດດີການຂອງເຍົາວະຊົນ, ໄວໜຸ່ມ ແລະ ການສ້າງຄວາມເຂັ້ມແຂງຂອງແມ່ຍິງ.
ທ່ານ ສຸກສະໝອນ ຊາພູວົງ ຮອງຫົວໜ້າພະແນກຄຸ້ມຄອງໂຄງການ, ກົມແຜນການ, ກະຊວງສຶກສາທິການ ແລະ ກິລາ ກ່າວວ່າ: “ພວກເຮົາເຊື່ອໝັ້ນໃນຊາວໜຸ່ມ. ເຂົາເຈົ້າແມ່ນອະນາຄົດ ດັ່ງນັ້ນພວກເຮົາຈະຢືນຢູ່ຄຽງຂ້າງເຂົາເຈົ້າ ເພື່ອຊ່ວຍໃຫ້ເຂົາເຈົ້າສ້າງຂິດຄວາມສາມາດ ແລະ ເຊື່ອໃນຕົນເອງ. ນີ້ແມ່ນໂອກາດອັນລ້ຳຄ່າ ທີ່ຈະຊຸກຍູ້ບັນດາຄວາມພະຍາຍາມຕ່າງໆກ່ຽວກັບຄວາມສະເໝີພາບຍິງ-ຊາຍ ແລະ ການສ້າງຄວາມເຂັ້ມແຂງ ໃນການປະຕິບັດບັນດາຄຳໝັ້ນສັນຍາຂອງລັດຖະບານພາຍໃຕ້ຍຸດທະສາດເຍົາວະຊົນ ແລະ ຊາວໜຸ່ມ ແລະ ກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ”.
ໃນຊຸມປີຜ່ານມານີ້, ລະບົບນິເວດນາງນ້ອຍ ໄດ້ສ່ອງແສງເຖິງຄວາມຈໍາເປັນອັນຮີບດ່ວນໃນການລົງທຶນໃສ່ຊາວໜຸ່ມ. ອີງຕາມການສຳຫຼວດກຳລັງແຮງງານ ໃນປີ 2022, ຢູ່ລາວ ມີຄົນຊອກວຽກໃໝ່ເຂົ້າສູ່ຕະຫຼາດແຮງງານຈຳນວນ 43.519 ຄົນຕໍ່ປີ, ເຂົາເຈົ້າເປັນຄົນລຸ້ນໃໝ່ທີ່ຕ້ອງການທັກສະ, ຄວາມໝັ້ນໃຈ ແລະ ໂອກາດໃນປັດຈຸບັນ. ແຜນງານນາງນ້ອຍ, ໄດ້ຮັບການຮັບຮອງຈາກລັດຖະບານລາວ ແລະ ໄດ້ຮັບການສະໜັບສະໜູນຈາກອົງການຈັດຕັ້ງທາງສັງຄົມ, ການຮ່ວມມືສອງຝ່າຍ, ສື່ມວນຊົນ ແລະ ພາກເອກະຊົນ, ໄດ້ຊ່ວຍໃຫ້ຍິງໜຸ່ມ, ຊາຍໜຸ່ມ ແລະ ຄອບຄົວຂອງເຂົາເຈົ້າສະໜັບສະໜູນໃຫ້ເດັກຍິງເຂົ້າໂຮງຮຽນ ແລະ ໄດ້ຮັບການຊຸກຊູ້ ແລະ ແກ້ໄຂວົງຈອນຄວາມທຸກຍາກ.
ການສານຕໍ່ການຮ່ວມມືລະຫວ່າງ ອົງການ ສະຫະປະຊາຊາດກອງທຶນສຳລັບປະຊາກອນ (UNFPA), ໂຮງແຮມ ຄຣາວ ພລາຊາ ແລະ ໂຮແຮມ ຮໍລີເດອິນ ແອນ ສວີດ ວຽງຈັນ ສະແດງໃຫ້ເຫັນເຖິງຂີດໝາຍອັນສຳຄັນໃນການຮັບປະກັນສິດທິ ແລະ ທາງເລືອກສຳລັບຊາວໜຸ່ມໃນ ສປປ ລາວ. ສົ່ງເສີມສະພາບແວດລ້ອມທີ່ຊາວໜຸ່ມສາມາດບັນລຸຄວາມສາມາດບົ່ມຊ້ອນຂອງຕົນໄດ້ຢ່າງເຕັມທີ່, ແລະ ເນັ້ນໜັກເຖິງບົດບາດລວມຂອງທຸກຂະແໜງການໃນການຫັນປ່ຽນສິ່ງທ້າທາຍໃຫ້ກາຍເປັນໂອກາດ.
******************
ອົງການ ສະຫະປະຊາຊາດກອງທຶນສຳລັບປະຊາກອນ (UNFPA) ແມ່ນອົງການ ສປຊ ທີ່ສົ່ງເສີມວຽກງານສຸຂະພາບທາງເພດ ແລະ ສຸຂະພາບຈະເລີນພັນ, ອົງການ UNFPA ເຮັດວຽກຢູ່ຫຼາຍກວ່າ 150 ປະເທດ ແລະ ພາກພື້ນ ເພື່ອຮັບປະກັນວ່າ ການຖືພາທຸກຄັ້ງແມ່ນໄດ້ມີການວາງແຜນ, ການເກີດລູກທຸກຄັ້ງມີຄວາມປອດໄພ ແລະ ຊາວໜຸ່ມທຸກຄົນໄດ້ບັນລຸຄວາມສາມາດບົ່ມຊ້ອນຂອງຕົນເອງ.
ໂຮງແຮມ ຄຣາວ ພລາຊາ ວຽງຈັນ ເປັນໂຮງແຮມຈຸດໝາຍປາຍທາງຢູ່ ສປປ ລາວ, ເປັນທີ່ຮູ້ຈັກກັນດີສໍາລັບຄວາມມຸ່ງໝັ້ນໃນການໃຫ້ບໍລິການອັນດີເລີດ ແລະ ການມີສ່ວນຮ່ວມຂອງຊຸມຊົນ. ໂຮງແຮມ ຄຣາວ ພລາຊາ ວຽງຈັນ ສະໜັບສະໜູນຂໍ້ລິເລີ່ມຕ່າງໆ ທີ່ປະກອບສ່ວນເຂົ້າໃນການພັດທະນາ ແລະ ສ້າງຄວາມເຂັ້ມແຂງໃນທ້ອງຖິ່ນ.
ໂຮງແຮມ ຮໍລີເດອິນ ແອນ ສວີດ ວຽງຈັນ ໃຫ້ການບໍລິການໂຮງແຮມຊັ້ນນຳໜ້າຂອງໂລກ ແລະ ມຸ້ງໝັ້ນໃນການສົ່ງເສີມການມີສ່ວນຮ່ວມຂອງຊຸມຊົນ ແລະ ສະໜັບສະໜູນການພັດທະນາແບບຍືນຍົງ.
