ນະຄອນຫຼວງວຽງຈັນ, ສປປ ລາວ, ວັນທີ 29 ມີນາ 2024 – ລັດຖະບານແຫ່ງ ສປປ ລາວ, ຕາງໜ້າໂດຍກະຊວງສາທາລະນະສຸກ ໄດ້ເຜີຍແຜ່ການເລີ່ມຕົ້ນປະຕິບັດຄຳໝາຍໝັ້ນແຫ່ງຊາດກ່ຽວກັບການວາງແຜນຄອບຄົວ 2030 (Family Planning 2030 - FP2030), ເຊິ່ງເປັນການຮ່ວມມືໃນທົ່ວໂລກ ເພື່ອຮັບປະກັນໃຫ້ປະຊາຊົນທຸກຄົນສາມາດເຂົ້າເຖິງການດູແລສຸຂະພາບຈະເລີນພັນທີ່ຈໍາເປັນສໍາລັບເຂົາເຈົ້າໃນການສ້າງອະນາຄົດທີ່ດີກວ່າ.
ງານເຜີຍແຜ່ຄັ້ງນີ້ ຈັດຂຶ້ນທີ່ນະຄອນຫຼວງວຽງຈັນ ເຊິ່ງເປັນຂີດໝາຍການເລີ່ມຕົ້ນຢ່າງເປັນທາງການຂອງການປະຕິບັດຄໍາໝາຍໝັ້ນ ແຫ່ງຊາດ FP2030. ຜູ້ຕາງໜ້າຈາກບັນດາພະແນກການຂອງກະຊວງສາທາລະນະສຸກ ຕະຫຼອດຮອດບັນດາກະຊວງທີ່ກ່ຽວຂ້ອງ ເຂົ້າຮ່ວມໃນວາລະດັ່ງກ່າວກ່ຽວກັບສຸຂະພາບທາງເພດ ແລະ ສຸຂະພາບຈະເລີນພັນຄັ້ງນີ້ ເຊິ່ງລວມມີ: ກະຊວງສຶກສາທິການ ແລະ ກິລາ, ສູນກາງຊາວໜຸ່ມລາວ, ສະຫະພັນແມ່ຍິງລາວ ແລະ ອື່ນໆ ເພື່ອຢືນຢັນການມີສ່ວນຮ່ວມ ແລະ ການປະກອບສ່ວນຈາກຂະແໜງການຂອງຕົນ.
ຄໍາໝາຍໝັ້ນແຫ່ງຊາດ FP2030 ເປັນຂີດໝາຍອັນສໍາຄັນຂອງຄວາມພະຍາຍາມຂອງລາວ ໃນການເລັ່ງຄວາມຄືບໜ້າໄປສູ່ການບັນລຸການເຂົ້າເຖິງສຸຂະພາບທາງເພດ ແລະ ສຸຂະພາບຈະເລີນພັນ ແລະ ສິດຂອງໄວໜຸ່ມທົ່ວປວງຊົນໃນປີ 2030. ຄໍາໝາຍໝັ້ນແຫ່ງຊາດ FP2030 ສອດຄ່ອງກັບຄໍາໝາຍໝັ້ນຂອງ ສປປ ລາວ ຕໍ່ກັບກອງປະຊຸມສາກົນດ້ານປະຊາກອນ ແລະ ການພັດທະນາ (ICPD) ແລະ ຕໍ່ຍອດບັນດານະໂຍບາຍ, ໂຄງການ ແລະ ຄວາມຄືບໜ້າຂອງລັດຖະບານໃນໄລຍະ 30 ປີທີ່ຜ່ານມາ, ນັບຕັ້ງແຕ່ ສປປ ລາວ ໄດ້ໃຫ້ຄໍາໝາຍໝັ້ນໃນ ICPD ໃນປີ 1994.
ພາຍໃຕ້ FP2030, ສປປ ລາວ ໝາຍໝັ້ນທີ່ຈະ ກ) ປັບປຸງການເຂົ້າເຖິງລະບົບສຸຂະພາບທີ່ຕອບສະໜອງຄວາມຕ້ອງການຂອງເຍົາວະຊົນ ແລະ ໄວໜຸ່ມ ເພື່ອສົ່ງເສີມການຄຸມກຳເນີດ; ຂ) ຮັບປະກັນໃຫ້ມີການບໍລິການທີ່ເປັນມິດຕໍ່ໄວໜຸ່ມທີ່ມີຄຸນນະພາບ ແລະ ປອດໄພ ພ້ອມທັງມີຂໍ້ມູນ ແລະ ການບໍລິການ ການວາງແຜນຄອບຄົວ ເພື່ອຫຼຸດຜ່ອນຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງ ຂອງເຍົາວະຊົນ ແລະ ໄວໜຸ່ມອາຍຸ 15-24 ປີ ໃຫ້ເຫຼືອ 12 ສ່ວນຮ້ອຍໃນປີ 2030; ຄ) ເພີ່ມການມີຢາຄຸມກຳເນີດ ແລະ ຜະລິດຕະພັນຄຸມກໍາເນີດຈາກ 53 ສ່ວນຮ້ອຍ ເປັນ 100 ສ່ວນຮ້ອຍ ໃນຂະນະດຽວກັນກໍຮັບປະກັນບໍ່ໃຫ້ຜະລິດຕະພັນຂາດສາງ; ແລະ ງ) ເພີ່ມກອງທຶນວາງແຜນຄອບຄົວເພື່ອສະໜັບສະໜູນການມີຜະລິດຕະພັນຄຸມກໍາເນີດໃນຊຸມຊົນ ແລະ ຂັ້ນຮາກຖານ.
ພະນະທ່ານ ສຈ. ປອ. ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ ໄດ້ກ່າວຕໍ່ພິທີດັ່ງກ່າວວ່າ: “ຮຽນ ບັນດາທ່ານ ແຂກຜູ້ມີກຽດ ທັງພາຍໃນ ແລະ ຕ່າງປະເທດ ຂ້າພະເຈົ້າຕາງໜ້າໃຫ້ກັບລັດຖະບານແຫ່ງ ສປປ ລາວ ໃນການທີ່ຈະບັນລຸເປົ້າໝາຍ ການພັດທະນາແບບຍືນຍົງ SDG3 ນັ້ນ ຂ້າພະເຈົ້າ ຂໍຖືໂອກາດນີ້ ປະກາດເປັນທາງການວ່າ ຄຳໝາຍໝັ້ນຂອງ ສປປ ລາວ ຕໍ່ກັບວິໄສທັດ ວຽກງານງານວາງແຜນຄອບຄົວ ປີ 2030 ແມ່ນ ເພື່ອອະນາຄົດທີ່ສາມາດເຂົ້າເຖິງທາງເລືອກ ແລະ ການບໍລິການ ສຳລັບທຸກຄົນ ທີ່ມີຄວາມຕ້ອງການ ວາງແຜນຄອບຄົວ ແລະ ມີສຸຂະພາບຈະເລີນພັນທີ່ດີ. ຂ້າພະເຈົ້າຂໍສະແດງຄວາມຂອບໃຈ ມາຍັງທຸກພາກສ່ວນ ທີ່ສະຫຼະເວລາເຂົ້າຮ່ວມງານໃນຄັ້ງນີ້ ແລະ ຫວັງຢ່າງຍິງວ່າ ພວກເຮົາທຸກຄົນ, ທຸກຂະແໜງການ, ທຸກອົງການຈັດຕັ້ງຈະຮ່ວມແຮງຮ່ວມໃຈກັນ ໃນການບັນລຸເປົ້າ ໝາຍຕ່າງໆ ໃນຄຳໝາຍໝັ້ນນີ້ ເພື່ອໃຫ້ປະຊາຊົນລາວບັນດາເຜົ່າ ມີສຸຂະພາບຈະເລີນພັນທີ່ດີຂຶ້ນທຸກທົ່ວໜ້າ”.
"ສປປ ລາວ ມີຜົນຮັບອັນໃຫຍ່ຫຼວງຕໍ່ການປະຕິບັດວິໄສທັດຂອງ ICPD ທີ່ຈະຖືເອົາກຽດສັກສີຂອງແມ່ຍິງ, ເດັກຍິງ ແລະ ໄວຫນຸ່ມ ແລະ ສິດທິມະນຸດ ລວມທັງສິດທິໃນການວາງແຜນຄອບຄົວຂອງຕົນເອງ ເປັນໃຈກາງຂອງວາລະການພັດທະນາໃນປະເທດ. ໃນປັດຈຸບັນ, ດ້ວຍການສະຫນັບສະຫນູນຂອງ UNFPA ແລະ ຄູ່ຮ່ວມງານອື່ນໆ ພວກເຮົາຈໍາເປັນຕ້ອງໄດ້ກ້າວໄປໄວກ່ວາເກົ່າ, ພວກເຮົາຈໍາເປັນຕ້ອງເຂົ້າໃຫ້ເຖິງທຸກຄົນ, ຮັບປະກັນການມີບໍລິການ ທີ່ສາມາດເຂົ້າເຖິງໄດ້ ແລະ ມີຄຸນນະພາບດີ ແລະ ບໍ່ປະໃຜໄວ້ຂ້າງຫຼັງ. ຄໍາໝາຍໝັ້ນ FP2030 ມາໃນເວລາທີ່ເໝາະສົມ, ກ່ອນໜ້າທີ່ລັດຖະບານ ແຫ່ງ ສປປ ລາວຈະເຂົ້າຮ່ວມກອງປະຊຸມຄະນະກໍາມະການກ່ຽວກັບປະຊາກອນ ແລະ ການພັດທະນາ ຄັ້ງທີ 57 ເພື່ອແລກປ່ຽນການປະຕິບັດທີ່ດີທີ່ສຸດຂອງປະເທດລາວກ່ຽວກັບວຽກງານຜະດຸງຄັນ ພ້ອມທັງເນັ້ນເຖິງການມີສ່ວນຮ່ວມຢ່າງເຕັມທີ່ຂອງພວກເຮົາ ເພື່ອເຮັດໃຫ້ການພັດທະນາມະນຸດເປັນໃຈກາງຂອງນະໂຍບາຍ ແລະ ແຜນງານຂອງພວກເຮົາ.'' ກ່າວໂດຍ ທ່ານ ດຣ ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ.
ກອງປະຊຸມລະດັບສູງຄັ້ງນີ້ ຍັງເປັນໂອກາດສໍາຄັນເພື່ອຍົກສູງຄວາມຮັບຮູ້ໃຫ້ບັນດາພາກສ່ວນກ່ຽວຂ້ອງກ່ຽວກັບຜົນຕອບແທນຈາກການລົງທຶນໃນການບໍລິການວາງແຜນຄອບຄົວແບບສະໝັກໃຈເພື່ອແນໃສ່ຮັບປະກັນຄໍາໝາຍໝັ້ນຈາກທຸກກະຊວງ, ແລະ ຊຸກຍູ້ການລະດົມແຫຼ່ງທຶນຕື່ມອີກ ທັງຈາກພາຍໃນປະເທດ ແລະ ການໜູນຊ່ວຍຈາກສາກົນ.
FP2030 ເປັນການຮ່ວມມືໃນທົ່ວໂລກ ທີ່ປະກອບດ້ວຍ 100 ກວ່າປະເທດ, ຜູ້ໃຫ້ທຶນ, ອົງການຈັດຕັ້ງທາງສັງຄົມ ແລະ ພາກເອກະຊົນ ເພື່ອຮັບປະກັນໃຫ້ທຸກຄົນໄດ້ຮັບການດູແລສຸຂະພາບຈະເລີນພັນທີ່ຈຳເປັນເພື່ອສ້າງອານາຄົດທີ່ດີກວ່າ. ນັບຕັ້ງແຕ່ເລີ່ມເຜີຍແຜ່ FP2030 ໃນປີ 2012, FP2030 ໄດ້ຊ່ວຍໃຫ້ບັນລຸຄວາມຄືບຫນ້າທີ່ສໍາຄັນໃນການປັບປຸງສຸຂະພາບຈະເລີນພັນ ແລະ ສິດທິຂອງໄວໜຸ່ມໃນທົ່ວໂລກ.
ທ່ານ ນາງ ສຸມິຕາ ບາເນີຈີ (Sumita Banerjee), ຜູ້ອໍານວຍການ ໜ່ວຍງານວາງແຜນຄອບຄົວອາຊີ ແລະ ປາຊີຟິກ FP2030, ກ່າວວ່າ “ພວກເຮົາຈາກ FP2030 ຂໍສະແດງຄວາມຍິນດີກັບກະຊວງສາທາລະນະສຸກ, UNFPA, ພາກສ່ວນກ່ຽວຂ້ອງທັງໝົດ, ແລະ ພົນລະເມືອງຂອງ ສປປ ລາວ ຕໍ່ກັບຄໍາໝາຍໝັ້ນ FP2030 ຂອງລາວ. ຂໍ້ລິເລີ່ມນີ້ ແມ່ນບາດກ້າວອັນສໍາຄັນໃນການພັດທະນາການວາງແຜນຄອບຄົວ ແລະ ສິດທິດ້ານສຸຂະພາບຈະເລີນພັນ ແລະ ທາງເລືອກສຳລັບທຸກຄົນ, ໂດຍເນັ້ນໃສ່ການປັບປຸງລະບົບສຸຂະພາບທີ່ຕອບສະໜອງຕາມຄວາມຕ້ອງການຂອງໄວໜຸ່ມ, ການສະໜອງການບໍລິການທີ່ມີຄຸນນະພາບ ແລະ ການຮັບປະກັນການຄຸມກຳເນີດ ແລະ ການມີຜະລິດຕະພັນຄຸມກໍາເນີດ. ຊ່ວງເວລາແຫ່ງປະຫວັດສາດນີ້ ສະແດງໃຫ້ເຫັນເຖິງທ່າກ້າວອັນສຳຄັນໃນການຫຼຸດຄວາມຕ້ອງການດ້ານການວາງແຜນຄອບຄົວທີ່ບໍ່ໄດ້ຮັບການຕອບສະໜອງ, ສະກັດກັ້ນການຖືພາຂອງໄວໜຸ່ມ, ເພີ່ມການສ້າງຄວາມເຂັ້ມແຂງໃຫ້ໄວໜຸ່ມ ໂດຍສະເພາະສະໜັບສະໜູນສຸຂະພາບຈະເລີນພັນຂອງແມ່ຍິງໃຫ້ສອດຄ່ອງກັບກົດລະບຽບດ້ານສຸຂະພາບສາກົນ. ຄໍາໝາຍໝັ້ນດັ່ງກ່າວ ໝາຍເຖິງພັນທະສັນຍາວ່າ ປະເທດລາວ ແລະ ປະຊາຊົນລາວ ຈະມີອະນາຄົດທີ່ສົດໃສແລະ ມີສຸຂະພາບເຂັ້ມແຂງກວ່າເກົ່າ.”
ການເລີ່ມຕົ້ນ ຄໍາໝາຍໝັ້ນ FP2030 ໃນ ສປປ ລາວ ເປັນບາດກ້າວອັນສໍາຄັນຕໍ່ວຽກງານ ສຸຂະພາບ ແລະ ສິດທິດ້ານການຈະເລີນພັນໃນປະເທດ. ພາຍໃຕ້ຄໍາໝາຍໝັ້ນດັ່ງກ່າວ, ສປປ ລາວ ຈະມຸ່ງໜ້າສະໜັບສະໜູນໄວໜຸ່ມ ທັງຍິງ ແລະ ຊາຍ ໃນການເລື່ອນການຖືພາ ແລະ ການແຕ່ງງານຈົນກວ່າຈະເປັນໄວໜຸ່ມ ໂດຍຊ່ວຍໃຫ້ພວກເຂົາມີ ທັກສະ ແລະ ຄວາມສາມາດ, ໄດ້ຮັບການບໍລິການດູແລ ແລະ ການວາງແຜນຄອບຄົວ ແລະ ເຂົ້າເຖິງຜະລິດຕະພັນການວາງແຜນຄອບຄົວ. ສ ປປ ລາວ ຈະເສີມຂະຫຍາຍບັນດາໂຄງການຂອງຊຸມຊົນແລະ ຮັບປະກັນການມີຜະລິດຕະພັນສຸຂະພາບຈະເລີນພັນ ເພື່ອຮັບປະກັນໃຫ້ທຸກໆການຖືພາເປັນທາງເລືອກ, ປົກປ້ອງສຸຂະພາບຂອງແມ່ເພື່ອບໍ່ໃຫ້ແມ່ຍິງເສຍຊີວິດໃນຂະນະທີ່ເກີດລູກ, ແລະ ຮັບປະກັນໃຫ້ແມ່ຍິງ ແລະເດັກຍິງມີຊີວິດທີ່ປອດໄພຈາກການໃຊ້ຄວາມຮຸນແຮງ. ນີ້ແມ່ນເງື່ອນໄຂພື້ນຖານທີ່ຈຳເປັນສໍາລັບແມ່ຍິງ, ເດັກຍິງ ແລະ ໄວໜຸ່ມໃນການສືບຕໍ່ເຂົ້າໂຮງຮຽນ, ທັບມ້າງຄວາມເຂົ້າໃຈ ແລະ ບັນທັດຖານຂອງສັງຄົມທີ່ຜິດ, ຫຼີກລ່ຽງການເພິ່ງພາອາໄສຄົນອື່ນ ແລະ ການຖືກລະເມີດ, ເຂົ້າເຖິງໂອກາດວຽກເຮັດງານທຳທີ່ດີເພື່ອບັນລຸຄວາມສາມາດບົ່ມຊ້ອນຂອງຕົນໄດ້ຢ່າງເຕັມທີ່ ແລະເພື່ອໃຫ້ປະເທດໄດ້ບັນລຸການພັດທະນາເສດຖະກິດສັງຄົມ.
ທ່ານ ດຣ ບາກທິຢໍ ຄາດິເຣິບ, ຜູ້ຕາງຫນ້າຂອງ UNFPA ກ່າວວ່າ, “ການວາງແຜນຄອບຄົວທີ່ປອດໄພ ແລະ ສະໝັກໃຈ ແມ່ນສິດທິພື້ນຖານຂອງມະນຸດ. ການວາງແຜນຄອບຄົວທີ່ອີງໃສ່ສິດທິແມ່ນການລົງທຶນທີ່ກຸ້ມຄ່າທີ່ສຸດ ທີ່ສະຫນອງຜົນປະໂຫຍດດ້ານສຸຂະພາບ, ສັງຄົມ ແລະ ເສດຖະກິດທີ່ກວ້າງຂວາງສໍາລັບແມ່ຍິງ ແລະ ເດັກຍິງ ພ້ອມທັງ ຄອບຄົວ ແລະ ຊຸມຊົນຂອງພວກເຂົາ ແລະ ປະເທດຊາດໂດຍລວມ.
ການຫຼຸດຈໍານວນການຖືພາໂດຍບໍ່ຕັ້ງໃຈ ເປັນປັດໄຈສໍາຄັນສໍາລັບ ຄວາມສະເໝີພາບລະຫວ່າງຍິງ-ຊາຍ ແລະ ການສ້າງຄວາມເຂັ້ມແຂງຂອງແມ່ຍິງ ແລະ ເປັນປັດໄຈຫຼັກໃນການຫຼຸດຜ່ອນຄວາມທຸກຍາກ, ເພີ່ມຄວາມອາດສາມາດຂອງຄົນໃຫ້ສ້າງອະນາຄົດທີ່ດີກວ່າໃຫ້ແກ່ຕົນເອງ, ຄອບຄົວ, ຊຸມຊົນ ແລະ ທົ່ວປວງຊົນທັງຊາດ ແລະ ທັງໝົດນີ້ ກໍຮັບປະກັນໃຫ້ປະເທດລາວບັນລຸຜົນປະໂຫຍດຂອງໄວໜຸ່ມ.”
ໃນລາວ, ການວາງແຜນຄອບຄົວຕ້ອງການງົບປະມານເພີ່ມອີກ 16,7 ລ້ານໂດລາ ໃນປີ 2030 ເຊິ່ງຈະສ້າງຜົນຮັບໄດ້ເຖິງ 560 ລ້ານໂດລາ, ອັດຕາສ່ວນຜົນປະໂຫຍດຕໍ່ຕົ້ນທຶນແມ່ນ 33,6. ໂດຍການລົງທຶນໃນກິດຈະກໍາທີ່ໃຊ້ງົບປະມານໜ້ອຍທີ່ສຸດເຊັ່ນ ວິທີການວາງແຜນຄອບຄົວທີ່ອີງໃສ່ສິດທິ ແລະ ຮັບປະກັນໃຫ້ມີການບໍລິການໃນທຸກແຂວງ, ສ ປປ ລາວ ຈະສາມາດປ້ອງກັນການຖືພາໂດຍບໍ່ຕັ້ງໃຈໄດ້ເຖິງ 1,044,888 ກໍລະນີ ເຊິ່ງສາມາດຫຼຸດຜ່ອນຄ່າໃຊ້ຈ່າຍດ້ານສຸຂະພາບອື່ນໆ ພ້ອມທັງສ້າງຜົນປະໂຫຍດທາງດ້ານເສດຖະກິດໄດ້ ຈາກການມີກໍາລັງແຮງງານເພີ່ມຂຶ້ນ, ໄວໜຸ່ມໄດ້ສືບຕໍ່ຮຽນໜັງສືໃນໂຮງຮຽນ, ແມ່ຍິງມີລາຍຮັບຕະຫຼອດຊີວິດເພີ່ມຂຶ້ນ ແລະ ໃນທີ່ສຸດ ປະຊາຊົນຈະມີການເປັນຢູ່ທີ່ດີ ແລະ ຄອບຄົວ ແລະ ຊຸມຊົນຂອງພວກເຂົາມີຄວາມຈະເລີນຮຸ່ງເຮືອງ.
_____
ອົງການ UNFPA ແມ່ນ ອົງການສະຫະປະຊາຊາດກອງທຶນ ສໍາລັບ ປະຊາກອນ ທີ່ເຮັດວຽກຢູ່ໃນຫຼາຍກວ່າ 150 ປະເທດ ລວມທັງ ສປປ ລາວ, ເພື່ອບັນລຸເປົ້າຫມາຍເຮັດໃຫ້ການເສຍຊີວິດ ຂອງແມ່ເປັນສູນ, ການບໍ່ຕອບສະຫນອງຕໍ່ຄວາມຕ້ອງການ ສໍາລັບການວາງແຜນຄອບຄົວ ເປັນສູນ ແລະ ເຮັດໃຫ້ຄວາມ ຮຸນແຮງບົນພື້ນຖານທາງເພດເປັນສູນ.
ສຳລັບຂໍ້ມູນເພີ່ມເຕີມ, ກະລຸນາຕິດຕໍ່:
laos.office@unfpa.org
