ກະຊວງແຜນການ ແລະການລົງທຶນ ແລະ ອົງການສະຫະປະຊາຊາດ ກອງທຶນເພື່ອປະຊາກອນ (UNFPA) ຮ່ວມມືກັບ ແພລນສາກົນ ປະຈຳ ສປປ ລາວ ແລະ ບັນດາຄູ່ຮ່ວມງານ, ໄດ້ຈັດພິທີສະເຫຼີມສະຫຼອງໃຫ້ແກ່ໄວໜຸ່ມລາວ ແລະ ວັນເກີດຂອງ ນາງນ້ອຍ ຄົບຮອບ 17 ປີ ພາຍໃຕ້ຫົວຂໍ້: “ລົງທຶນໃສ່ສິດທິຂອງເດັກຍິງ: ຍົກສູງຄວາມເປັນເຈົ້າການ, ເພື່ອຊີວິດທີ່ສົດໃສຂອງພວກເຮົາ”. ງານດັ່ງກ່າວໄດ້ຖືກຈັດຂຶ້ນວັນທີ 31 ຕຸລາ 2023 ທີ່ໂຮງແຮມ ເໝືອງແທັງ, ໃຫ້ກຽດເປັນປະທານໂດຍ ທ່ານນາງ ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ເປັນປະທານຮ່ວມໂດຍທ່ານ ບາກທິຢໍ ຄາດິເຣິບ, ຜູ້ຕາງໜ້າອົງການ ສະຫະປະຊາຊາດ ກອງທຶນສຳລັບປະຊາກອນ (UNFPA) ປະຈຳ ສປປ ລາວ.
ຜູ້ຕາງໜ້າຈາກພາກລັດ, ສະຖານທູດ, ອົງການຈັດຕັ້ງສັງຄົມ, ເອກະຊົນ ແລະ ຊາວໜຸ່ມຈາກຫຼາຍສະຖາບັນການສຶກສາໄດ້ເຕົ້າໂຮມກັນຢູ່ນະຄອນຫຼວງວຽງຈັນ ເພື່ອສະເຫຼີມສະຫຼອງຜົນສຳເລັດ ແລະ ຄວາມຄືບໜ້າທີ່ຕິດພັນກັບວຽກງານສາທາລະນະສຸກ, ການສຶກສາ, ການສ້າງຄວາມເຂັ້ມແຂງ ແລະ ການປົກປ້ອງເດັກຍິງໄວໜຸ່ມ. ງານສະເຫຼີມສະຫລອງຄັ້ງນີ້ ຍັງໄດ້ຢັ້ງຢືນ ເຖິງຄຳໝັ້ນສັນຍາຂອງທຸກພາກສ່ວນທີ່ກ່ຽວຂ້ອງ ໃນການເປັນຄູ່ຮ່ວມພັດທະນາ ແລະ ເປັນຕົວແບບໃນການສົ່ງເສີມຄວາມສະເໝີພາບລະຫວ່າງຍິງ-ຊາຍ ແລະ ສ້າງຄວາມເຂັ້ມແຂງໃຫ້ແກ່ໄວໜຸ່ມຍິງ.
ທ່ານນາງ ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຂະແໜງການທີ່ໄດ້ລົງທຶນໃຫ້ແກ່ເດັກຍິງໄວໜຸ່ມ ທີ່ເປັນກຳລັງແຮງໃນການພັດທະນາປະເທດຊາດໃນອະນາຄົດ, ທ່ານໄດ້ກ່າວຕໍ່ພິທີວ່າ: “ການສະເຫຼີມສະຫຼອງຄັ້ງນີ້ມີຄວາມສຳຄັນຫຼາຍ, ຖຶວ່າເປັນໂອກາດອັນດີໃນການທົບທວນຄືນການສະໜັບສະໜູນຂອງບັນດາຄູ່ຮ່ວມພັດທະນາ ຕໍ່ກັບຄຳໝັ້ນສັນຍາທີ່ໄດ້ຕົກລົງເຫັນດີຮ່ວມກັນ, ໃນກອງປະຊຸມລະດັບຊາດວ່າດ້ວຍປະຊາກອນ ແລະ ການພັດທະນາເມື່ອບໍ່ດົນມານີ້. ໃນ ສປປ ລາວ, ຊາວໜຸ່ມອາຍຸ 10 ຫາ 24 ປີ ກວມເອົາ 30 ເປີເຊັນຂອງປະຊາກອນທັງໝົດ, ເປັນແຫຼ່ງທຶນມະນຸດອັນໃຫຍ່ຫຼວງເພື່ອການພັດທະນາປະເທດໃນມື້ນີ້ ແລະ ໃນຊຸມປີຕໍ່ໜ້າ. ເຖິງເວລາແລ້ວທີ່ຈະແກ້ໄຂສິ່ງທ້າທາຍທັງໝົດທີ່ເດັກຍິງປະເຊີນໃນການເຂົ້າເຖິງການສຶກສາ, ສຸຂະພາບທາງເພດ ແລະ ສຸຂະພາບຈະເລີນພັນ, ທັກສະການດຳລົງຊີວິດ ແລະ ການສ້າງຄວາມເຂັ້ມແຂງ. ສິ່ງນີ້ຈະຮັບປະກັນການເຂົ້າເຖິງຂໍ້ມູນ, ທາງເລືອກທີ່ມີຄຸນະພາບ ແລະ ການປະຕິບັດສິດທິຂອງພວກເຂົາໃນການເຂົ້າສູ່ຕະຫຼາດແຮງງານໃນອະນາຄົດຢ່າງມີປະສິດທິພາບ, ມີຄວາມສາມາດ ແລະ ເຂົ້າຮ່ວມໃນວາລະສຳຄັນຕໍ່ການພັດທະນາໃນ ສປປ ລາວ.”
ການລົງທຶນໃສ່ເດັກຍິງ ແມ່ນການລົງທຶນໃນອະນາຄົດທີ່ມີຮ່ວມກັນ. ຫົວຂໍ້ສຳລັບວັນເດັກຍິງສາກົນ ໃນປີນີ້ແມ່ນ “ລົງທຶນໃສ່ສິດທິເດັກຍິງ: ຍົກສູງຄວາມເປັນເຈົ້າການ, ເພື່ອຊີວິດທີ່ສົດໃສຂອງພວກເຮົາ” ໄດ້ເນັ້ນໃຫ້ເຫັນເຖິງຄວາມສຳຄັນຂອງການໃຫ້ພື້ນທີ່ແກ່ເດັກຍິງ ເພື່ອໃຫ້ມີບົດບາດດ້ານບວກ ໃນການສ້າງອະນາຄົດຂອງຕົນເອງ ໂດຍຜ່ານເຕີມເຕັມສິດທິພື້ນຖານຂອງພວກເຂົາ ແລະ ນຳພາຄວາມກ້າວໜ້າທາງດ້ານ ເສດຖະກິດ-ສັງຄົມຂອງຊຸມຊົນ ແລະ ປະເທດຊາດ.
ທ່ານ Bakhtiyor Kadyrov, ຜູ້ຕາງໜ້າອົງການ UNFPA ປະຈຳ ສປປ ລາວ, ກ່າວວ່າ “ມີຄວາມຈຳເປັນ 3 ຢ່າງ ໃນການລົງທຶນໃສ່ເດັກຊາຍ ແລະ ເດັກຍິງ ເພື່ອຮັບຮູ້ຜົນປະໂຫຍດທາງປະຊາກອນ: ສິ່ງຈໍາເປັນທໍາອິດແມ່ນກ່ຽວກັບສິດທິຂອງໄວໜຸ່ມ ແລະເຍົາວະຊົນ, ເຊິ່ງກ່ຽວກັບການສ້າງຄວາມເຂັ້ມແຂງໃຫ້ເຂົາເຈົ້າມີການຕັດສິນໃຈໂດຍມີຂໍ້ມູນຮອບດ້ານ ໃນການຕັດສິນໃຈກ່ຽວກັບຊີວິດ ແລະ ສຸຂະພາບຈະເລີນພັນຂອງພວກເຂົາ, ອັນທີ 2 ແມ່ນ ຄວາມຈຳເປັນໃນການພັດທະນາເຊິ່ງລວມທັງການເພີ່ມແຫຼ່ງທຶນມະນຸດທີ່ຈຳເປັນ ເພື່ອການພັດທະນາແບບຍືນຍົງ, ອັນທີ 3 ແມ່ນຄວາມຈຳເປັນດ້ານປະຊາກອນ, ປະເທດທີ່ມີໄວໜຸ່ມແລະເຍົາວະຊົນເປັນຈຳນວນຫຼວງຫຼາຍ ມີໂອກາດເລັ່ງລັດການພັດທະນາເສດຖະກິດ, ຄວາມສາມາດໃນການປັບຕົວ, ຄວາມຍືນຍົງ, ແລະຜົນຜະລິດໄດ້.”
ທ່ານນາງ Carol Anne Mortensen, ຜູ້ອໍານວຍການອົງການແພລນສາກົນ ປະຈຳ ສປປ ລາວ, ໄດ້ກ່າວວ່າ “ການເຄື່ອນໄຫວຂອງເດັກຍິງ ແມ່ນມີຄວາມຈຳເປັນໃນການບັນລຸຄວາມສະເໝີພາບລະຫວ່າງຍິງ-ຊາຍ ແລະ ສ້າງໂລກທີ່ຍຸຕິທຳ ແລະ ສະເໝີພາບກັນຫຼາຍຂຶ້ນ. ແນວໃດກໍຕາມ, ນັກເຄື່ອນໄຫວເດັກຍິງ ຍັງຕ້ອງປະເຊີນກັບສິ່ງທ້າທາຍຫຼາຍຢ່າງ, ລວມທັງການຂາດທຶນຮອນ, ຄວາມບໍ່ເປັນມິດ/ກຽດຊັງ ຈາກສະມາຊິກໃນຊຸມຊົນ, ແລະການລ່ວງລະເມີດທາງອອນລາຍ. ມາຮ່ວມກັບພວກເຮົາ ເພື່ອຊຸກຍູ້ໃຫ້ທຸກຄົນລົງທຶນໃສ່ນັກເຄື່ອນໄຫວເດັກຍິງຫຼາຍຂຶ້ນ ເຊິ່ງຈະທໍາລາຍສິ່ງກີດຂວາງທີ່ປ້ອງກັນ ບໍ່ໃຫ້ພວກເຂົາສາມາດບັນລຸຄວາມສາມາດຂອງຕົນເອງໄດ້ຢ່າງເຕັມທີ່.”
ຢູ່ໃນປະເທດລາວ, ເດັກຍິງຫຼາຍກວ່າ 1 ໃນ 5 ຄົນ ຕ້ອງໄດ້ອອກໂຮງຮຽນ, ເດັກຍິງຫຼາຍກວ່າ 1 ໃນ 20 ຄົນ ບໍ່ເຄີຍເຂົ້າໂຮງຮຽນ, ເດັກຍິງເກືອບ 1 ໃນ 5 ຄົນ ທີ່ມີອາຍຸແຕ່ 15 – 19 ປີ ແມ່ນໄດ້ແຕ່ງງານ ແລະ ທີ່ສໍາຄັນແມ່ນ ເດັກຍິງຫຼາຍກວ່າ 1 ໃນ 10 ຄົນ ທີ່ອາຍຸແຕ່ 15-19 ປີໄດ້ກາຍເປັນແມ່ແລ້ວ. ດ້ວຍການຖືພາຫຼາຍຄັ້ງ, ສຸຂະພາບຂອງພວກເຂົາຍັງສືບຕໍ່ໄດ້ຮັບຜົນກະທົບ ແລະຍັງມີຄວາມສ່ຽງສູງຕໍ່ການເສຍຊີວິດ ແລະການເຈັບປ່ວຍຂອງແມ່.
ນາງ ມະນີ ຫວາງ, ອາຍຸ 15 ປີ ໄວໜຸ່ມຈາກຊົນເຜົ່າມົ້ງ ໄດ້ລົງທະບຽນຮຽນວິຊາຊີບຢູ່ແຂວງຫຼວງພະບາງກັບ ອົງການ UNFPA ແລະ ສູນວິຊາຊີບແມ່ນໍ້າຂອງ ສະແດງຄວາມຍິນດີທີ່ໄດ້ພົບກັບໄວໜຸ່ມຍິງທຸກຄົນ ທີ່ເຂົ້າຮ່ວມພິທີສະເຫຼີມສະຫຼອງຄັ້ງນີ້. ນາງກ່າວວ່າ: “ຂ້າພະເຈົ້າດີໃຈທີ່ໄດ້ຮັບໂອກາດນີ້ເພື່ອຝັນເຖິງອະນາຄົດທີ່ດີກວ່າ. ຂ້ອຍມາຈາກຊຸມຊົນຊົນເຜົ່າ, ຂ້າພະເຈົ້າຮູ້ສຶກດີໃຈທີ່ໄດ້ຮັບການຝຶກອົບຮົມ ແລະການສະຫນັບສະຫນູນເພື່ອໃຫ້ມີອະນາຄົດທີ່ສົດໃສ. ຂ້າພະເຈົ້າເຊື່ອໝັ້ນສິ່ງທີ່ຂ້າພະເຈົ້າກຳລັງປະຕິບັດຢູ່ໃນບ້ານ, ກັບຄອບຄົວ ແລະ ໃນອະນາຄົດ ສຳລັບປະເທດຊາດ. ຂ້າພະເຈົ້າຫວັງວ່າເດັກຍິງຄົນອີກຫຼາຍໆຄົນ ກໍຈະມີໂອກາດເຊັ່ນດຽວກັນ”
ໃນການສະຫຼຸບຂອງພິທີສະເຫຼີມສະຫຼອງ ວັນເດັກຍິງສາກົນ ປີ 2023, ຄວາມເຂົ້າໃຈສະເພາະຂອງຜູ້ນໍາສະເຫນີ ແລະຫົວຂໍ້ການດຳເນີນການແມ່ນມີດັ່ງຕໍ່ໄປນີ້:
1. ແກ້ໄຂການແຕ່ງງານເດັກ ແລະການຖືພາໃນໄວໜຸ່ມ ໂດຍຜ່ານການຈັດຕັ້ງປະຕິບັດນະໂຍບາຍ ແລະ ແຜນງານຂອງໄວໜຸ່ມ ແລະເຍົາວະຊົນຢ່າງຄົບຖ້ວນ, ລວມທັງການເລັ່ງລັດການຈັດຕັ້ງປະຕິບັດ 'ຂອບວຽກແຜນງານ ນາງນ້ອຍ', ເຊິ່ງໄດ້ຮັບການສະໜັບສະໜູນໂດຍຂໍ້ຕົກລົງການຮ່ວມມື, ການປະສານງານຫຼາຍຂະແໜງການ ແລະ ແຫຼ່ງການເງິນ.
2. ເລັ່ງລັດການປະຕິບັດມາດຕະການໃຫ້ບັນດາຫົວໜ່ວຍທຸລະກິດທີ່ເປັນມິດສຳລັບ “ແຜນງານ ນາງນ້ອຍ”
3. ສືບຕໍ່ດຳເນີນການ ເພື່ອໃຫ້ໄວໜຸ່ມທຸກຄົນສາມາດເຂົ້າເຖິງການສຶກສາທາງເພດແບບຄົບຖ້ວນ (CSE) ແລະ ການຝຶກອົບຮົມທັກສະຊີວິດຂັ້ນພື້ນຖານ ທັງໃນ ແລະນອກໂຮງຮຽນ ແລະສະໜັບສະໜູນການແຊກແຊງທາງຍຸດທະສາດເຊັ່ນ: ການໃຫ້ການຊ່ວຍເຫຼືອດ້ານການເງິນ ແລະບ່ອນພັກອາໄສ ເພື່ອເພີ່ມທະວີການຮັກສາເດັກຍິງໃຫ້ສືບຕໍ່ການຮຽນ. ຈັດຕັ້ງກອງປະຊຸມ ການສຶກສາທາງເພດແບບຄົບຖ້ວນ (CSE) ລະດັບຊາດ ໃນປີ 2024.
4. ລົງທຶນພັດທະນາທັກສະດ້ານວິຊາການ, ວິຊາຊີບໃນເຂດຕົວເມືອງເພື່ອສ້າງຄວາມເຂັ້ມແຂງໃຫ້ແກ່ໄວໜຸ່ມຍິງ-ຊາຍ
5. ສ້າງຫຼັກຖານທາງດ້ານສຸຂະພາບ ແລະບົດບາດຍິງຊາຍ ທີ່ກ່ຽວຂ້ອງກັບການປ່ຽນແປງດິນຟ້າອາກາດ, ລວມທັງສຸຂະພາບທາງເພດ ແລະສຸຂະພາບຈະເລີນພັນ ແລະຄວາມຮຸນແຮງບົນພື້ນຖານທາງເພດ ໂດຍເນັ້ນໃສ່ກຸ່ມໄວໜຸ່ມ ແລະ ແມ່ຍິງໃນຊົນນະບົດເປັນພິເສດ.
6. ລະດົມຄວາມຮ່ວມມື ແລະ ຊັບພະຍາກອນຕ່າງໆ ໃນການສະໜັບສະໜູນການສ້າງຄວາມເຂັ້ມແຂງ ໃຫ້ກັບການບໍລິການທາງເພດ ແລະສຸຂະພາບຈະເລີນພັນທີ່ເປັນມິດກັບໄວໜຸ່ມ.
**********************
ກ່ຽວກັບວັນເດັກຍິງສາກົນ
ສະມັດຊາໃຫຍ່ອົງການສະຫະປະຊາຊາດໄດ້ປະກາດໃຫ້ວັນທີ 11 ເດືອນຕຸລາ ເປັນວັນເດັກຍິງສາກົນ ໃນມະຕິເລກທີ 66/170, ໄດ້ຮັບຮອງເອົາໃນວັນທີ 19 ທັນວາ 2011. ນັບແຕ່ນັ້ນມາ, ວັນທີ 11 ເດືອນຕຸລາ ຂອງທຸກໆປີ ກໍມີພິທີສະເຫຼີມສະຫຼອງວັນເດັກຍິງສາກົນ ເພື່ອຮັບຮູ້ສິດທິມະນຸດຂອງເດັກຍິງ ແລະສິ່ງທ້າທາຍທີ່ເປັນເອກະລັກສະເພາະທີ່ ເດັກຍິງໃນທົ່ວໂລກພວມປະເຊີນ.
ໃນປີ 2016, ສປປ ລາວ ໄດ້ເປີດຕົວ ແນວທາງ ນາງນ້ອຍ ແລະ ໄດ້ສ້າງ ນາງນ້ອຍ, ໃຫ້ເປັນຕົວແທນຂອງເດັກຍິງໄວໜຸ່ມທັງໝົດ (700,000 ກວ່າຄົນ) ໃນລາວ. ນາງໄດ້ຖືກສ້າງຂື້ນເພື່ອເປັນຈຸດເລີ່ມຕົ້ນສໍາລັບການສົນທະນາ ແລະດຶງດູດຄວາມສົນໃຈ ໃຫ້ກັບຄວາມຕ້ອງການທີ່ເປັນເອກະລັກຂອງເດັກຍິງໄວໜຸ່ມ ເຊັ່ນດຽວກັນກັບເດັກຊາຍ. ຕັ້ງແຕ່ນັ້ນມາ, ວັນຄົບຮອບຂອງ ນາງນ້ອຍ ກໍໄດ້ຮັບການສະເຫຼີມສະຫຼອງທຸກໆປີ ໃນວັນທີ 11 ຕຸລາ ເພື່ອສະເຫຼີມສະຫຼອງຄວາມຄືບໜ້າຂອງວຽກງານໄວໜຸ່ມ ແລະການສ້າງຄູ່ຮ່ວມມື ແລ ຮັດແໜ້ນຄຳໝັ້ນສັນຍາຂອງພວກເຮົາ ໃນການສົ່ງເສີມການສ້າງຄວາມເຂັ້ມແຂງໃຫ້ກັບໄວໜຸ່ມຍິງ ແລະຊາຍ ດ້ວຍວິໄສທັດທີ່ວ່າ “ພວກເຮົາພ້ອມກັນກ້າວໄປ”
ກ່ຽວກັບອົງການ UNFPA
ອົງການ UNFPA ແມ່ນອົງການທີ່ເຮັດວຽກດ້ານສຸຂະພາບທາງເພດ ແລະສຸຂະພາບຈະເລີນພັນຂອງ ອົງການສະຫະປະຊາຊາດ ທີ່ເຮັດວຽກຢູ່ໃນຫຼາຍກວ່າ 150 ປະເທດ ລວມທັງ ສປປ ລາວ, ເພື່ອບັນລຸເປົ້າໝາຍເຮັດໃຫ້ການເສຍຊີວິດຂອງແມ່ເປັນສູນ, ຄວາມຕ້ອງການທີ່ບໍ່ໄດ້ຮັບການຕອບສະໜອງໃນການວາງແຜນຄອບຄົວ, ແລະເຮັດໃຫ້ຄວາມຮຸນແຮງບົນພື້ນຖານທາງເພດເປັນສູນ.
ກ່ຽວກັບອົງການແພລນສາກົນ
ອົງການແພລນສາກົນ ແມ່ນອົງການພັດທະນາເອກະລາດ ແລະ ມະນຸດສະທຳ ທີ່ສົ່ງເສີມສິດທິເດັກ ແລະ ຄວາມສະເໝີພາບຂອງເດັກຍິງ.
ພວກເຮົາເຊື່ອໃນພະລັງ ແລະທ່າແຮງຂອງເດັກນ້ອຍທຸກຄົນ. ແຕ່ສິ່ງນີ້ມັກຈະຖືກສະກັດກັ້ນໂດຍຄວາມທຸກຍາກ, ຄວາມຮຸນແຮງ, ການກີດກັນ ແລະການຈໍາແນກ. ເຊິ່ງເດັກຍິງແມ່ນໄດ້ຮັບຜົນກະທົບຫຼາຍທີ່ສຸດ. ການເຮັດວຽກຮ່ວມກັບເດັກນ້ອຍ, ໄວໜຸ່ມ, ຜູ້ສະໜັບສະໜູນ ແລະຄູ່ຮ່ວມງານຂອງພວກເຮົາ, ພວກເຮົາພະຍາຍາມເພື່ອໂລກທີ່ຍຸຕິທຳ, ແກ້ໄຂຕົ້ນຕໍຂອງສິ່ງທ້າທາຍທີ່ເດັກຍິງ ແລະ ເດັກນ້ອຍທີ່ມີຄວາມສ່ຽງທຸກຄົນຕ້ອງປະເຊີນ.
ພວກເຮົາສະຫນັບສະຫນູນສິດທິຂອງເດັກນ້ອຍ ຕັ້ງແຕ່ເກີດຈົນກວ່າພວກເຂົາຈະກາຍເປັນຜູ້ໃຫຍ່ ແລະພວກເຮົາຊ່ວຍໃຫ້ເດັກນ້ອຍກຽມພ້ອມ- ແລະຕອບສະຫນອງຕໍ່ - ວິກິດການ ແລະຄວາມທຸກຍາກລໍາບາກ. ພວກເຮົາຂັບເຄື່ອນການປ່ຽນແປງໃນການປະຕິບັດ ແລະນະໂຍບາຍໃນລະດັບທ້ອງຖິ່ນ, ລະດັບຊາດ ແລະທົ່ວໂລກ ໂດຍໃຊ້ການເຂົ້າເຖິງ, ປະສົບການ ແລະຄວາມຮູ້ຂອງພວກເຮົາ.
ພວກເຮົາໄດ້ສ້າງຄວາມຄູ່ຮ່ວມມືທີ່ມີພະລັງສໍາລັບເດັກນ້ອຍ ມາຫຼາຍກວ່າ 80 ປີ ແລະປັດຈຸບັນມີການເຄື່ອນໄຫວໃນຫຼາຍກວ່າ 75 ປະເທດ.
ພິທີສະເຫຼີມສະຫຼອງວັນເດັກຍິງສາກົນ ປີ 2023 ໄດ້ຮັບການສະໜັບສະໜູນ ແລະ ການປະກອບສ່ວນຈາກ ອົງການ UNFPA ປະຈຳລາວ, ອົງການແພລນສາກົນ ປະຈໍາ ສປປ ລາວ, ອົງການສາກົນບໍລິການປະຊາຊົນ - PSI Laos, ອົງການຊ່ວຍເຫຼືອເດັກສາກົນ ປະຈຳ ສປປ ລາວ, ອົງການແຄສາກົນ ປະຈຳ ສປປ ລາວ, ອົງການ UNICEF ປະຈຳລາວ, ສະຖານທູດການາດາ ປະຈໍາລາວ, UTD Education, ໂຮງແຮມຄຣາວພລາຊາ ວຽງຈັນ, BFL BRED Group, PFHA - ສົ່ງເສີມສຸຂະພາບຄອບຄົວ, ຄລີນິກໄວໜຸ່ມ, ກະຊວງການຕ່າງປະເທດ ແລະ ເອີຣົບ - ລັກເຊມເບີກ, SUOMI FINLAND, ແລະຄູ່ຮ່ວມງານອື່ນໆ.
