ວັນທີ 17 ຕຸລາ 2023, ນະຄອນຫຼວງວຽງຈັນ, ສປປ ລາວ – ສະຖາບັນສາທາລະນະສຸກສາດ ແລະ ການແພດເຂດຮ້ອນ (ສສກ) ແລະ ອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ໄດ້ຈັດກອງປະຊຸມປະຈຳປີ ຄັ້ງທີ 8 ວ່າດ້ວຍການຄົ້ນຄວ້າວິທະຍາສາດ ກ່ຽວກັບໄວໜຸ່ມ, ທີ່ນະຄອນຫຼວງວຽງຈັນ ພາຍໃຕ້ຫົວຂໍ້ “ສະຖານະພາບປັດຈຸບັນ ກ່ຽວກັບສຸຂະພາບ ແລະ ການພັດທະນາໄວໜຸ່ມ.” ກອງປະຊຸມນີ້ໄດ້ຍົກໃຫ້ເຫັນຫຼັກຖານການຄົ້ນຄວ້າທີ່ຜ່ານມາກ່ຽວກັບສຸຂະພາບ ແລະ ການພັດທະນາຂອງໄວໜຸ່ມ ແລະ ໄດ້ສຸມໃສ່ຄວາມສໍາຄັນຂອງການວິເຄາະໃຫ້ທ່ວງທັນກັບເວລາ ເພື່ອຄວາມເຂົ້າໃຈທີ່ເລິກເຊິ່ງ ກ່ຽວກັບບັນຫາທີ່ໄວໜຸ່ມຍິງຕ້ອງປະເຊີນ.
ກອງປະຊຸມ ປະຈໍາປີ 2016 ໄດ້ລິເລີ່ມພາຍໃຕ້ “ແນວຄິດໂຄງການນາງນ້ອຍ” ໂດຍ ສສກ ແລະອົງການ UNFPA ເພື່ອຮຽກຮ້ອງໃຫ້ເພີ່ມທະວີຄວາມມຸ່ງໝັ້ນ ທີ່ຈະດໍາເນີນການປະເມີນສະຖານະການຂອງເດັກຍິງ ອາຍຸ 10-19 ປີ ທັງທາງດ້ານຄຸນນະພາບ ແລະ ດ້ານປະລິມານ ເພື່ອກໍານົດ ແລະ ແກ້ໄຂສິ່ງທ້າທາຍສໍາຄັນທີ່ເກີດຂຶ້ນ, ສະໜັບສະໜູນຄວາມກ້າວໜ້າ ແລະ ຄວາມເປັນຢູ່ທີ່ດີຂອງພວກເຂົາ.
ກອງປະຊຸມ ວ່າດ້ວຍການຄົ້ນຄວ້າວິທະຍາສາດ ກ່ຽວກັບໄວໜຸ່ມ ແມ່ນຈັດຂຶ້ນທຸກໆປີ ເພື່ອເປັນເວທີສໍາລັບນັກຄົ້ນຄວ້າ, ຜູ້ຈັດຕັ້ງປະຕິບັດ, ຜູ້ວາງນະໂຍບາຍ ແລະ ຄູ່ຮ່ວມພັດທະນາ ເພື່ອ ແລກປ່ຽນຂໍ້ມູນຫຼັກຖານການຄົ້ນຄວ້າທີ່ຜ່ານມາ. ເປົ້າໝາຍແມ່ນເພື່ອໃຫ້ຫຼັກຖານການຄົ້ນຄວ້າ ຖືກນຳໃຊ້ເຂົ້າໃນການໂຄສະນາສົ່ງເສີມ, ການວາງນະໂຍບາຍ, ການຈັດຕັ້ງປະຕິບັດ ແລະ ການສະໜັບສະໜູນອັນຄົບຖ້ວນ ເຊິ່ງມີຄວາມສຳຄັນຕໍ່ການບັນລຸຄວາມເປັນຢູ່ທີ່ດີຂອງໄວໜຸ່ມທັງໝົດ.
ທ່ານ ດຣ ໄພວັນ ແກ້ວປະເສີດ, ຮອງລັດຖະມົນຕີ ກະຊວງສາທາລະນະສຸກ ໄດ້ໃຫ້ກຽດຕ້ອນຮັບນັກວິໄຈທັງພາຍໃນ ແລະ ຕ່າງປະເທດ ພ້ອມທັງເນັ້ນໜັກເຖິງຄວາມສຳຄັນຂອງຂໍ້ມູນ ແລະກ ານຄົ້ນຄວ້າ ເພື່ອເຂົ້າໃຈຄວາມຕ້ອງການຂອງໄວໜຸ່ມໃນລາວ, ໂດຍສະເພາະ ເພື່ອຮັບປະກັນວ່າ ບໍ່ປ່ອຍປະຜູ້ໃດໄວ້ຂ້າງຫລັງ, ມີການເຊື່ອມສານວຽກງານຂອງຂະແໜງຕ່າງໆ ຢ່າງມີຄຸນະພາບ ທ່ວງທັນກັບເວລາ ແລະ ມີຄວາມຍືນຍົງ. ທ່ານໄດ້ກ່າວວ່າ, “ເພື່ອໃຫ້ລາວບັນລຸໄດ້ຄຳໝັ້ນສັນຍາຂອງກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (ICPD), ແມ່ນຕ້ອງໄດ້ສ່ອງແສງໃຫ້ເຫັນທຸກບັນຫາທີ່ໄວໜຸ່ມ ແລະ ເຍົາວະຊົນພວມປະເຊີນໜ້າ ແລະ ຕີລາຄາຄວາມຄືບໜ້າຢ່າງເປັນປະຈຳ. ສິ່ງນີ້ຊ່ວຍດຳເນີນບັນດາມາດຕະການແກ້ໄຂ ຫຼື ດັດປັບແບບລວມໝູ່ ແລະ ຮັບປະກັນບັນດານະໂຍບາຍ ແລະ ໂຄງການຖືກສ້າງຂຶ້ນບົນພື້ນຖານຫຼັກຖານ ເພື່ອຊຸກຍູ້ການພັດທະນາໄວໜຸ່ມ ແລະ ລົງທຶນໃສ່ການພັດທະນາແຫຼ່ງທຶນມະນຸດ. ການຄົ້ນຄວ້າແມ່ນກຸນແຈສຳຄັນ ເພື່ອເລັ່ງລັດການຈັດຕັ້ງປະຕິບັດບັນດາບຸລິມະສິດແຫ່ງຊາດໃນດ້ານ ສາທາລະນະສຸກ, ການສຶກສາ, ການຈ້າງງານ, ການສ້າງຄວາມເຂັ້ມແຂງ, ສະຫວັດດີການ, ສິດທິ ແລະ ທາງເລືອກຕ່າງໆ ເພື່ອບັນລຸ ICPD25 ແລະ SDGs”
ຫົວຂໍ້ຫຼັກໃນປີນີ້, “ສະຖານະພາບປັດຈຸບັນ ກ່ຽວກັບສຸຂະພາບ ແລະ ການພັດທະນາໄວໜຸ່ມ”, ຈະແບ່ງປັນວິທີການຕໍ່ຫນ້າໃນການພັດທະນາທາງດ້ານສິດທິ, ສຸຂະພາບທາງເພດ ແລະ ສຸຂະພາບຈະເລີນພັນຂອງໄວໜຸ່ມ, ສຸຂະພາບຈິດ ແລະ ການຊ່ວຍເຫຼືອທາງຈິດສັງຄົມ, ໂພຊະນາການ, ການປົກປ້ອງຈາກການປະຕິບັດທີ່ເປັນອັນຕະລາຍ ແລະ ການແກ້ໄຂການປ່ຽນແປງຂອງດິນຟ້າອາກາດ.
ທ່ານ ດຣ ບາກທິຢໍ ຄາດິເຣິບ, ຜູ້ຕາງຫນ້າຂອງອົງການ UNFPA ກ່າວວ່າ: “ມີ 3 ຄວາມຈໍາເປັນ ສໍາລັບການລົງທຶນໃນໄວຫນຸ່ມໂດຍອີງໃສ່ຫຼັກຖານຈາກການຄົ້ນຄວ້າ: (1) ຄວາມຈໍາເປັນທໍາອິດທີ່ກ່ຽວຂ້ອງກັບສິດທິໄວໜຸ່ມ ແລະ ເຍົາວະຊົນ, ເຊິ່ງແມ່ນການສ້າງຄວາມສາມາດ ໃຫ້ພວກເຂົາຕັດສິນໃຈເລືອກຢ່າງຮອບຮູ້ກ່ຽວກັບຊີວິດ ແລະ ສຸຂະພາບຈະເລີນພັນ; (2) ຄວາມຈຳເປັນທີ 2 ແມ່ນຄວາມຈຳເປັນຂອງການພັດທະນາ ເຊິ່ງລວມເຖິງການເພີ່ມແຫຼ່ງທຶນມະນຸດທີ່ຈຳເປັນຕໍ່ການພັດທະນາແບບຍືນຍົງ; (3) ອັນທີສາມ ແມ່ນຄວາມຈຳເປັນທາງດ້ານປະຊາກອນ. ບັນດາປະເທດທີ່ມີປະຊາກອນໄວໜຸ່ມ ແລະ ເຍົາວະຊົນເປັນຈຳນວນຫຼວງຫຼາຍເຊັ່ນລາວ ແມ່ນມີໂອກາດເລັ່ງການພັດທະນາທາງດ້ານເສດຖະກິດ, ຄວາມສາມາດໃນການປັບຕົວ, ຄວາມຍືນຍົງ, ແລະ ການເພີ່ມຜົນຜະລິດໄດ້.”
ກອງປະຊຸມ ວ່າດ້ວຍການຄົ້ນຄວ້າວິທະຍາສາດ ກ່ຽວກັບໄວໜຸ່ມ ມີການນຳສະເໜີດ້ວຍຕົນເອງ ແລະ ທາງອອນລາຍ ທັງຈາກ ສປປ ລາວ ແລະ ພາກພື້ນອາຊີຕາເວັນອອກສຽງໃຕ້. ຜູ້ເຂົ້າຮ່ວມໄດ້ນຳສະເໜີ ແລະ ປຶກສາຫາລືໃນຫົວຂໍ້ຕ່າງໆເຊັ່ນ: ຄວາມຮັບຮູ້ ແລະ ການປະຕິບັດ ກ່ຽວກັບສຸຂະພາບທາງເພດ ແລ ະສຸຂະພາບຈະເລີນພັນ (SRH) ໃນກຸ່ມຊົນເຜົ່າ ແລະ ພື້ນທີ່ຊົນນະບົດ, ການຖືພາໃນໄວໜຸ່ມ ແລະ ແອນ້ອຍເກີດໃໝ່ທີ່ມີນ້ຳໜັກຕໍ່າ, ການເລືອກອາຫານ ແລະ ພຶດຕິກໍາການກິນ, ການອອກໂຮງຮຽນ ແລະ ອື່ນໆ.
ທ່ານ ດຣ ຄຳແພງ ພົງລືຊາ, ຮອງຜູ້ອໍານວຍການ ສສກ ໄດ້ກ່າວວ່າ: “ພວກເຮົາດີໃຈທີ່ໄດ້ເຫັນຄວາມມຸ່ງໝັ້ນອັນແຮງກ້າ ຂອງບັນດານັກວິໄຈໃນພາກພື້ນ ແລະ ຈາກຕ່າງປະເທດທີ່ຈະມາຮ່ວມໃນແຕ່ລະປີ, ຕະຫຼອດໄລຍະ 8 ປີຜ່ານມາ, ໃນການສະໜອງຂໍ້ມູນທີ່ເຂັ້ມແຂງກ່ຽວກັບໄວໜຸ່ມຍິງ ໃນຂົງເຂດອາຊີ ແລະ ປາຊີຟິກ. ກອງປະຊຸມ ວ່າດ້ວຍການຄົ້ນຄວ້າວິທະຍາສາດ ກ່ຽວກັບໄວໜຸ່ມ ເປັນໂອກາດເພື່ອໃຫ້ທັງນັກຄົ້ນຄວ້າ ແລະ ຜູ້ວາງນະໂຍບາຍໄດ້ຮັບຟັງ ແລະ ແລກປ່ຽນກ່ຽວກັບອົງປະກອບຫຼັກໆ ທີ່ຊຸກຍູ້ການປັນຜົນທາງດ້ານປະຊາກອນ ແລະ ການພັດທະນາເສດຖະກິດສັງຄົມໃນປະເທດຂອງພວກເຮົາ. ໃນຊຸມປີມໍ່ໆມານີ້, ພວກເຮົາໄດ້ປະຕິບັດ ແລະພວກເຮົາຈະສືບຕໍ່ຢືນຢັນອີກຄັ້ງ ເຖິງຄວາມຈຳເປັນອັນສຳຄັນ ເພື່ອເພີ່ມທະວີຄວາມພະຍາຍາມ ໃນການປົກປ້ອງ ແລະສົ່ງເສີມຄວາມສະເໝີພາບລະຫວ່າງຍິງ-ຊາຍ, ສິດທິ, ສຸຂະພາບທາງເພດ ແລະ ສຸຂະພາບຈະເລີນພັນ, ການສຶກສາ ແລະ ການຈ້າງງານຂອງໄວໜຸ່ມ ເພື່ອນຳພາພວກເຮົາໄປສູ່ອະນາຄົດທີ່ຈະເລີນຮຸ່ງເຮືອງຂອງ ສປປ ລາວ ກໍຄື ຂົງເຂດອາຊີ ແລະ ປາຊີຟິກ."
***************
ອົງການ UNFPA ແມ່ນອົງການ ສປຊ ທີ່ສົ່ງເສີມວຽກງານສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ, ລວມທັງ ສປປ ລາວ, ເພື່ອບັນລຸການເສຍຊີວິດຂອງແມ່ໃຫ້ເປັນສູນ, ການວາງແຜນຄອບຄົວທີ່ບໍ່ໄດ້ຮັບການສະໜອງ, ຄວາມຮຸນແຮງບົນພື້ນຖານທາງເພດເປັນສູນ.
ສໍາລັບຂໍ້ມູນເພີ່ມເຕີມ, ກະລຸນາຕິດຕໍ່:
