08 ມີນາ 2023, ນະຄອນຫຼວງວຽງຈັນ, ສປປ ລາວ - ສູນກາງສະຫະພັນແມ່ຍິງລາວ, ອົງການ UNFPA, ແລະ ບັນດາຄູ່ຮ່ວມມື ໄດ້ພ້ອມກັນສະເຫຼີມສະຫຼອງວັນແມ່ຍິງສາກົນ ປະຈຳປີ ເພື່ອເລັ່ງຄວາມກ້າວໜ້າໄປສູ່ຄວາມສະເໝີພາບລະຫວ່າງບົດບາດຍິງ-ຊາຍ ໂດຍຍົກສູງເອົາແມ່ຍິງທຸກເພດທຸກໄວ ຜ່ານກິດຈະກໍາຕ່າງໆໃນທົ່ວ ນະຄອນຫຼວງວຽງຈັນ.
ບັນດາທ່ານຮອງລັດຖະມົນຕີ, ເອກອັກຄະລັດຖະທູດ, ປະທານແມ່ຍິງປະຈໍາແຕ່ລະກະຊວງ ແລະ ບັນດາຄູ່ຮ່ວມມືທີ່ສະໜັບສະໜູນຄວາມສະເໝີພາບບົດບາດຍິງ-ຊາຍ ໄດ້ເຕົ້າໂຮມກັນທີ່ເດີ່ນພຣະທາດຫຼວງວຽງຈັນ ເພື່ອຈັດກິດຈະກໍາຍ່າງເພື່ອສຸຂະພາບຄັ້ງທີ 3 ເພື່ອສົ່ງເສີມສິດທິໃນການເຂົ້າເຖິງ ແລະ ມີສ່ວນຮ່ວມຂອງແມ່ຍິງໃນສາທາລະນະຢູ່ທຸກຂົງເຂດຂອງຊີວິດ.
ທ່ານ ນາງ ອິນລາວັນ ແກ້ວບຸນພັນ, ປະທານສູນກາງສະຫະພັນແມ່ຍິງລາວ, ກ່າວວ່າ, “ໃນປະຈຸບັນ ໃນຍຸກໂລກາພິວັດ ການນໍາໃຊ້ເຕັກໂນໂລຊີ ແລະ ການສື່ສານທີ່ທັນສະໄໝ ໄດ້ກາຍເປັນປັດໃຈໜຶ່ງໃນການດໍາລົງຊີວິດຂອງພົນລະເມືອງໃນທົ່ວໂລກ ກໍຄືພົນລະເມືອງລາວ ເປັນຕົ້ນການນໍາໃຊ້ເພື່ອການສື່ສານລະຫວ່າງກັນ, ການເດີນທາງ, ການທໍາມາຫາກິນ, ການນໍາໃຊ້ເພື່ອການດໍາເນີນທຸລະກິດຂະໜາດນ້ອຍ ແລະ ຂະໜາດໃຫ່ຍ ແລະ ບັນຫາອື່ນໆ. ຊຶ່ງບັນຫາດັ່ງກ່າວ ໄດ້ສົ່ງຜົນກະ ທົບທາງດ້ານບວກ ແລະ ດ້ານລົບ ຕໍ່ເອື້ອຍນ້ອງແມ່ຍິງ ຈໍານວນໜຶ່ງທີ່ຂາດທັກສະ ແລະ ຮູ້ເທົ່າບໍ່ເຖິງການ ເຮັດໃຫ້ຫຼົງເຊື່ອຈາກການນໍາໃຊ້ເຕັກໂນໂລຊີ ເຮັດໃຫ້ຕົກເປັນເຫຍື່ອຂອງການຕົວະຍົວະຫຼອກລວງໃນການດໍາເນີນທຸລະກິດ, ຕົວະຍົວະຫຼອກລວງໄປເຮັດວຽກໃນສະຖານທີ່ທີ່ບໍ່ມີຄວາມປອດໄພ ແລະ ບໍ່ໄດ້ຮັບຄ່າແຮງງານຕາມການຕົກລົງ, ເຮັດໃຫ້ມີການໃຊ້ຄວາມຮຸນແຮງຕໍ່ແມ່ຍິງ ແລະ ເດັກທີ່ເກີດຈາກການນໍາໃຊ້ເຕັກໂນໂລຊີ.”
“ຈາກບັນຫາກ່າວນີ້ ໃນປີນີ້ ການສະເຫຼີມສະຫຼອງວັນແມ່ຍິງສາກົນ ຈຶ່ງໄດ້ມີຫົວຂໍ້ “ດິຈິຕອນສໍາລັບທຸກຄົນ: ນະວັດຕະກໍາ ແລະ ການນໍາໃຊ້ເຕັກໂນໂລຊີເພື່ອຄວາມສະເໝີພາບຍິງ-ຊາຍ” ທັງນີ້ກໍເພື່ອເປັນການສ້າງຂະບວນການເພື່ອຮັບປະກັນໃຫ້ທຸກຄົນໄດ້ເຂົ້າເຖິງເຕັກໂນໂລຊີ ແລະ ການປົກປ້ອງສິດ ຜົນປະໂຫຍດຂອງແມ່ຍິງ ແລະ ເດັກຍິງ ຈາກການໃຊ້ຄວາມຮຸນແຮງໂດຍຜ່ານການນໍາໃຊ້ເຕັກໂນໂລຊີ ໂດຍສະເພາະການເຜີຍແຜ່ສື່ລາມົກອານາຈານທີ່ເປັນການລະເມີດຮີດຄອງປະເພນີອັນດີງາມຂອງຊາດ ແລະ ເປັນການລະເມີດຕໍ່ກົດໝາຍຂອງສປປ ລາວ.”
ສປປ ລາວ ເປັນປະເທດທີ່ຊຸກຍູ້ຄວາມກ້າວໜ້າ ແລະ ເຫັນດີເຫັນພ້ອມຕໍ່ສິດທິຂອງແມ່ຍິງຢ່າງສະເໝີຕົ້ນສະເໝີປາຍໃນເວທີສາກົນ ໂດຍສື່ໃຫ້ເຫັນຜ່ານບັນດາກົດໝາຍ ແລະ ນະໂຍບາຍແຫ່ງຊາດຕ່າງໆທີ່ຊ່ວຍສະໜັບສະໜູນວຽກງານດັ່ງກ່າວ.
ທ່ານ ນາງ ມາຣຽມ ຄານ, ຜູ້ຕາງໜ້າອົງການ UNFPA, ຊົມເຊີຍ ສູນການສະຫະພັນແມ່ຍິງທີ່ໄດ້ຈັດກິດຈະກໍານີ້ ແລະ ຕໍ່ກັບການນໍາເອົາແມ່ຍິງ, ຜູ້ຊາຍ, ທຸກລຸ້ນອາຍຸມາລວມຕົວກັນ. ທ່ານ ກ່າວວ່າ “ໃນມື້ນີ້ເຮົາມາທໍາຄວາມເຂົ້າໃຈນໍາກັນເບິ່ງວ່າເຕັກໂນໂລຍີ ແລະນະວັດຕະກໍາ ສາມາດເປັນຕົວແປສໍາຄັນສຳລັບສິດທິຂອງແມ່ຍິງ ແລະ ເດັກຍິງ ຫາກຖືກອອກແບບ ແລະ ການນຳໃຊ້ໃຫ້ຕອບສະໜອງກັບຄວາມຕ້ອງການ ແລະ ການນຳໃຊ້ສທີ່ເໝາະສົມ, ບໍ່ວ່າຈະຢູ່ຕາມທ້ອງຖະໜົນຫົນທາງໃນຕົວຈິງ ຫຼື ໃນພື້ນທີ່ອອນລາຍກໍ່ຕາມ.”
ທ່ານ ປອ. ສັນຕິສຸກ ສິມມະລາວົງ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ກ່າວວ່າ “ພິທີໃນຄັ້ງນີ້ ສຸດທີ່ມີຄວາມໝາຍສໍາຄັນ ເພື່ອຈະຍົກໃຫ້ເຫັນຄວາມບໍ່ສະເໜີພາບຍິງ-ຊາຍ ທາງດ້ານເສດຖະກິດ ແລະ ສັງຄົມ ຈາກການນຳໃຊ້ດີຕີຕອນ ແລະ ເຕັກໂນໂລຊີ. ໂດຍສະເພາະແມ່ນໃຫ້ເຫັນຄວາມສຳຄັນໃນການປ້ອງກັນແມ່ຍິງ ແລະ ເດັກຍິງ ທີ່ຖືກເອົາລັດເອົາປຽບ ແລະ ການຫາຜົນປະໂຫຍດທີ່ອຳນວຍຄວາມສະດວກຈາກການນຳໃຊ້ ໄອທີ ແລະ ອິນເຕີເນັດ. ກົມຮັກສາຄວາມປອດໄພທາງອິນເຕີເນັດຂອງພວກເຮົາໄດ້ອອກກົດໝາຍວ່າດ້ວຍອາດຊະຍາກຳທາງອິນເຕີເນັດ ເພື່ອຮັບການລາຍງານຂອງບຸກຄົນ ແລະ ສົ່ງຕໍ່ກໍລະນີໃຫ້ຕຳຫຼວດຂອງອາຊະຍາກຳທາງອິນເຕີແນັດ ຊຶ່ງເປັນພາກສ່ວນທີ່ມີອຳນາດໃນການສືບສວນຫາຜູ້ກະທຳຜິດ ແລະ ດຳເນີນການແກ້ໄຂທາງກົດໝາຍ, ດຳເນີນການສືບສວນສອບສວນຫາຕຳຫຼວດ.”
ກ່ອນຈະກ້າວເຂົ້າເຖິງງານສະເຫຼີມສະຫຼອງວັນແມ່ຍິງສາກົນ, ວັນທີ 4 ມີນານີ້, ກະຊວງສາທາລະນະສຸກ ແລະ UNFPA ກໍ່ໄດ້ຮ່ວມກັນຈັດງານ “ຍ່າງເພື່ອສຸຂະພາບ” ທີ່ ປະຕູໄຊເພື່ອຍົກສູງຄວາມຮັບຮູ້ກ່ຽວກັບຂໍ້ກຳນົດດ້ານສຸຂະພາບສະເພາະຂອງແມ່ຍິງທີ່ມີຄວາມຈຳເປັນຕໍ່ຄວາມສະເໝີພາບທາງເພດ. ກິດຈະກໍາດັ່ງກ່າວນໍາພາໂດຍ ທ່ານ ປອ ດຣ ບຸນແຟງ ພູມມະໄລສິ ລັດຖະມົນຕີ ກະຊວງສາທາລະນະສຸກ ແລະ ຮອງລັດຖະມົນຕີທັງສອງທ່ານ, ດຣ. ໄພວັນ ແກ້ວປະເສີດ ແລະ ດຣ. ສະໜອງ ທອງສະນະ ເຊິ່ງໄດ້ເຕົ້າໂຮມເອົາຜູ້ຄົນຫຼາຍກວ່າ 400 ຄົນ.
ທ່ານ ປອ ດຣ ບຸນແຟງ ພູມມະໄລສິ ລັດຖະມົນຕີ ກະຊວງສາທາລະນະສຸກ, ໄດ້ກ່າວໃຫ້ຄໍາເຫັນໃນງານດັ່ງກ່າວວ່າ, “ຄໍາຂັວນຂອງການສະເຫຼີມສະຫຼອງປີນີ້ແມ່ນປະຈວບເໝາະກັບກະຊວງຂອງພວກເຮົາ. ກະຊວງ ສາທາລະນະສຸກ ເອງຫາກໍ່ເປີດຕົວຍຸດທະສາດສຸຂະພາບດິຈິຕອນ ທີ່ສຸມໃສ່ການນໍາໃຊ້ເຕັກໂນໂລຊີ ແລະ ນະວັດກໍາໃໝ່ເຂົ້າມາປັບປຸງສຸຂະພາບຂອງປະຊາຊົນ. ພະນັກງານສາທາລະນະສຸກ ຈະນໍາໃຊ້ເຕັກໂນໂລຊີເພື່ອປັບປຸງການຄຸ້ມຄອງ ແລະ ການປິ່ນປົວຄົນເຈັບ, ເພື່ອເກັບກໍາຂໍ້ມູນ ແລະ ໝູນໃຊ້ຂໍ້ມູນດັ່ງກ່າວ. ນອກນັ້ນ ຍັງຈະຊ່ວຍຫຼຸດຜ່ອນອັດຕາການຕາຍຂອງແມ່ ແລະ ບັນລຸບັນດາເປົ້າໝາຍຕ່າງໆ. ພວກເຮົາຍັງຕ້ອງສືບຕໍ່ສຸມໃສ່ຮັບປະກັນການສົ່ງຕໍ່ຄົນເຈັບທີ່ປອດໄພ ແລະ ຊຸກຍູ້ສົ່ງເສີມໃຫ້ແມ່ຍິງ ແລະ ເດັກຍິງເຂົ້າເຖິງການບໍລິການທີ່ຮັບປະກັນການເກີດລູກຢ່າງປອດໄພ”.
ນອກນັ້ນ ໃນວັນທີ 9 ມີນາ ຍັງຈະມີການຈັດການກວດກາສາຍຕາຟຣີໃຫ້ກັບແມ່ຍິງທີ່ສູນຝຶກອົບຮົມແມ່ຍິງ ແລະ ກິດຈະກໍາສະເຫຼີມສະຫຼອງທາງວັດທະນະທໍາທີ່ ສູນການຮ່ວມມື ແລະ ການຝຶກອົບຮົມສາກົນ (ICTC) ໃນວັນທີ 10 ມີນາ. ການສະເຫຼີມສະຫຼອງວັນແມ່ຍິງປີ 2023 ຈະປິດທ້າຍດ້ວຍກິດຈະກໍາ “ການບໍລິຈາກ” ທີ່ຫ້ອງການສະຫະປະຊາຊາດໃນວັນທີ 22 ມີນາ, ເພື່ອຮັບປະກັນວ່າແມ່ຍິງສາມາດເຂົ້າເຖິງເລືອດທີ່ຈະມາຊ່ວຍຊີວິດໃນການຜ່າຄອດ ແລະ ອາກາດເລືອດໄຫຼຫຼັງການເກີດລູກ.
***
ອົງການ UNFPA ແມ່ນໜ່ວຍງານໜຶ່ງຂອງອົງການສະຫະປະຊາຊາດທີ່ເຮັດວຽກໃນດ້ານ ສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ ລວມທັງ ສປປ ລາວ. ມີເປົ້າໝາຍໃນການຫຼຸດການຕາຍຂອງແມ່ທີ່ສາມາດປ້ອງກັນໄດ້ໃຫ້ເປັນ 0, ຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງໃຫ້ເປັນ 0, ຄວາມຮຸນແຮງບົນພື້ນຖານທາງເພດ ໃຫ້ເປັນ 0.
ສຳລັບຂໍ້ມູນເພີ່ມຕື່ມຕິດຕໍ່:
