30 ພຶດສະພາ 2023, ນະຄອນຫຼວງວຽງຈັນ, ສປປ ລາວ - ມື້ນີ້ ອົງການ ສະຫະປະຊາຊາດ ກອງທຶນສຳລັບປະຊາກອນ (UNFPA) ແລະ ສູນພາສາ ແລະ ທີ່ປຶກສາຮຽນຕໍ່ຕ່າງປະເທດ UTD Education ໄດ້ຮ່ວມກັນລົງນາມໃນ ບົດບັນທຶກຄວາມເຂົ້າໃຈ ເພື່ອຮ່ວມກັນສົ່ງເສີມໄວໜຸ່ມຜ່ານແຜນງານ ນາງ ນ້ອຍ.
“ການຮ່ວມມືດັ່ງກ່າວນີ້ແມ່ນການນໍາເອົາຄວາມຮູ້ທາງດ້ານວິຊາການຂອງ UNFPA ມາລວມເຂົ້າກັບ ປະສົບການຄວາມຊໍານິຊໍານານໃນການເຮັດວຽກຮ່ວມກັບໄວໜຸ່ມຂອງ UTD ເພື່ອສ້າງຄວາມເຂັ້ມແຂງໃຫ້ໄວໜຸ່ມທັງຍິງ ແລະ ຊາຍ, ສົ່ງເສີມພາວະການເປັນຜູ້ນໍາ ແລະ ການມີສ່ວນຮ່ວມໃນສັງຄົມຂອງບັນດາໄວໜຸ່ມ ຄຽງຄູ່ໄປກັບການຈັດຕັ້ງປະຕິບັດຄໍາໝັ້ນສັນຍາຂອງລັດຖະບານລາວໃນ ກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (ICPD) ແລະ ການບັນລຸເປົ້າໝາຍການພັດທະນາແບບຍືນຍົງ (SDGs),” ກ່າວໂດຍ ທ່ານ ນາງ ມາຣຽມ ຄານ, ຜູ້ຕາງໜ້າ UNFPA ປະຈໍາ ສປປ ລາວ.
UTD Education ແມ່ນສູນພາສາຊັ້ນນໍາຂອງລາວທີ່ສະໜອງການບໍລິການ ແລະ ໃຫ້ຄໍາແນະນໍາແກ່ນ້ອງໆນັກຮຽນເພື່ອໄປສານຝັນຮຽນຕໍ່ຕ່າງປະເທດ ຜ່ານການຮ່ວມມືຄັ້ງນີ້ສູນດັ່ງກ່າວຈະເຂົ້າມາຊ່ວຍອໍານວຍຄວາມສະດວກໃນການປະສານງານ ແລະ ເຂົ້າເຖິງເຄືອຂ່າຍໄວໜຸ່ມ ທີ່ຂະຫຍາຍຕົວຢ່າງໄວວາໃນທົ່ວປະເທດ.
UNFPA ມຸ່ງໝັ້ນທີ່ຈະຊ່ວຍໃຫ້ໄວໜຸ່ມສາມາດບັນລຸຂີດຄວາມອາດສາມາດຂອງພວກເຂົາຢ່າງເຕັມສ່ວນ, ສະນັ້ນ ການຮ່ວມມືດັ່ງກ່າວນີ້ ຈະຊ່ວຍລະດົມສົ່ງເສີມໃຫ້ໄວໜຸ່ມໃຊ້ຊີວິດຢ່າງມີສຸຂະພາບດີ ແລະ ຊ່ວຍສ້າງທັກສະຊີວິດໃນຂົງເຂດຕ່າງໆເຊັ່ນ: ສິດທິທາງສຸຂະພາບຈະເລີນພັນ ແລະ ສຸຂະພາບທາງເພດ, ສຸຂະພາບຈິດ, ບົດບາດຍິງຊາຍ ແລະ ຄວາມຮຸນແຮງທາງເພດ, ຄວາມເປັນເອກະລາດທາງຮ່າງກາຍ, ພາສາ, ການສື່ສານ, ຄວາມເປັນຜູ້ນໍາ, ແລະ ການປ່ຽນແປງດິນຟ້າອາກາດໂດຍຜ່ານກິດຈະກໍາການມີສ່ວນຮ່ວມຕ່າງໆ.
ທ່ານ ນາງ ເພັດມະນີ ວິຍະເດດ, ຜູ້ກໍ່ຕັ້ງ UTD Education, ກ່າວວ່າ, "ຂ້າພະເຈົ້າມີຄວາມພາກພູມໃຈຫຼາຍ ທີ່ໄດ້ລິເລີ່ມການຮ່ວມມືໃນຄັ້ງນີ້. ຫວັງຢ່າງຍິ່ງວ່າພວກເຮົາຈະສາມາດເປັນແບບຢ່າງທີ່ດີໃຫ້ກັບພາກເອກະຊົນໃນການສົ່ງເສີມໄວໜຸ່ມລາວ ແລະ ຊຸກຍູ້ການເຕີບໂຕຂອງພວກເຂົາ. ຂ້າພະເຈົ້າເຄີຍຄິດວາດພາບໄວ້ສະເໝີວ່າຢາກໃຫ້ອະນາຄົດຂອງພວກເຮົາເຕັມໄປດ້ວຍໄວໜຸ່ມທີ່ສາມາດເດີນຕາມຄວາມຝັນ ເຂົ້າເຖິງການຮຽນຢູ່ຕ່າງປະເທດໄດ້ຜ່ານທຶນການສຶກສາ ແລ້ວນໍາເອົາຄວາມຮູ່ຄວາມສາມາດໄດ້ກັບມາພັດທະນາປະເທດຊາດ, ຊຸມຊົນ ຄຽງຄູ່ກັບການໄດ້ໃຊ້ຊີວິດຢ່າງເຕັມທີ່."
UNFPA ໄດ້ເຮັດວຽກຮ່ວມກັບຄູ່ຮ່ວມງານທີ່ຫຼາກຫຼາຍເພື່ອບັນລຸເປົ້າໝາຍຮ່ວມກັນ ເຊິ່ງໄດ້ສືບຕໍ່ຂະຫຍາຍການຮ່ວມມືກັບພາກເອກະຊົນ, ອົງການຈັດຕັ້ງທາງສັງຄົມ, ສະຖາບັນການເງິນ, ສະຖາບັນການິດສອນ ແລະ ສື່ມວນຊົນ ເພື່ອຊ່ວຍລັດຖະບານລາວໃຫ້ບັນລຸຕາມແຜນພັດທະນາ ເສດຖະກິດສັງຄົມແຫ່ງຊາດຄັ້ງທີ IX.
***
ອົງການ UNFPA ແມ່ນອົງການ ສປຊ ທີ່ສົ່ງເສີມວຽກງານສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ, ລວມທັງ ສປປ ລາວ, ເພື່ອບັນລຸການເສຍຊີວິດຂອງແມ່ໃຫ້ເປັນສູນ, ການວາງແຜນຄອບຄົວທີ່ບໍ່ໄດ້ຮັບການສະໜອງ, ຄວາມຮຸນແຮງບົນພື້ນຖານທາງເພດເປັນສູນ.
ສໍາລັບຂໍ້ມູນເພີ່ມເຕີມ, ກະລຸນາຕິດຕໍ່:
