ລະຫວ່າງວັນທີ 24-25 ກຸມພາ 2022, ທີ່ ແຂວງ ອຸດົມໄຊ: ກະຊວງສາທາລະນະສຸກ ແລະ ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA) ໄດ້ຮ່ວມກັນລົງເຄື່ອນໄຫວຢ້ຽມຢາມ ແຂວງ ອຸດົມໄຊ ແລະ ຮັບຮູ້ເຖິງຜົນສໍາເລັດຂອງບັນດາກິດຈະກໍາທີ່ສຳຄັນທີ່ສຸມໃສ່ຊາວໜຸ່ມຂອງອົງການ UNFPA. ການໄປຢ້ຽມຢາມຄັ້ງນີ້ໃຊ້ເວລາສອງມື້ຢູ່ແຂວງດັ່ງກ່າວ ເຊິ່ງເປັນແຂວງທີ່ມີຫຼາຍຊົນເຜົ່າອາໄສຢູ່, ນຳພາຄະນະຢ້ຽມຢາມໂດຍທ່ານ ປອ. ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ ແລະ ທ່ານ ນາງ ມາຣຽມ ເອຄານ, ຜູ້ຕາງໜ້າອົງການ UNFPA ປະຈຳ ສປປ ລາວ. ນີ້ເປັນຄັ້ງທໍາອິດທີ່ໄດ້ມີການໄປຢ້ຽມຢາມການຈັດຕັ້ງປະຕິບັດຕົວຈິງ ຂອງແຜນງານການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ (AYFS) ແລະ ການລິເລີ່ມຂອງກຸ່ມເດັກຍິງ ນາງ ນ້ອຍ ທີ່ໄດ້ຮັບການສະຫນັບສະຫນູນຈາກ UNFPA, ທີ່ໄດ້ສະໜອງຂໍ້ມູນສຸຂະພາບທາງເພດ ແລະ ສຸຂະພາບຈະເລີນພັນຂອງເຍົາວະຊົນ ແລະ ປົດລັອກການເຂົ້າເຖິງການບໍລິການສໍາລັບໄວຫນຸ່ມ. ຄະນະຜູ້ແທນດັ່ງກ່າວ ໄດ້ຮັບການຕ້ອນຮັບໂດຍ ທ່ານ ບຸນຄົງ ຫຼ້າຈຽມພອນ, ເຈົ້າແຂວງ ແຂວງອຸດົມໄຊ ແລະ ໄດ້ປຶກສາຫາລືກ່ຽວກັບວິທີການເລັ່ງລັດການຈັດຕັ້ງປະຕິບັດ ແລະ ເພີ່ມກິດຈະກໍາທີ່ສຸມໃສ່ຊາວໜຸ່ມ.
ຮູບທີ 1: ພະນັກງານສາທາລະນະສຸກໃຫ້ຂໍ້ມູນກ່ຽວກັບການປ່ຽນແປງຂອງຮ່າງກາຍໃນກອງປະຊຸມທີ່ ເມືອງນາໝໍ້, ແຂວງອຸດົມໄຊ. ຮູບຖ່າຍໂດຍ: ວັນລີ ລໍກວງມິງ/UNFPA.
ການຈັດຕັ້ງປະຕິບັດແຜນງານການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ (AYFS)
ຄະນະຜູ້ແທນ ໄດ້ໄປຢ້ຽມຢາມຫ້ອງການ AYFS ທີ່ ໂຮງໝໍແຂວງອຸດົມໄຊ ເຊິ່ງເປັນບ່ອນທີ່ຜູ້ໃຫ້ບໍລິການດ້ານສຸຂະພາບທີ່ໄດ້ຮັບການຝຶກອົບຮົມຈາກUNFPA ສະໜອງຂໍ້ມູນທີ່ຈຳເປັນທາງດ້ານສຸຂະພາບທາງເພດ ແລະ ສຸຂະພາບຈະເລີນພັນ, ການສຶກສາ ແລະ ການໃຫ້ຄໍາປຶກສາສໍາລັບໄວຫນຸ່ມໃນການປົກປ້ອງຕົນເອງຈາກພະຍາດຕິດຕໍ່ທາງເພດສໍາພັນ (ພຕພ), HIV ແລະ ການຖືພາແບບບໍ່ຕັ້ງໃຈ. ຄຸນນະສົມບັດທີ່ສໍາຄັນຂອງການບໍລິການເຫຼົ່ານີ້ ແມ່ນການຝຶກທັກສະຊີວິດໃຫ້ໄວຫນຸ່ມໃນການຕັດສິນໃຈເມື່ອມີຂໍ້ມູນ ເພື່ອການໃຊ້ຊີວິດທີ່ດີຕໍ່ສຸຂະພາບ.
