ນະຄອນຫຼວງວຽງຈັນ, ວັນທີ 12-13 ສິງຫາ 2022. ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ສົມທົບກັບສູນກາງຊາວໜຸ່ມປະຊາຊົນປະຕິວັດລາວ (LYU) ແລະ ຄູ່ຮ່ວມງານອື່ນໆ ເພື່ອສະເຫຼີມສະຫຼອງວັນໄວໜຸ່ມສາກົນ ພາຍໃຕ້ຫົວຂໍ້: “ຄວາມສາມັກຄີລະຫວ່າງຄົນທຸກຮຸ່ນ: ການສ້າງໂລກສຳລັບຄົນທຸກເພດໄວ”.
ຫົວຂໍ້ຂອງວັນໄວໜຸ່ມສາກົນໃນປີນີ້ໄດ້ເນັ້ນຢໍ້າ ແລະ ກະຈາຍຂໍ້ຄວາມທີ່ວ່າ: ພວກເຮົາຕ້ອງການ ການປະກອບສ່ວນຈາກຄົນທຸກຮຸ່ນເພື່ອບັນລຸເປົ້າຫມາຍການພັດທະນາແບບຍືນຍົງ (SDGs) ແລະ ເພື່ອພ້ອມກັນກ້າວໄປ. ມັນຈໍາເປັນທີ່ຕ້ອງເລັ່ງການຈັດຕັ້ງປະຕິບັດ ເພື່ອເສີມສ້າງຂີດຄວາມສາມາດຂອງໄວໜຸ່ມໃນການຕັດສິນໃຈຢ່າງມີຂໍ້ມູນ ໂດຍສະເພາະແມ່ນການຕັດສິນໃຈບັນຫາທີ່ນຳໄປສູ່ຊີວິດທີ່ສົມດູນ ແລະ ໄດ້ຮັບສິດທິຢ່າງສົມບູນ ກໍ່ຄືບັນຫາກ່ຽວກັບສຸຂະພາບທາງເພດ ແລະ ສຸຂະພາບຈະເລີນພັນ ແລະ ເພື່ອໃຫ້ເຂົາເຈົ້າໄດ້ຮັບການສຶກສາ, ໄດ້ດຳລົງຊີວິດໂດຍປາສະຈາກການຖືກບີບບັງຄັບ ແລະ ຄວາມຮຸນແຮງ ແລະ ສາມາດປະກອບສ່ວນໃຫ້ກຳລັງແຮງງານເພື່ອເພີ່ມພູນຜົນໄດ້ຮັບຈາກການປັນຜົນປະຊາກອນ.
ພິທີສະເຫຼີມສະຫຼອງວັນໄວໜຸ່ມສາກົນ ນໍາພາໂດຍສູນກາງຊາວໜຸ່ມ ໄດ້ຈັດຂຶ້ນທີ່ສູນການຄ້າລາວ-ໄອເຕັກ. ພາຍໃນງານມີກິດຈະກໍາຫຼາກຫຼາຍ ນໍາພາໂດຍໄວຫນຸ່ມ ເຊັ່ນ: ການແຕ້ມຮູບ, ການເຕັ້ນ, ການວາງສະແດງຜະລິດຕະພັນ ແລະ ການແຂ່ງຂັນໂຕ້ວາທີ. ນອກນັ້ນຍັງມີເວທີສົນທະນາໃນຫົວຂໍ້ກ່ຽວທີ່ກໍາລັງເຄັ່ງຮ້ອນເຊັ່ນ: ການມີສ່ວນຮ່ວມຂອງໄວໜຸ່ມ ເພື່ອສະໜັບສະໜູນຊຸມຊົນທີ່ມີຄວາມຫຼາຍຫຼາຍທາງເພດ LGBTIQ, ວຽກງານສຸຂະພາບທາງເພດ ແລະ ສຸຂະພາບຈະເລີນພັນ ແລະ ວຽກງານປົກປັກຮັກສາສິ່ງແວດລ້ອມ. ພ້ອມນີ້ກໍ່ມີກິດຈະກໍາການຝຶກການຊ່ວຍເຫຼືອເບື້ອງຕົ້ນ (first aid) ແລະ ການບໍລິຈາກເລືອດ.
ທ່ານ ມອນໄຊ ລາວມົວຊົງ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ໄດ້ກ່າວວ່າ: “ຊາວໜຸ່ມແມ່ນກຳລັງແນວໜ້າໃນການຂັບເຄື່ອນການພັດທະນາ ແລະ ເສດຖະກິດຂອງປະເທດ. ພວກເຂົາຢູ່ໃນເກນອາຍຸທີ່ພວມຮຽນຮູ້ ແລະ ເກັບກ່ຽວປະສົບການ. ສະນັ້ນ, ພວກເຮົາມີໜ້າທີ່ສ້າງສະພາບແວດລ້ອມທີ່ເອື້ອອໍານວຍເພື່ອໃຫ້ເຂົາເຈົ້າໄດ້ເຂົ້າເຖິງການສຶກສາ ແລະ ຊຸກຍູ້ໃຫ້ເຂົາເຈົ້າເປັນສ່ວນໜຶ່ງຂອງການວາງແຜນເສດຖະກິດສັງຄົມ . ”
ນອກຈາກງານທີ່ສູນການຄ້າລາວ-ໄອເຕັກ ກໍ່ຍັງມີງານສະເຫລີມສະຫລອງວັນໄວໜຸ່ມສາກົນ ນຳໂດຍສູນຊາວໜຸ່ມນະຄອນຫຼວງວຽງຈັນ (VYC) ຈັດຂຶ້ນທີ່ຖະໜົນລ້ານຊ້າງ ພາຍໃຕ້ຫົວຂໍ້: ໄວໜຸ່ມສ້າງສັນຜົນງານເພື່ອແມ່. ພາຍໃນງານມີການວາງສະແດງຜະລິດຕະພັນທ້ອງຖິ່ນ ຈາກແມ່ຍິງ, ໄວໜຸ່ມຈາກກຸ່ມທີ່ມີຄວາມສ່ຽງ ແລະ ກຸ່ມທີ່ມີຄວາມຫຼາກຫຼາຍທາງເພດ LGBTIQ. ໃນຕອນບ່າຍ ກໍ່ມີເວທີສົນທະນາກ່ຽວກັບບັນຫາສຸຂະພາບຈິດ, ການໃຊ້ຢາເສບຕິດ ແລະ ຄວາມມຸ່ງຫວັງ ແລະ ຄວາມຝັນຂອງໄວໜຸ່ມ. ຜ່ານການພົບປະແລກປ່ຽນດັ່ງກ່າວ, ໄວໜຸ່ມກໍ່ມີຄວາມກຽມພ້ອມທີ່ຈະສົນທະນາກັບພໍ່ແມ່ຜູ້ປົກຄອງ ແລະ ຜູ້ມີອໍານາດໃນການຕັດສິນໃຈອື່ນໆ.
ສປປ ລາວ ມີປະຊາກອນໄວໜຸ່ມຫຼາຍ, ເຊິ່ງເກືອບເຄິ່ງໜຶ່ງຂອງປະຊາກອນມີອາຍຸຕໍ່າກວ່າ 25 ປີ. ຊາວໜຸ່ມແມ່ນກຳລັງ ຂັບເຄື່ອນໃຫ້ແກ່ການພັດທະນາເສດຖະກິດ, ສະຫວັດດີການສັງຄົມ ແລະ ຄວາມຈະເລີນຮຸ່ງເຮືອງຂອງປະເທດທັງໃນປັດຈຸບັນ ແລະ ອະນາຄົດ.
ທ່ານນາງ ມາຣຽມ ຄານ , ຜູ້ຕາງໜ້າອົງການ UNFPA ປະຈຳລາວ ກ່າວວ່າ: “ຊາວໜຸ່ມໃນທຸກມື້ນີ້ມີພອນສະຫວັນ, ມີຄວາມຫວັງ ແລະ ມີຄວາມສາມາດ. ການສົ່ງເສີມຄວາມເປັນຜູ້ນໍາ ແລະ ການມີສ່ວນຮ່ວມຂອງໄວໜຸ່ມ ແມ່ນພື້ນຖານ ສໍາຄັນຂອງວຽກງານຂອງ UNFPA. ອົງການ UNFPA ແລະ ຄູ່ຮ່ວມງານຂອງພວກເຮົາ ລົງທຶນໃສ່ການພັດທະນາ ທັກສະ ແລະ ການຫາຄວາມຮູ້ເພື່ອໃຫ້ໄວໜຸ່ມສາມາດເລືອກທາງເລືອກຢ່າງມີຂໍ້ມູນ ກ່ຽວກັບຮ່າງກາຍ, ຊີວິດ, ຄອບຄົວ, ແລະ ຊຸມຊົນຂອງພວກເຂົາ”
ສຸກສະຫວັນ ສີພິນິດ, ອາສາສະໝັກຈາກ ສູນໄວໜຸ່ມນະຄອນຫຼວງວຽງຈັນ ກ່າວວ່າ: “ໄວໜຸ່ມຕ້ອງການຂໍ້ມູນຂ່າວສານດ້ານສຸຂະພາບທາງເພດ ແລະ ສຸຂະພາບຈະເລີນພັນ ແຕ່ເຂົາເຈົ້າຍັງເຂີນອາຍ ແລະ ລັງເລໃຈທີ່ຈະຊອກຮູ້. ຂ້າພະເຈົ້າຮູ້ສຶກພູມໃຈ ໃນນາມໄວໜຸ່ມດ້ວຍກັນເອງ ທີ່ໄດ້ສະໜັບສະໜູນໃຫ້ເຂົາເຈົ້າເຂົ້າເຖິງຂໍ້ມູນຂ່າວສານ ແລະ ການບໍລິການທີ່ເໝາະສົມຢູ່ສູນຊາວໜຸ່ມວຽງຈັນ ທີ່ໃຫ້ບໍລິການຢ່າງເປັນມິດກັບໄວໜຸ່ມ ໂດຍບໍ່ມີການຕັດສິນ, ເຄົາລົບຄວາມເປັນສ່ວນຕົວ ແລະ ຄວາມລັບ ແລະ ຮັບປະກັນການດູແລໂດຍບໍ່ມີການຈຳແນກ.”
***************
ອົງການ UNFPA ແມ່ນໜ່ວຍງານໜຶ່ງຂອງອົງການສະຫະປະຊາຊາດທີ່ເຮັດວຽກໃນດ້ານ ສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ ລວມທັງ ສປປ ລາວ. ມີເປົ້າໝາຍໃນການຫຼຸດການຕາຍຂອງແມ່ທີ່ສາມາດປ້ອງກັນໄດ້ໃຫ້ເປັນ 0, ຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງໃຫ້ເປັນ 0, ຄວາມຮຸນແຮງບົນພື້ນຖານທາງເພດ ໃຫ້ເປັນ 0.
ສໍາລັບຂໍ້ມູນເພີ່ມເຕີມ ກະລຸນາຕິດຕໍ່ໄດ້ທີ່:
ສີວົງໄຊ ຈັງປິຕິກຸນ
ຜູ້ຮັບຜິດຊອບແຜນງານ ສຸຂະພາບທາງເພດ ແລະ ສຸຂະພາບຈະເລີນພັນຂອງໄວໜຸ່ມ,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ທ່ານ ນາງ Fatima Zahra Benyahia
ຜູ້ຊ່ຽວຊານດ້ານການຮ່ວມມື ແລະນະວັດຕະກໍາ,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: fbenyahia@unfpa.org
