ນະຄອນຫຼວງວຽງຈັນ, 21 ມີນາ 2025 - ກະຊວງແຜນການ ແລະ ການລົງທຶນ, ພາຍໃຕ້ການ ສະໜັບສະໜູນຈາກກອງທຶນສະຫະປະຊາຊາດສຳລັບປະຊາກອນ ພ້ອມດ້ວຍບັນດາຄູ່ຮ່ວມງານ ທັງພາຍໃນ ແລະ ຕ່າງປະເທດ, ໄດ້ຈັດກອງປະຊຸມ ປຶກສາຫາລື ເພື່ອກະກຽມການສ້າງຕັ້ງຄະນະກຳມະການແຫ່ງຊາດ ວ່າດ້ວຍປະຊາກອນ ແລະ ການພັດທະນາ ພາຍໃຕ້ ນະໂຍບາຍແຫ່ງຊາດວ່າດ້ວຍປະຊາກອນ ແລະ ການພັດທະນາ 2019-2030, ເຊິ່ງເປັນໜຶ່ງໃນຍຸດທະສາດທີ່ ຖືກອອກແບບມາ ເພື່ອເລັ່ງລັດ ການຈັດຕັ້ງ ປະຕິບັດນະໂຍບາຍແຫ່ງຊາດວ່າດ້ວຍປະຊາກອນ ແລະ ການພັດທະນາ 2019–2030, ແນໃສ່ບັນລຸ ເປົ້າໝາຍການພັດທະນາແບບຍືນຍົງ ແລະ ຕິດຕາມຄວາມຄືບໜ້າການຈັດຕັ້ງປະຕິບັດ ແຜນດຳເນີນ ງານກອງປະຊຸມສາກົນ ວ່າດ້ວຍປະຊາກອນ ແລະ ການພັດທະນາ.
ການສ້າງຕັ້ງຄະນະກຳມະການແຫ່ງຊາດວ່າດ້ວຍປະຊາກອນຈະເປັນບາດກ້າວສຳຄັນໃນຄວາມພະຍາຍາມ ຂອງ ສປປ ລາວ ເຮັດໃຫ້ວຽກງານປະຊາກອນ ແລະ ການພັດທະນາ ກາຍເປັນຈຸດໃຈກາງ ຂອງການ ວາງແຜນພັດທະນາປະເທດຊາດ, ພ້ອມທັງສົ່ງເສີມການພັດທະນາແບບມີສ່ວນຮ່ວມ, ເທົ່າທຽມ ແລະ ຍືນຍົງ ໃນຂະນະທີ່ປະເທດກຳລັງເດີນບົນເສັ້ນທາງຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ.
ເນື່ອງຈາກວ່າປະຊາກອນ 60% ຂອງ ສປປ ລາວ ມີອາຍຸຕ່ຳກວ່າ 25 ປີ, ຈຶ່ງເປັນໂອກາດອັນສຳຄັນໃນການນຳ ໃຊ້ຜົນຕອບແທນທາງດ້ານປະຊາກອນດັ່ງກ່າວ. ໜ້າວຽກບູລິມະສິດສຳຄັນຂອງ ຄະນະກຳມະການແຫ່ງ ຊາດວ່າດ້ວຍປະຊາກອນກວມເອົາຫລາຍຂົງເຂດເປັນຕົ້ນ: ສຸຂະພາບຈະເລີນພັນ, ການປ່ຽນແປງທາງ ດ້ານປະຊາກອນ, ການສ້າງຄວາມເຂັ້ມແຂງໃຫ້ຊາວໜຸ່ມ, ສັງຄົມຜູ້ສູງອາຍຸ ແລະ ການນຳໃຊ້ຜົນຕອບ ແທນທາງດ້ານປະຊາກອນຢ່າງມີຍຸດທະສາດ.
ເພື່ອນຳໃຊ້ກາລະໂອກາດດັ່ງກ່າວ, ການປະສານງານກັບຫຼາຍພາກສ່ວນ ແລະ ຂະແໜງການຕ່າງໆ ແມ່ນ ມີຄວາມຈຳເປັນເພື່ອຮັບປະກັນໃຫ້ມີການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ແລະ ຮັບ ປະກັນບໍ່ປະໃຜໄວ້ຂ້າງຫຼັງ. ແຜນພັດທະນາປະຊາກອນແຫ່ງຊາດ ຂອງ ສປປ ລາວ ໄດ້ສ້າງຂຶ້ນບົນພື້ນຖານ ເນື້ອໃນຈິດໃຈຂອງກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ. ນະໂຍບາຍດັ່ງກ່າວ ໄດ້ຊ່ວຍ ສ້າງກອບການດຳເນີນງານທີ່ຮັດກຸມເປັນບ່ອນອີງໃນການແກ້ໄຂບັນຫາສຳຄັນຕ່າງໆເຊັ່ນ: ສຸຂະພາບຈະເລີນພັນ, ການພັດທະນາຊາວໜຸ່ມ, ຄວາມສະເໝີພາບລະຫວ່າງຍິງ-ຊາຍ.
ການສ້າງຕັ້ງຄະນະກຳມະການປະສານງານວ່າດ້ວຍ ປະຊາກອນ ແລະ ການພັດທະນາ ສະແດງໃຫ້ເຫັນເຖິງ ຄວາມມຸ່ງໝັ້ນອັນແຮງກ້າຂອງລັດຖະບານພວກເຮົາໃນການເຊື່ອມໂຍງວຽກງານປະຊາກອນເຂົ້າກັບວຽກບູລິ ມະສິດຂອງການພັດທະນາຂອງພວກເຮົາ. ແນວຄວາມຄິດລິເລີ່ມນີ້ແມ່ນການຜັນຂະຫຍາຍຜົນການພົບປະ ລະດັບພາກພື້ນ ແລະ ກັບປະເທດກຳປູເຈຍ. ເພາະມີການເພີ່ມທະວີການປະສານງານລະຫວ່າງກະຊວງ, ແຂວງ ແລະ ຄູ່ຮ່ວມງານ, ຄະນະກຳມະການປະສານງານວ່າດ້ວຍນະໂຍບາຍປະຊາກອນຈະເປັນ ເວທີອັນຊົງພະລັງ, ຜັກດັນການຈັດຕັ້ງປະຕິບັດນະໂຍບາຍແຫ່ງຊາດວ່າດ້ວຍປະຊາກອນ ແລະ ການພັດທະນາ (2019–2030) ໃຫ້ປະກົດເປັນຈິງ ແລະ ນຳຜົນປະໂຫຍດມາສູ່ ສປປ ລາວ. ພວກເຮົາເຊື່ອວ່າກົນໄກປະສານງານ ນີ້ຈະບໍ່ພຽງ ແຕ່ຮັບປະກັນການຈັດຕັ້ງປະຕິບັດວຽກງານໃຫ້ມີປະສິດທິຜົນເທົ່ານັ້ນ, ແຕ່ຍັງຮັບປະກັນຜົນຕອບແທນສູງສຸດ ທາງດ້ານປະຊາກອນ, ຊ່ວຍສະໜັບສະໜູນ ສ້າງຄວາມສະເໝີພາບ ລະຫວ່າງຍິງ-ຊາຍ ແລະ ປັບປຸງຊີວິດ ການເປັນຢູ່ຂອງປະຊາຊົນລາວ. ຍ້ອນໄດ້ຮັບການຮ່ວມມືຈາກທຸກຂະແໜງການ, ພວກເຮົາມີຄວາມໝັ້ນໃຈວ່າ ຄະນະກຳມະການນີ້ຈະຊ່ວຍໃຫ້ ພວກເຮົາຍັບເຂົ້າໃກ້ວິໄສທັດການພັດທະນາ 2030 ຂອງພວກເຮົາຫຼາຍຂຶ້ນ." ທ່ານ ນາງ ພອນວັນ ອຸທາວົງ, ຮອງລັດຖະມົນຕີ, ກະຊວງແຜນ ການ ແລະ ການລົງທຶນ
ການລິເລີ່ມນີ້ແມ່ນໜຶ່ງໃນ 14 ຂໍ້ສະເໜີແນະທີ່ສຳຄັນ ແລະ ຂໍ້ຮຽກຮ້ອງໃຫ້ມີການຈັດຕັ້ງປະຕິບັດ ທີ່ຖືກ ຮັບຮອງໃນ ກອງປະຊຸມແຫ່ງຊາດວ່າດ້ວຍປະຊາກອນ ແລະ ການພັດທະນາ ຄັ້ງທີ 1 ທີ່ໄດ້ຈັດຂຶ້ນໃນເດືອນຕຸລາ 2023 ແລະ ສອດຄ່ອງກັບຄຳໝາຍໝັ້ນຂອງ ສປປ ລາວ ທີ່ຖະແຫລງ ໃນກອງປະຊຸມວ່າດ້ວຍປະຊາກອນ ອາຊີ ແລະ ປາຊີຟິກຄັ້ງທີ 7 (ເດືອນພະຈິກ 2023) ແລະ ກອງປະຊຸມຄະນະກຳມາທິການວ່າດ້ວຍປະຊາກອນ ແລະ ການພັດທະນາສະໄໝທີ 57 (ເດືອນເມສາ 2024).
ນອກຈາກນັ້ນ, ໃນຕົ້ນປີນີ້, ຄະນະຜູ້ແທນຂັ້ນສູງຂອງ ສປປ ລາວ ໄດ້ເດີນທາງໄປສຶກສາວຽກງານ ຢູ່ລາຊະອານາຈັກກຳປູເຈຍ ເພື່ອແລກປ່ຽນບົດຮຽນກ່ຽວກັບການສ້າງຕັ້ງຄະນະກຳມະການທີ່ຖຶກສ້າງຂຶ້ນເພາະ ປະສານງານການຈັດຕັ້ງປະຕິບັດກອບຍຸດທະສາດ ແຜນປະຕິບັດງານຂອງ ກອງປະຊຸມສາກົນວ່າດ້ວຍ ປະຊາກອນ ແລະ ການພັດທະນາ. ອີງໃສ່ຂໍ້ສະເໜີແນະ ແລະ ບົດຮຽນຈາກການສຶກສາວຽກງານດັ່ງກ່າວ, ກົມຮ່ວມມືສາກົນ ແລະ ກົມແຜນການ, ກະຊວງແຜນການ ແລະ ການລົງທຶນ, ໂດຍການສະໜັບສະໜູນຈາກ ອົງການ ສະຫະປະຊາຊາດ ກອງທຶນສຳລັບປະຊາກອນ, ໄດ້ເລີ່ມຕົ້ນຮ່າງທີໂອອາ ແລະ ຄອນເຊັບ ກ່ຽວກັບຄະນະກຳມະການແຫ່ງຊາດກ່ຽວກັບປະຊາກອນ. ເພື່ອຮັບປະກັນວ່າເອກະສານ ເຫຼົ່ານີ້ເໝາະສົມ ກັບສະພາບແວດລ້ອມ ແລະ ເງືອນໄຂ ຂອງ ສປປ ລາວ ແລະ ສາມາດຈັດຕັ້ງ ປະຕິບັດໄດ້ຢ່າງ ມີປະສິດທິຜົນ, ຈື່ງໄດ້ຈັດກອງປະຊຸມປຶກສາຫາລືຄັ້ງນີ້ຂຶ້ນເພື່ອເກັບກຳຂໍ້ມູນຈາກທຸກພາກສ່ວນ ເພື່ອກວດກາຄືນ ແລະ ສັງລວມເປັນຮ່າງເອກະສານ.
ຄະນະກຳມະການແຫ່ງຊາດວ່າດ້ວຍປະຊາກອນຈະເປັນເວທີຕົ້ນຕໍສຳລັບການປະສານງານ, ການເຊື່ອມໂຍງ ນະໂຍບາຍ, ການຕິດຕາມກວດກາ ແລະ ການລະດົມຊັບພະຍາກອນຈາກທົ່ວຂະແໜງການຂອງລັດຖະບານ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ພາກເອກະຊົນ ແລະ ຄູ່ຮ່ວມພັດທະນາ. ຈຸດປະສົງຫຼັກຂອງ ຄະນະກຳມະການດັ່ງກ່າວມີດັ່ງຕໍ່ໄປນີ້:
- ອຳນວຍຄວາມສະດວກ ແລະ ຊຸກຍູ້ກໃຫ້ມີການຮ່ວມມືລະຫວ່າງຂະແໜງການຕ່າງໆທີ່ກ່ຽວຂ້ອງ ເພື່ອຈັດ ຕັ້ງປະຕິບັດນະໂຍບາຍແຫ່ງຊາດວ່າດ້ວຍປະກອນ ແລະ ການພັດທະນາ
- ເຊື່ອມໂຍງວຽກງານຂອງປະຊາກອນເຂົ້າໃນທຸກລະດັບຂອງການວາງແຜນພັດທະນາແຫ່ງຊາດ
- ເປັນກອບສຳລັບເພື່ອກວດກາຕິດຕາມ ແລະ ປະເມີນຜົນທີ່ເຂັ້ມແຂງ
- ລະດົມຊັບພະຍາກອນ ແລະ ການສະໜັບສະໜູນບູລິມະສິດດ້ານປະຊາກອນ ແລະ ການພັດທະນາ
- ສົ່ງເສີມການແບ່ງປັນຄວາມຮູ້ ແລະ ການນຳໃຊ້ຂໍ້ມູນເພື່ອເປັນແນວທາງໃນການກຳນົດທິດທາງ
ການສ້າງຕັ້ງຄະນະກຳມະການປະສານງານນະໂຍບາຍປະຊາກອນ ເປັນບາດກ້າວຍຸດທະສາດທີ່ ສອດຄ່ອງກັບ ສະພາບການ, ແນໃສ່ປັບປຸງກົນໄກແຫ່ງຊາດໃນການຈັດຕັ້ງປະຕິບັດນະໂຍບາຍວ່າດ້ວຍ ປະຊາກອນ ແລະ ການພັດທະນາ. ໂດຍການສົ່ງເສີມການຮ່ວມມືກັບທຸກຂະແໜງການ ແລະ ສອດຄ່ອງກັບບູລິມະສິດ ແຫ່ງຊາດ ແລະ ພັນທະຂອງ ສປປ ລາວ ຕໍ່ສາກົນ, ການສ້າງຕັ້ງຄະນະກຳມະການປະສານງານນະໂຍບາຍປະຊາ ກອນນີ້ຈະຊ່ວຍຮັບປະກັນການປະສານງານ, ການຕິດຕາມກວດກາ, ແລະ ການລະດົມຊັບພະຍາກອນ ຢ່າງມີປະສິດທິຜົນ. ນອກຈາກນີ້, ມັນຍັງເປັນໂອກາດຂອງ ສປປ ລາວ ທີ່ຈະສ້າງຄວາມເຂົ້າໃຈ ຕໍ່ທຸກພາກສວ່ນກ່ຽວກັບຄວາມສຳຄັນຂອງວຽກງານປະຊາກອນ ແລະ ສົ່ງເສີມການວາງແຜນໂດຍອີງ ໃສ່ຂໍ້ມູນ ຮັບປະກັນໃຫ້ທຸກຄົນໄດ້ຮັບຜົນປະໂຫຍດ, ໂດຍສະເພາະກຸ່ມຄົນທີ່ດ້ອຍໂອກາດທີ່ສຸດ. ອົງການສະຫະ ປະຊາຊາດ ກອງທຶນສຳລັບປະຊາກອນຍຶດໝັ້ນທີ່ຈະສະໜັບສະໜູນຂະບວນການເຫຼົ່ານີ້ ແລະ ເຮັດວຽກຢ່າງ ໃກ້ຊິດກັບກະຊວງແຜນການ ແລະ ການລົງທຶນ ແລະ ຄູ່ຮ່ວມງານທັງໝົດເພື່ອ ປ່ຽນນະໂຍບາຍ ໃຫ້ກາຍເປັນ ຮູບປະທຳ " ດຣ. ບັກຕີຢໍ ກາດີໂຣບ
ຄະນະກຳມະການດັ່ງກ່າວຈະປະກອບມີກະຊວງແຜນການ ແລະ ການລົງທຶນ ເປັນປະທານ ແລະ ຜູ້ຕາງໜ້າຈາກບັນດາກະຊວງ, ອົງການປົກຄອງແຂວງ ແລະ ເມືອງ, ອົງການຈັດຕັ້ງມະຫາຊົນ, ອົງການຈັດ ຕັ້ງທາງສັງຄົມ ແລະ ອົງການຈັດຕັ້ງສາກົນ. ຫ້ອງການກອງເລຂາ ທີ່ຈະຖືກສ້າງສະເພາະກິດ ຈະຊ່ວຍຊຸກຍູ້ການ ດຳເນີນງານ ແລະ ຮັບປະກັນການສື່ສານ, ການປະສານງານ ແລະ ການຕິດຕາມຜົນການ ຈັດຕັ້ງປະຕິບັດວຽກ ງານຢ່າງມີປະສິດທິຜົນ.