ຮູບທີ 2: ປອ ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ (ຂວາ) ໂອ້ລົມກັບພະນັກງານທີ່ໃຫ້ບໍລິການທີ່ເປັນມິດກັບໄວໜຸ່ມ ທີ່ ໂຮງໝໍແຂວງ ອຸດົມໄຊ . ຮູບຖ່າຍໂດຍ: ວັນລີ ລໍກວງມິງ/UNFPA.
ທ່ານ ປອ ບຸນແຝງ ພູມມະໄລສິດ ໄດ້ກ່າວວ່າ: “ການບໍລິການທີ່ເປັນມິດກັບໄວໜຸ່ມແມ່ນມີຄວາມສຳຄັນຫຼາຍສຳລັບເຍົາວະຊົນ ແລະ ໄວໜຸ່ມ, ແລະ ການລົງທຶນໃສ່ວຽກງານດັ່ງກ່າວຕື່ມອີກແມ່ນມີຄວາມຈຳເປັນຫຼາຍເພື່ອເຮັດໃຫ້ໄວໜຸ່ມທຸກໆຄົນ ໃນທົ່ວປະເທດເຂົ້າເຖິງການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມໄດ້ຢ່າງທົ່ວເຖິງ”, ທ່ານຍັງ ໄດ້ເນັ້ນໜັກເຖິງ ຄວາມຈຳເປັນໃນການຂະຫຍາຍ ໂຄງການ AYFS ໃຫ້ກວມເອົາເຍົາວະຊົນ ແລະ ໄວໜຸ່ມຈາກທຸກຊົນເຜົ່າ.
ກະຊວງສາທາລະນະສຸກ ແລະ ອົງການ UNFPA ໄດ້ໃຫ້ການສະໜັບສະໜູນແກ່ ແຂວງອຸດົມໄຊ ໃນການເສີມຂະຫຍາຍການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ ຢູ່ເມືອງໄຊ ໃນໄລຍະ 2 ປີຜ່ານມາ ແລະ ນັບແຕ່ນັ້ນມາ ໄດ້ຂະຫຍາຍໄປເຖິງ ເມືອງນາໝໍ້ ໃນປີ 2020, ໂຄງການ AYFS ໄດ້ນຳໃຊ້ຊຸດບໍລິການທີ່ພັດທະນາໂດຍອົງການ UNFPA ແລະ ກະຊວງສາທາລະນະສຸກ ລວມທັງຝຶກອົບຮົມໃຫ້ແກ່ຜູ້ໃຫ້ບໍລິການດ້ານສາທາລະນະສຸກ ແລະ ການສະໜອງການບໍລິການແບບເຄື່ອນທີ່ໄປເຖິງໂຮງຮຽນ, ໂຮງງານ ແລະ ຊຸມຊົນ ໂດຍມີຄູສອນເພື່ອນຊ່ວຍເພື່ອນເຜີຍແຜ່ຂໍ້ຄວາມກ່ຽວກັບ ສຸຂະພາບຈະເລີນພັນ, ສົມທົບດ້ວຍການເຜີຍແຜ່ຂໍ້ມູນຜ່ານແອັບມືຖື ນ້ອຍຢາກຮູ້ “Noi Yakhoo”. ອົງການ Good Neighbors ແລະ ອົງການຮ່ວມມືສາກົນຂອງສ.ເກົາຫຼີ (KOICA) ໄດ້ປະກອບສ່ວນທາງດ້ານງົບປະມານໃນການລິເລີ່ມກິດຈະກໍາດັ່ງກ່າວ.
ແຂວງອຸດົມໄຊ ມີປະຊາກອນໄວໜຸ່ມຫຼາຍທີ່ສຸດໃນປະເທດ, ອາຍຸແຕ່ 10-19 ປີ ມີ 74,900 ຄົນ, ເປົ້າໝາຍຂອງແຜນງານການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ (AYFS) ແມ່ນເພື່ອລວມເອົາການບໍລິການທີ່ເປັນມິດກັບໄວໜຸ່ມ ແລະ ການບໍລິການດ້ານສາທາລະນະສຸກຈາກສະຖານທີ່ສາທາລະນະສຸກຂອງລັດເຂົ້າກັນ ເພື່ອຮັບປະກັນໃຫ້ໄວໜຸ່ມເລືອກເອົາການໃຊ້ຊີວິດທີ່ດີຕໍ່ສຸຂະພາບ ແລະ ຮັບປະກັນໃຫ້ເຂົາເຈົ້າໄດ້ຮັບການສຶກສາ, ມີບົດບາດ ແລະ ມີວຽກເຮັດງານທໍາ ເພື່ອຈະໄດ້ກາຍເປັນກໍາລັງຊຸກຍູ້ການຂະຫຍາຍຕົວຂອງເສດຖະກິດ. ວຽກງານດັ່ງກ່າວນີ້ມີຄວາມກ່ຽວຂ້ອງສະເພາະກັບ ແຂວງອຸດົມໄຊ ເຊິ່ງເປັນແຂວງທີ່ມີອັດຕາການແຕ່ງງານໃນເດັກສູງກວ່າອັດຕາສະເລ່ຍລະດັບຊາດ (32.3 ເປີເຊັນ) ແລະ ອັດຕາການຖືພາໃນເຍົາວະຊົນອາຍຸ 15-19 ປີ ສູງ (105/1000). “ເພື່ອບັນລຸເປົ້າໝາຍແຫ່ງຊາດທີ່ກໍານົດໄວ້ສູງຫຼາຍ ແລະ ຕອບສະໜອງຄວາມຕ້ອງການຂອງເຍົາວະຊົນແລະ ໄວໜຸ່ມ, ໃນປີ 2021 ແຜນງານການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ ໄດ້ຂະຫຍາຍອອກໄປອີກເຖິງ 3 ເມືອງ [ເມືອງຫຼາ, ເມືອງງາ, ແລະ ເມືອງແບ່ງ]. ຮອດປີ 2021, 82% ຂອງພະນັກງານສາທາລະນະສຸກຢູ່ໃນ ແຂວງອຸດົມໄຊ ໄດ້ຮັບການຝຶກອົບຮົມກ່ຽວກັບການບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ, ສາມາດໃຫ້ການບໍລິການທີ່ກວມເອົາເຍົາວະຊົນ ແລະ ໄວໜຸ່ມຫຼາຍກວ່າ 92,500 ຄົນ. ຫ້ອງໃຫ້ບໍລິການທີ່ເປັນມິດກັບເຍົາວະຊົນ ແລະ ໄວຫນຸ່ມ ໄດ້ຖືກສ້າງຕັ້ງຂຶ້ນຢູ່ໂຮງໝໍແຂວງ ແລະ ໂຮງໝໍເມືອງ ນາໝໍ້” ທ່ານ ນາງ ມາຣຽມ ເອ.ຄານ ກ່າວ.
ຮູບທີ 3: ປອ ບຸນແຝງ ພູມມະໄລສິດ , ລັດຖະມົນຕີກະຊວງສາທາລະນະສຸກ (ຊ້າຍ), ທ່ານ ປອ ຫົວພັນ ອິນທະມຸງຄຸນ, ຫົວໜ້າພະແນກສາທາລະນະສຸກ ແຂວງອຸດົມໄຊ (ກາງ) ແລະ ທ່ານນາງ ມາຣຽມ ເອ.ຄານ (ຂວາ) ປຶກສາຫາລືກ່ຽວກັບການຂະຫຍາຍ ໂຄງການ AYFS ພາຍຫຼັງທີ່ຢ້ຽມຢາມຫ້ອງການບໍລິການທີ່ເປັນມິດກັບຊາວໜຸ່ມ. ຮູບຖ່າຍໂດຍ: ວັນລີ ລໍກວງມິງ/UNFPA.
ກຸ່ມເດັກຍິງ ນາງ ນ້ອຍ (NNGG) ສ້າງຄວາມເຂັ້ມແຂງໃຫ້ໝູ່ເພື່ອນ ເລືອກການໃຊ້ຊີວິດທີ່ດີຕໍ່ສຸຂະພາບ
ຄະນະຜູ້ແທນຍັງໄດ້ໄປຢ້ຽມຢາມການຈັດຕັ້ງປະຕິບັດກິດຈະກໍາລິເລີ່ມຂອງກຸ່ມເດັກຍິງ ນາງ ນ້ອຍ (NNGGs) ຢູ່ເມືອງນາໝໍ້ ໂດຍເຂົ້າຮ່ວມການຝຶກອົບຮົມກ່ຽວກັບໄວຈະເລີນພັນ ໂດຍຄູຝຶກ ນາງ ນ້ອຍ ໂດຍໄດ້ຮັບການສະໜັບສະໜູນທາງດ້ານວິຊາການຈາກຜູ້ສະໜອງການບໍລິການດ້ານສຸຂະພາບຈາກໂຮງໝໍເມືອງ. ທ່ານ ປອ ບຸນແຝງ ພູມມະໄລສິດ ໄດ້ກ່າວຕໍ່ຜູ້ເຂົ້າຮ່ວມວ່າ: “ຂໍ້ມູນທາງດ້ານສຸຂະພາບທາງເພດ ແລະ ສຸຂະພາບຈະເລີນພັນ ແມ່ນຈຳເປັນສຳລັບພວກທ່ານທີ່ເປັນເຍົາວະຊົນ ແລະ ໄວໜຸ່ມໃນການຮຽນຮູ້ກ່ຽວກັບການປ່ຽນແປງຂອງຮ່າງກາຍ ລວມທັງວິທີປ້ອງກັນຕົນເອງ. ສະນັ້ນ, ຂ້າພະເຈົ້າຂໍຮຽກຮ້ອງໃຫ້ບັນດາທ່ານເຂົ້າຮ່ວມການຝຶກອົບຮົມເຫຼົ່ານີ້ກັບບັນດາສະຫາຍຂອງທ່ານຢ່າງຕັ້ງໜ້າ ແລະ ນຳເອົາບັນດາຄວາມຮູ້ ແລະ ບົດຮຽນດັ່ງກ່າວເຂົ້າສູ່ພາກປະຕິບັດ. ສຸຂະພາບຈະເລີນພັນທາງເພດແມ່ນຄວາມຮູ້ພື້ນຖານທີ່ຈະຢູ່ກັບທ່ານຕັ້ງແຕ່ມື້ນີ້ ແລະ ໃນຕໍ່ໜ້າ. ທ່ານຈະຮູ້ວິທີປ້ອງກັນຕົນເອງ ແລະວາງແຜນວ່າຈະມີລູກຈັກຄົນເມື່ອມີຄອບຄົວ. ພ້ອມນັ້ນ, ທ່ານຍັງສາມາດແບ່ງປັນຄວາມຮູ້ນີ້ກັບໝູ່ເພື່ອນ ແລະ ສອນລູກຂອງທ່ານໄດ້ເມື່ອຮອດເວລາອັນຄວນ ”.
ຮູບທີ 4: ເດັກຍິງໄວໜຸ່ມເຂົ້າຮ່ວມກອງປະຊຸມ NNGG ເມືອງນາໝໍ້ . ຮູບຖ່າຍໂດຍ: ວັນລີ ລໍກວງມິງ/UNFPA.
ໂຄງການ NNGGs ປະກອບມີເດັກຍິງໄວໜຸ່ມ 1.200 ຄົນ ອາຍຸ 10-14 ປີ ແລະ ຄູຝຶກ 126 ຄົນ (ເປັນເດັກຍິງ 15-24 ປີ) ເຂົ້າຮ່ວມຈາກ 63 ບ້ານ ໃນເມືອງນາໝໍ້. ຈາກນັ້ນ, ຄູຝຶກເຫຼົ່ານີ້ຈະຖ່າຍທອດຄວາມຮູ້ໃຫ້ແກ່ເດັກຍິງໄວໜຸ່ມໂດຍຜ່ານກອງປະຊຸມປະຈໍາອາທິດຢູ່ໃນບ້ານຂອງເຂົາເຈົ້າ. ກິດຈະກໍາດັ່ງກ່າວແມ່ນປະກອບດ້ວຍ ຜູ້ໃຫ້ບໍລິການດ້ານສຸຂະພາບ 20 ຄົນຈາກໂຮງໝໍນ້ອຍ 9 ແຫ່ງ ແລະ ໂຮງໝໍເມືອງນາໝໍ້ ທີ່ໄດ້ຜ່ານການຝຶກອົບຮົມກ່ຽວກັບການບໍລິການທີ່ເປັນມິດກັບໄວໜຸ່ມມາແລ້ວ.
“ໂຄງການກຸ່ມເດັກຍິງ ນາງນ້ອຍ ແມ່ນໜຶ່ງໃນອົງປະກອບຫຼັກຂອງ ວິທີການ “ນາງນ້ອຍ” ທີ່ຫ້ອງການ UNFPA ປະຈໍາ ສປປ ລາວ ໄດ້ນຳສະເໜີເພື່ອເພີ່ມການລົງທຶນຊ່ວຍເຫຼືອໄວໜຸ່ມ ແລະ ຮັບປະກັນໃຫ້ເດັກຍິງໄວໜຸ່ມເປັນສ່ວນໜຶ່ງຂອງການບັນລຸ ເປົ້າໝາຍການພັດທະນາແບບຍືນຍົງ. ກິດຈະກໍາຂອງກຸ່ມເດັກຍິງດັ່ງກ່າວ ມີຈຸດປະສົງເພື່ອສ້າງຄວາມເຂັ້ມແຂງໃຫ້ແກ່ ເດັກຍິງໄວໜຸ່ມ ໂດຍການສ້າງພື້ນທີ່ທີ່ປອດໄພ ແລະ ສ້າງໂອກາດໃນການເພີ່ມທັກສະທາງດ້ານສັງຄົມ, ສຸຂະພາບ, ສະຕິປັນຍາ, ແລະ ເສດຖະກິດ, ໄປໂຮງຮຽນ ຫຼື ເຂົ້າໂຮງຮຽນຄືນ ແລະ ເຮັດໃຫ້ເຂົາເຈົ້າມີການຖືພາ ແລະ ການແຕ່ງງານຊ້າລົງເພື່ອເພີ່ມ ທ່າແຮງຂອງພວກເຂົາໃຫ້ໄດ້ຢ່າງເຕັມສ່ວນ. ວິທີການສໍາລັບກຸ່ມເດັກຍິງນີ້ແມ່ນວິທີການທີ່ມີຄວາມຮອບດ້ານ, ອີງໃສ່ຫຼັກຖານ, ຜ່ານການທົດລອງທົ່ວໂລກ ແລະ ມີຕົວແບບທີ່ມີການຢັ້ງຢືນ” ນາງ ມາຣຽມ ເອຄານ ກ່າວ.
ພິທີມອບ-ຮັບອຸປະກອນການແພດໃຫ້ແກ່ ໂຮງໝໍຊຸມຊົນ ເມືອງນາໝໍ້
ນອກຈາກການລົງຢ້ຽມຢາມບັນດາກິດຈະກໍາການເຄື່ອນໄຫວທີ່ສຸມໃສ່ຊາວໜຸ່ມແລ້ວ, ຍັງມີພິທີມອບຄອມພິວເຕີ, ຈັກພິມເອກະສານ, ຕຽງປະສູດ ແລະດອກໄຟສໍາລັບກວດຄົນເຈັບ ໃຫ້ແກ່ໂຮງໝໍຊຸມຊົນເມືອງນາໝໍ້. ອຸປະກອນນີ້ແມ່ນສະໜອງໃຫ້ໂດຍ ອົງການ UNFPA ຮ່ວມມືກັບ KOICA. ຢູ່ໂຮງໝໍຊຸມຊົນທີ່ສ້າງຂຶ້ນໃໝ່ນີ້, ກຳລັງສ້າງຫ້ອງໃໝ່ເພື່ອສະໜອງການບໍລິການທີ່ເປັນມິດກັບໄວໜຸ່ມໃຫ້ທັນພາຍໃນປີນີ້.
ຮູບທີ 5: ພິທີມອບ-ຮັບອຸປະກອນການແພດ ທີ່ ໂຮງໝໍຊຸມຊົນ ເມືອງນາໝໍ້ . ຮູບຖ່າຍໂດຍ: ວັນລີ ລໍກວງມິງ/UNFPA.
ຂໍ້ມູນ ສຸຂະພາບທາງເພດ ແລະ ສຸຂະພາບຈະເລີນພັນ ຢູ່ສະຖານີລົດໄຟ
ເພື່ອເຮັດໃຫ້ການໄປຢ້ຽມຢາມພາກສະໜາມຄັ້ງນີ້ສໍາເລັດສົມບູນ, ເນື່ອງຈາກເປັນການເດີນທາງດ້ວຍລົດໄຟ, UNFPA ແລະ ກະ ຊວງສາທາລະນະສຸກ ໄດ້ຖືໂອກາດນີ້ສຳຫຼວດ ໂອກາດໃນການສະໜອງຂໍ້ມູນຂ່າວສານສຸຂະພາບທາງເພດ ແລະ ສຸຂະພາບຈະເລີນພັນຢູ່ສະຖານີລົດໄຟລາວ-ຈີນ. ຂໍ້ມູນດັ່ງກ່າວນີ້ ປະກອບມີການຖືພາທີ່ໂດຍທີ່ບໍ່ໄດ້ຕັ້ງໃຈ, ການແຕ່ງງານໃນເດັກ, ໂລກ HIV/AIDs, ພຕພ, ການຄຸມກຳເນີດ ແລະ ຄວາມຮຸນແຮງບົນພື້ນຖານທາງເພດ ເຊິ່ງຈະຖືກສະໜອງໃຫ້ເປັນພາສາລາວ, ພາສາອັງກິດ ແລະ ພາສາຈີນ ຂຶ້ນກັບການປຶກສາຫາລືຕື່ມອີກລະຫວ່າງສອງຝ່າຍ.
ຮູບທີ 6: ທ່ານ ປອ ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ (ຊ້າຍ) ແລະ ທ່ານ ນາງ ມາຣີອາມ ເອ.ຄານ ຜູ້ຕາງໜ້າອົງການ UNFPA ປະຈຳ ສປປ ລາວ (ຂວາ) ທີ່ຫ້ອງVIP ສະຖານີລົດໄຟລາວ-ຈີນ, ປຶກສາຫາລືກ່ຽວກັບໂຄງການສະໜອງຂໍ້ມູນກ່ຽວກັບສຸຂະພາບຈະເລີນພັນ ໃຫ້ແກ່ຜູ້ໂດຍສານຢູ່ສະຖານີ. ຮູບຖ່າຍໂດຍ: ວັນລີ ລໍກວງມິງ/UNFPA.
ສາຍດ່ວນເພື່ອຊ່ວຍເຫຼືອທີ່ມີໃນປັດຈຸບັນ:
- ສໍາລັບຂໍ້ມູນສຸຂະພາບທາງເພດ ແລະ ສຸຂະພາບຈະເລີນພັນ: 1361 (ສຳລັບເພດຍິງ) 137 (ສຳລັບເພດຊາຍ)
- ຄວາມຮຸນແຮງບົນພື້ນຖານທາງເພດ, ການລ່ວງລະເມີດທາງເພດ ແລະ ການຂູດຮີດທາງເພດ, ການຄ້າມະນຸດ: 1362
- ສຸຂະພາບຈິດ ແລະ ການຊ່ວຍເຫຼືອສະພາບຈິດໃຈສັງຄົມ: 1554
- ເພດສຶກສາ: ແອັບມືຖື Noi Yakhoo (ດາວໂຫຼດແອັບໂດຍການສະແກນລະຫັດ QR ຂ້າງລຸ່ມນີ້)
ສໍາລັບ ຂໍ້ມູນເພີ່ມເຕີມ ກະລຸນາຕິດຕໍ່:
ທ່ານ ນາງ ສິລິພອນ ແຊນລີ ສະກຸນຄູ,
ຜູ້ປະສານງານ ແຜນງານສຸຂະພາບທາງເພດ ແລະ ສຸຂະພາບຈະເລີນພັນ
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ທ່ານ ນາງ ວັນລີ ລໍກວງມິງ
ຜູ້ຮັບຜິດຊອບດ້ານການສື່ສານ ແລະ ການຮ່ວມມື
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
