ຂໍໃຫ້ທ່ານຫຼັບຕາ ແລະ ລອງຈິນຕະນາການໂລກຂອງພວກເຮົາ, ໂລກທີ່ປະຊາກອນທັງຫມົດ 8 ຕື້ຄົນ ມີອະນາຄົດທີ່ເຕັມໄປດ້ວຍຄວາມຫວັງ ແລະ ທ່າແຮງ. ຈາກນັ້ນ ຂໍໃຫ້ທ່ານມືນຕາຂຶ້ນ ແລະ ເບິ່ງຄວາມເປັນຈິງໃນປັດຈຸບັນ, ທ່ານຈະເຫັນແມ່ຍິງ ແລະ ເດັກຍິງ ຈໍານວນ 4 ຕື້ຄົນ, ກໍຄືເຄິ່ງໜຶ່ງຂອງປະຊາກອນໂລກ ພວມປະສົບກັບການຖືກຈໍາແນກບົນພື້ນຖານທາງເພດຂອງເຂົາເຈົ້າ.
ເມື່ອ 30 ປີກ່ອນ, ທີ່ກອງປະຊຸມສາກົນວ່າດ້ວຍປະຊາກອນ ແລະ ການພັດທະນາ (ICPD), ພວກເຮົາໄດ້ມີເປົ້າໝາຍຮ່ວມກັນ ເພື່ອສ້າງໂລກທີ່ປະຊາຊົນມີຊີວິດຍືນຍາວ, ມີສຸຂະພາບແຂງແຮງ ພ້ອມທັງສາມາດໃຊ້ສິດທິ ແລະ ເລືອກທາງເລືອກຂອງຕົນເອງໄດ້ດີກວ່າທີ່ເຄີຍມີມາກ່ອນ. ເປົ້າໝາຍດັ່ງກ່າວ ກາຍເປັນຄວາມເປັນຈິງສໍາລັບຄົນຈໍານວນໜຶ່ງ, ກໍຄືວ່າ ຈໍານວນປະຊາກອນມະນຸດໃນໂລກໃນຕອນນີ້ແມ່ນສູງສຸດເທົ່າທີ່ເຄີຍມີມາ, ເຊິ່ງເປັນຜົນມາຈາກການປັບປຸງດ້ານການດູແລສຸຂະພາບ ແລະ ອາຍຸຍືນສະເລ່ຍທີ່ສູງຂຶ້ນ. ໃນຂະນະທີ່ພວກເຮົາພວມສະເຫຼີມສະຫຼອງຄວາມຄືບໜ້າດັ່ງກ່າວນີ້, ພວກເຮົາຕ້ອງຮັບຮູ້ວ່າ ມີປະຊາກອນອີກຫຼາຍລ້ານຄົນ ຫຼື ຫຼາຍພັນລ້ານຄົນ ທີ່ຊີວິດຂອງເຂົາເຈົ້າຍັງຢູ່ຫ່າງໄກຈາກຄວາມຫວັງ ແລະ ທ່າແຮງດັ່ງກ່າວ.
ວັນປະຊາກອນໂລກ ເປັນສິ່ງຢໍ້າເຕືອນແກ່ພວກເຮົາວ່າ ພວກເຮົາຈະສາມາດບັນລຸອະນາຄົດທີ່ຈະເລີນຮຸ່ງເຮືອງ, ມີຄວາມສະຫງົບສຸກ ແລະ ຍືນຍົງ ຄືດັ່ງເປົ້າໝາຍຂອງ ICPD ແລະ ວາລະການພັດທະນາແບບຍືນຍົງຮອດປີ 2030 ຖ້າພວກເຮົານໍາໃຊ້ທ່າແຮງຂອງມະນຸດທຸກຄົນໂລກໃຫ້ເກີດປະໂຫຍດ. ເມື່ອພວກເຮົາປົດລັອກທ່າແຮງສູງສຸດຂອງແມ່ຍິງ ແລະ ເດັກຍິງ ໂດຍຜ່ານການຊຸກຍູ້ ແລະ ສົ່ງເສີມຄວາມຕ້ອງການຂອງເຂົາເຈົ້າໃນດ້ານຊີວິດສ່ວນຕົວ, ຄອບຄົວ ແລະ ອາຊີບ – ພວກເຮົາເພີ່ມຄວາມເປັນຜູ້ນໍາ, ແນວຄວາມຄິດ, ນະວັດຕະກໍາ ແລະ ຄວາມຄິດສ້າງສັນຈາກເຄິ່ງໜຶ່ງຂອງປະຊາກອນໂລກ.
ການບັນລຸສຸຂະພາບທາງເພດ, ສຸຂະພາບຈະເລີນພັນ ແລະ ສິດທິຂອງທຸກຄົນ ແມ່ນພື້ນຖານສໍາຄັນສໍາລັບຄວາມສະເໝີພາບ, ກຽດສັກສີ ແລະ ໂອກາດບົນພື້ນຖານທາງເພດ. ແຕ່ເຖິງຢ່າງໃດກໍຕາມ, ມີຫຼາຍກວ່າ 40 ສ່ວນຮ້ອຍ ຂອງແມ່ຍິງໃນທົ່ວໂລກ ຍັງບໍ່ສາມາດໃຊ້ສິດຂອງເຂົາເຈົ້າໃນການຕັດສິນໃຈ ພຽງແຕ່ບັນຫາພື້ນຖານໃນຊີວິດເຊັ່ນຈະມີລູກ ຫຼື ບໍ່ມີ. ສະນັ້ນ ການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ເດັກຍິງ ໂດຍຜ່ານການສຶກສາ, ການເຂົ້າເຖິງ ແລະ ນຳໃຊ້ການຄຸມກຳເນີດທີ່ທັນສະໄໝ ຈະຊ່ວຍສະໜັບສະໜູນເຂົາເຈົ້າໃຫ້ບັນລຸຄວາມປາຖະໜາພ້ອມທັງວາງແຜນເສັ້ນທາງຂອງຊີວິດຂອງເຂົາເຈົ້າເອງໄດ້.
ການປັບປຸງຄວາມສະເໝີພາບທາງເພດ ເປັນທາງແກ້ໄຂບັນຫາ ທີ່ພົວພັນກັບບັນຫາດ້ານປະຊາກອນໃນຫຼາຍໆດ້ານ. ຕົວຢ່າງ: ໃນສັງຄົມຜູ້ສູງອາຍຸທີ່ມີບັນຫາດ້ານຜະລິດຕະພາບແຮງງານ, ການບັນລຸຄວາມສະເໝີພາບທາງເພດໃນກຳລັງແຮງງານແມ່ນວິທີທີ່ມີປະສິດທິຜົນທີ່ສຸດໃນການປັບປຸງຜົນໄດ້ຮັບຂອງວຽກງານ ແລະ ການເຕີບໂຕດ້ານລາຍຮັບ. ເຊັ່ນດຽວກັນ,ໃນບັນດາປະເທດທີ່ປະຊາກອນເຕີບໂຕຢ່າງວ່ອງໄວ, ການສ້າງຄວາມເຂັ້ມແຂງໃຫ້ແມ່ຍິງ ໂດຍຜ່ານການສຶກສາ ແລະ ການວາງແຜນຄອບຄົວ ສາມາດສ້າງຜົນປະໂຫຍດອັນໃຫຍ່ຫຼວງ ເຊັ່ນ ປັບປຸງຊັບສິນທາງດ້ານມະນຸດ ແລະ ເສດຖະກິດເຕີບໂຕແບບມີສ່ວນຮ່ວມ.
ເມື່ອ 30 ປີ ກ່ອນ, ໂລກໄດ້ເຕົ້າໂຮມກັນ ພາຍໃຕ້ວິໄສທັດເພື່ອສ້າງອະນາຄົດທີ່ຖືເອົາສິດທິຂອງແມ່ຍິງ ແລະ ເດັກຍິງເປັນໃຈກາງຂອງການພັດທະນາໃນທົ່ວໂລກ. ທາງແກ້ໄຂເພື່ອບັນລຸວິໄສທັດດັ່ງກ່າວແມ່ນຈະແຈ້ງກໍຄື ການເລັ່ງສ້າງຄວາມກ້າວໜ້າດ້ານຄວາມສະເໝີພາບທາງເພດ ໂດຍຜ່ານການເຂົ້າເຖິງສຸຂະພາບທາງເພດ ແລະ ສຸຂະພາບຈະເລີນພັນທີ່ມີຄຸນະພາບ, ການສຶກສາທີ່ດີຂຶ້ນ, ການມີນະໂຍບາຍແຮງງານທີ່ເໝາະສົມ ແລະ ການຍຶດຖືບັນທັດຖານຄວາມສະເໝີພາບໃນສະຖານທີ່ເຮັດວຽກ ແລະ ໃນເຮືອນ. ການປະຕິບັດເຫຼົ່ານີ້ ຈະສົ່ງຜົນໃຫ້ຄອບຄົວມີສຸຂະພາບດີ, ເສດຖະກິດມີຄວາມເຂັ້ມແຂງ ແລະ ສັງຄົມມີຄວາມທົນທານ.
ເປົ້າໝາຍກ່ຽວກັບຄວາມສະເໝີພາບທາງເພດໃນມື້ນີ້ ຍັງຄົງມີຄວາມສໍາຄັນຄືດັ່ງ 30 ປີກ່ອນ, ສະນັ້ນ ຄວາມໝາຍໝັ້ນຂອງພວກເຮົາກໍຄວນເປັນເຊັ່ນກັນ. ຂໍໃຫ້ພວກເຮົາສາມັກຄີກັນອີກຄັ້ງໜຶ່ງ ເພື່ອຈິນຕະນາການໂລກທີ່ທຸກຄົນມີໂອກາດເທົ່າທຽມກັນທີ່ຈະກ້າວໜ້າ ແລະ ຂໍໃຫ້ພວກເຮົາຮ່ວມແຮງຮ່ວມໃຈກັນເພື່ອຮັບປະກັນຄວາມຈິງທີ່ວ່າ ຄວາມຮັ່ງມີອັນແທ້ຈິງຂອງທຸກໆປະເທດ ບໍ່ວ່າຈະເປັນປະເທດນ້ອຍ ຫຼື ໃຫຍ່ ຫຼື ພວມຢູ່ໄລຍະໃດຂອງການພັດທະນາກໍ່ຕາມ ແມ່ນຄົນຂອງປະເທດນັ້ນໆ, ເຊິ່ງໝາຍເຖິງໝົດທຸກຄົນ, ບໍ່ແມ່ນພຽງເຄິ່ງດຽວ.
ອົງການ UNFPA ຈະຢືນຢູ່ຄຽງຂ້າງ ປະຊາກອນທັງໝົດ 8 ຕື້ຄົນ ເພື່ອໃຫ້ເຂົາເຈົ້າສາມາດຮຽກຮ້ອງສິດຂອງເຂົາເຈົ້າ ແລະ ມີທາງເລືອກຂອງເຂົາເຈົ້າເອງເພື່ອນໍາໄປສູ່ອະນາຄົດທີ່ມີຄວາມສະເໝີພາບ ແລະ ຄວາມຈະເລີນຮຸ່ງເຮືອງສໍາລັບທຸກຄົນ.
