ວັນທີ 11 ສິງຫາ 2023, ນະຄອນຫຼວງວຽງຈັນ, ສປປ ລາວ - ສູນກາງຊາວໜຸ່ມປະຊາຊົນປະຕິວັດລາວ (LYU), ອົງການສະຫະປະຊາຊາດກອງທຶນສໍາລັບປະຊາກອນ (UNFPA) ແລະ ສະຫະພາບເອີຣົບ ປະຈໍາ ສປປ ລາວ ຮ່ວມກັນຈັດງານສະເຫຼີມສະຫຼອງວັນໄວໜຸ່ມສາກົນ ທີ່ສູນວາງສະແດງສິນຄ້າ ລາວ-ໄອເຕັກ. ງານສະເຫຼີມສະຫຼອງຄັ້ງນີ້ ເຂົ້າຮ່ວມໂດຍໄວໜຸ່ມທັງຍິງ ແລະ ຊາຍ ຈໍານວນຫຼາຍກວ່າ 500 ຄົນ ທ່າມກາງບັນຍາກາດແຫ່ງແນວຄິດສ້າງສັນ, ການສະແດງສິລະປະ, ການນຳພາຂອງໄວໜຸ່ມເພື່ອຍົກລະດັບຄວາມຮັບຜິດຊອບຕໍ່ສັງຄົມ ແລະ ສິ່ງແວດລ້ອມ ແລະ ການຖືເອົາໄວໜຸ່ມເປັນໃຈກາງຂອງນະໂຍບາຍ ແລະ ການປະຕິບັດດ້ານການພັດທະນາ.
ການສະເຫຼີມສະຫຼອງວັນໄວໜຸ່ມສາກົນໃນປີນີ້ ໄດ້ມີການດໍາເນີນກິດຈະກໍາຕ່າງໆທີ່ນຳພາໂດຍໄວໜຸ່ມ ເຊິ່ງເລີ່ມຕົ້ນຕັ້ງແຕ່ວັນທີ 11 ກໍລະກົດ ແລະ ສືບຕໍ່ຕະຫຼອດເດືອນກໍລະກົດ. ຈຸດປະສົງແມ່ນເພື່ອສ້າງພື້ນທີ່ໃຫ້ໄວໜຸ່ມ ໄດ້ຈັດກິດຈະກຳທີ່ມີແນວຄິດສ້າງສັນ ພ້ອມທັງຊຸກຍູ້ໃຫ້ໄວໜຸ່ມໄດ້ພັດທະນາຂີດຄວາມສາມາດ, ພອນສະຫວັນ ແລະ ທັກສະຂອງຕົນ.
ຫົວຂໍ້ຂອງປີນີ້: “ທັກສະສີຂຽວສຳລັບຊາວໜຸ່ມເພື່ອຄວາມຍືນຍົງຂອງໂລກ” ແມ່ນມີຄວາມສຳຄັນເປັນພິເສດ ເພາະມັນເຊື່ອມໂຍງການເຄື່ອນໄຫວດ້ານສິ່ງແວດລ້ອມ ເຂົ້າໃນວາລະການພັດທະນາຂອງໂລກ. ພາຍໃນງານມີການຈັດກິດຈະກໍາຕ່າງໆຮ່ວມກັນ ໂດຍບັນດາຄູ່ຮ່ວມງານ ພາຍໃຕ້ແຄມເປນໂຄສະນາໃນທົ່ວໂລກຂອງ UNFPA ກໍຄື: "ຂ້ອຍ, ຮ່າງກາຍຂອງຂ້ອຍ, ໂລກຂອງຂ້ອຍ,ອະນາຄົດຂອງຂ້ອຍ" ເພື່ອສົ່ງເສີມວິທີການເຮັດວຽກໂດຍຫຼາຍພາກສ່ວນທີ່ເຊື່ອມໂຍງກັນ ເພື່ອປັບປຸງສະຫວັດດີການຂອງໄວຫນຸ່ມ ໂດຍຄໍານຶງເຖິງຄວາມຕ້ອງການດ້ານສຸຂະພາບຈະເລີນພັນ ແລະ ສິດທິທາງເພດຂອງເຂົາເຈົ້າ ພ້ອມທັງຄໍານຶງເຖິງບັນຫາດ້ານສິ່ງແວດລ້ອມ; ໂດຍສະເພາະແມ່ນບັນຫາສໍາຄັນທີ່ຖ້າບໍ່ໄດ້ຮັບການແກ້ໄຂ ຈະສົ່ງຜົນກະທົບຢ່າງໜັກໜ່ວງຕໍ່ຄຸນນະພາບຊີວິດຂອງປະຊາກອນ.
ການຫັນປ່ຽນໄປສູ່ໂລກສີຂຽວທີ່ສຳເລັດຜົນ ຂຶ້ນກັບການພັດທະນາທັກສະສີຂຽວຂອງໄວໜຸ່ມລວມທັງຄວາມຮູ້ດ້ານວິຊາການ ເພື່ອໃຫ້ເຂົາເຈົ້າໄດ້ນຳໃຊ້ເຕັກໂນໂລຊີສີຂຽວ ແລະ ການປະຕິບັດທີ່ເປັນມິດຕໍ່ສິ່ງແວດລ້ອມ, ພ້ອມທັງຍຶດຖືຄຸນຄ່າ ແລະ ທັດສະນະຄະຕິຕ່າງໆ ເພື່ອຊ່ວຍເຂົາເຈົ້າໃນການຕັດສິນໃຈບັນຫາໃນການດໍາລົງຊີວິດ ທີ່ສົ່ງຜົນຕໍ່ຄວາມຍືນຍົງດ້ານສິ່ງແວດລ້ອມ.
ທ່ານ ນວນທອງ ສຸວັນວິໄຊ ກ່າວວ່າ: “ການສະເຫລີມສະຫລອງວັນໄວໜຸ່ມສາກົນ ປັດຈຸບັນໄດ້ກາຍເປັນປະເພນີປະຕິບັດ ທີ່ສ້າງໂອກາດໃຫ້ໄວໜຸ່ມໄດ້ສະແດງຄວາມສາມາດທາງດ້ານສະຕິປັນຍາ ແລະ ຮ່າງກາຍຂອງເຂົາເຈົ້າ ໂດຍຜ່ານກິດຈະກຳຕ່າງໆທີ່ເຂົາເຈົ້າອອກແບບ ແລະ ນໍາພາຈັດຕັ້ງປະຕິບັດໂດຍໄວໜຸ່ມເອງ. ການສະເຫຼີມສະຫຼອງວັນໄວໜຸ່ມສາກົນ ເປັນພື້ນທີ່ສໍາລັບຜູ້ໃຫຍ່ ແລະ ໄວຫນຸ່ມໄດ້ພົບກັນ ແລະ ສົນທະນາແລກປ່ຽນຄວາມຄິດ ແລະ ປະສົບການ ຂອງພວກເຂົາ ເພື່ອໃຫ້ມີສຽງ ແລະ ການປະກອບສ່ວນຂອງໄວຫນຸ່ມຈາກທຸກໆກຸ່ມທີ່ຫຼາກຫຼາຍ ເຂົ້າໃນໃນການພັດທະນາຂອງລາວ. ພວກເຮົາຈະບໍ່ສາມາດມີຄວາມຈະເລີນຮຸ່ງເຮືອງ ແລະ ຂະຫຍາຍຕົວໄດ້ ຖ້າບໍ່ມີການແກ້ໄຂບັນຫາການປ່ຽນແປງດິນຟ້າອາກາດ ທີ່ຄໍານຶງເຖິງບົດບາດຂອງສະມາຊິກທຸກພາກສ່ວນໃນສັງຄົມ, ໂດຍສະເພາະແມ່ນໄວໜຸ່ມທີ່ເປັນຕົວແທນເຄິ່ງໜຶ່ງຂອງປະຊາກອນໃນລາວ”.
ການສົ່ງເສີມພາວະຄວາມເປັນຜູ້ນໍາຂອງໄວໜຸ່ມ ໂດຍການສ້າງເວທີການຮຽນຮູ້, ການສະແດງຄວາມສາມາດ ແລະ ການມີສ່ວນຮ່ວມໃນສັງຄົມ ເປັນສ່ວນຫນຶ່ງຂອງແຜນພັດທະນາຊາວໜຸ່ມ ແລະ ເຍົາວະຊົນ ແລະ ຍຸດທະສາດການພັດທະນາຊາວໜຸ່ມ ແລະ ເຍົາວະຊົນ ແຫ່ງຊາດ 2021-2030 ພ້ອມທັງສະແດງເຖິງຄໍາໝາຍໝັ້ນຂອງລັດຖະບານລາວ ຕໍ່ກອງປະຊຸມສາກົນກ່ຽວກັບປະຊາກອນ ແລະ ການພັດທະນາ (ICPD25).
ກິດຈະກໍາໃນວັນງານສະເຫຼີມສະຫຼອງວັນໄວໜຸ່ມສາກົນລວມມີ ການແຂ່ງຂັນແຕ້ມຮູບ ແລະ ສະແດງລະຄອນເວທີ, ການໂຕ້ວາທີ ແລະ ເວທີສົນທະນາ, ການໂຄສະນາປູກຈິດສໍານຶກຜ່ານສື່ສັງຄົມອອນລາຍ ແລະ ອື່ນໆ. ງານສະເຫຼີມສະຫຼອງຄັ້ງນີ້ ຍັງໄດ້ເຕົ້າໂຮມຜູ້ຕາງໜ້າຈາກບັນດາກະຊວງ, ອົງການສະຫະປະຊາຊາດ, ຜູ້ໃຫ້ທຶນ, ສື່ມວນຊົນ, INGOs ແລະ ອົງການຈັດຕັ້ງທາງສັງຄົມໃນທ້ອງຖິ່ນ ແລະ ພາກເອກະຊົນ ມາເຂົ້າຮ່ວມ ເພື່ອຊຸກຍູ້ການສົນທະນາ ກ່ຽວກັບຂໍ້ລິເລີ່ມຮ່ວມກັນ ແລະ ສົ່ງເສີມບົດບາດຂອງ ໄວໜຸ່ມໃນຖານະເປັນ ຜູ້ຂັບເຄື່ອນການປ່ຽນແປງ, ຜູ້ຊ່ຽວຊານດ້ານນະວັດຕະກໍາ ແລະ ຜູ້ນໍາຂອງສປປ ລາວ ເພື່ອຍາດແຍ່ງຜົນປະໂຫຍດດ້ານປະຊາກອນ.
ທ່ານ ເວັງຊອງ ເວຍ, ຮັກສາການ ອຸປະທູດ, ສໍານັກງານຜູ້ຕາງໜ້າສະຫະພາບເອີຣົບ ປະຈໍາ ສປປລາວ ເນັ້ນຢໍ້າວ່າ: ຫົວຂໍ້ຂອງປີນີ້ແມ່ນສອດຄ່ອງກັບຈຸດປະສົງບຸລິມະສິດຂອງສະຫະພາບເອີຣົບ ແລະ ບັນດາປະເທດສະມາຊິກ ກໍຄືການສ້າງຄວາມເຂັ້ມແຂງໃຫ້ໄວໜຸ່ມໃນທົ່ວໂລກ ໃຫ້ມີບົດບາດເປັນຜູ້ນໍາໃນການຫັນປ່ຽນສີຂຽວທີ່ຈຳເປັນ ເພື່ອປົກປັກຮັກສາຜືນແຜ່ນດິນຂອງພວກເຮົາ. ເພື່ອບັນລຸຈຸດປະສົງດັ່ງກ່າວ, ສະຫະພາບເອີຣົບໄດ້ເພີ່ມທະວີການສະໜັບສະໜູນການເຄື່ອນໄຫວຂອງໄວໜຸ່ມໃນ ສປປ ລາວ ຕະຫຼອດໄລຍະ 2 ປີທີ່ຜ່ານມາ.”
ສະແດງຄວາມຊົມເຊີຍຕໍ່ທ່າແຮງຂອງໄວໜຸ່ມໃນລາວ ແລະ ຕີລາຄາສູງຄວາມໝາຍໝັ້ນໃນລະດັບຊາດ ໃນການສະໜັບສະໜູນ ແລະ ສ້າງຄວາມເຂັ້ມແຂງໃຫ້ແກ່ໄວໜຸ່ມ, ໂດຍສະເພາະແມ່ນການປົກປ້ອງ ແລະ ສົ່ງເສີມສິດທິ ແລະ ທາງເລືອກຂອງໄວໜຸ່ມ - ເຊິ່ງແມ່ນພື້ນຖານຂອງການພັດທະນາ. ທ່ານ ບາກທິຢໍ ຄາດິເຣິບ ກ່າວວ່າ: “ການລົງທຶນໃນແຜນງານເພດສຶກສາຮອບດ້ານ ແລະ ການສ້າງຄວາມເຂັ້ມແຂງໃຫ້ໄວໜຸ່ມ ແມ່ນກຸນແຈສຳຄັນໃນການສ້າງທັກສະໃຫ້ຜູ້ນຳໄວໜຸ່ມ. ທັກສະສີຂຽວແມ່ນອົງປະກອບທີ່ສໍາຄັນຂອງທັກສະທາງສັງຄົມ (soft skills) ທີ່ UNFPA ໄດ້ສະຫນອງໃຫ້ແກ່ໄວຫນຸ່ມເພື່ອຊ່ວຍໃຫ້ພວກເຂົາກຽມຄວາມພ້ອມໄດ້ດີຂຶ້ນ ແລະ ຮັບຮູ້ເຖິງລະບົບນິເວດທັງຫມົດ ທີ່ຕ້ອງການຄວາມເອົາໃຈໃສ່ຈາກໄວໜຸ່ມໃນການຕັດສິນໃຈ ແລະ ການປະຕິບັດເພື່ອການພັດທະນາ. ທາງເລືອກທີ່ເລືອກໃນມື້ນີ້ ຈະປູເສັ້ນທາງໃນອະນາຄົດຂ້າງໜ້າ ເພາະສະນັ້ນ ໄວໜຸ່ມຕ້ອງສາມາດຕັດສິນໃຈໄດ້ຢ່າງມີທາງເລືອກ ແລະ ຊາບຂໍ້ມູນ ໂດຍອີງໃສ່ສິດທິ, ບຸລິມະສິດ ແລະ ຂໍ້ມູນຂ່າວສານທີ່ມີຄຸນນະພາບ”- ທ່ານ ດຣ ບາກທິຢໍ ຄາດິເຣິບ, ຜູ້ຕາງໜ້າອົງການ UNFPA
ຕະຫຼອດປີນີ້, ອົງການ UNFPA ຈະສືບຕໍ່ສະໜັບສະໜູນບັນດາການເຄື່ອນໄຫວທີ່ນຳພາໂດຍໄວໜຸ່ມພາຍໃຕ້ແຄມເປນ: “ຂ້ອຍ, ຮ່າງກາຍຂອງຂ້ອຍ, ໂລກຂອງຂ້ອຍ, ອະນາຄົດຂອງຂ້ອຍ” ໂດຍຜ່ານການຈັດກອງປະຊຸມ, ການແຂ່ງຂັນ, ກິດຈະກໍາແກ້ໄຂບັນຫາທີ່ທ້າທາຍ, ການສະໜັບສະໜູນນະວັດຕະກຳ ແລະ ການເຕົ້າໂຮມບັນດາຄູ່ຮ່ວມງານທີ່ບໍ່ແມ່ນແບບດັ້ງເດີມເຂົ້າມາມີສ່ວນຮ່ວມເຊັ່ນ: ສື່ມວນຊົນ ແລະ ພາກເອກະຊົນ.
***
ອົງການ UNFPA ແມ່ນອົງການ ສປຊ ທີ່ສົ່ງເສີມວຽກງານສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ, ລວມທັງ ສປປ ລາວ, ເພື່ອບັນລຸການເສຍຊີວິດຂອງແມ່ໃຫ້ເປັນສູນ, ການວາງແຜນຄອບຄົວທີ່ບໍ່ໄດ້ຮັບການສະໜອງ, ຄວາມຮຸນແຮງບົນພື້ນຖານທາງເພດເປັນສູນ.
ສໍາລັບຂໍ້ມູນເພີ່ມເຕີມ, ກະລຸນາຕິດຕໍ່:
