ວັນທີ 26 ມິຖຸນາ 2023, ນະຄອນຫຼວງວຽງຈັນ, ສປປ ລາວ - ຄະນະຜູ້ແທນຈາກສະຫະພັນແມ່ຍິງລາວ (ສສຍລ) ແລະ ກະຊວງສາທາລະນະສຸກ ໂດຍໄດ້ຮັບການສະໜັບສະໜູນຈາກ ອົງການສະຫະປະຊາຊາດກອງທຶນສໍາລັບປະຊາກອນ (UNFPA) ປະຈໍາ ສປປ ລາວ ແລະ UNFPA ປະຈໍາ ມົງໂກລີ ໄດ້ໄປຢ້ຽມຢາມປະເທດມົງໂກລີ ເພື່ອແລກປ່ຽນຄວາມຮູ້ກ່ຽວກັບການສະກັດກັ້ນຄວາມຮຸນແຮງບົນພື້ນຖານທາງເພດ (GBV) ພ້ອມທັງສ້າງຕັ້ງກົນໄກການປົກປ້ອງຜູ້ລອດຊີວິດແບບຮອບດ້ານ.
ຄະນະຜູ້ແທນຂັ້ນສູງ ນໍາໂດຍ ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານ ສສຍລ ໄດ້ແລກປ່ຽນບົດຮຽນກັບບັນດາກະຊວງຂອງລັດຖະບານມົງໂກນລີ ໃນໄລຍະການໄປຢ້ຽມຢາມ 5 ວັນ ທີ່ໄດ້ຮັບທຶນພາຍໃຕ້ໂຄງການ “Khan Hom” ສະໜັບສະໜູນໂດຍ KOICA ເຊິ່ງໃນນັ້ນລວມມີ ກະຊວງປ້ອງກັນຄວາມສະຫງົບ, ກະຊວງປ້ອງກັນສັງຄົມ, ໂຮງໝໍເມືອງ ແລະ ຄະນະກຳມະການເພື່ອຄວາມສະເໝີພາບທາງເພດແຫ່ງຊາດຂອງມົງໂກລີ. ຄະນະຜູ້ແທນລາວ ໄດ້ຮຽນຮູ້ບົດຮຽນອັນລ້ຳຄ່າ ກ່ຽວກັບການສ້າງຕັ້ງ ແລະ ດໍາເນີນການສູນບໍລິການປະຕູດຽວ ໃຫ້ແກ່ຜູ້ລອດຊີວິດຈາກຄວາມຮຸນແຮງ ພ້ອມທັງເຜີຍແຜ່ໃຫ້ພາກສ່ວນກ່ຽວຂ້ອງຈາກພາກລັດໄດ້ເຂົ້າໃຈເຖິງຄວາມສໍາຄັນ ຂອງລະບົບຂໍ້ມູນບໍລິຫານກ່ຽວກັບຄວາມຮຸນແຮງບົນພື້ນຖານທາງເພດແບບດິຈິຕອນ – ທີ່ນະປັດຈຸບັນນີ້ຍັງບໍ່ທັນໄດ້ສ້າງຕັ້ງຢູ່ໃນ ສປປ ລາວ.
ທ່ານ ນາງ ອິນລາວັນ ກ່າວວ່າ "ພວກເຮົາຮູ້ສຶກເປັນກຽດທີ່ໄດ້ພົບກັບຄູ່ຮ່ວມງານ ຈາກລັດຖະບານມົງໂກນເພື່ອຮັບຟັງຜົນສໍາເລັດ, ສິ່ງທ້າທາຍ ແລະ ບົດຮຽນທີ່ຖອດຖອນໄດ້ຂອງເຂົາເຈົ້າ, ແລະ ມັນມີຄຸນຄ່າຫຼາຍ ທີ່ໄດ້ເຫັນສູນບໍລິການຄວາມຮຸນແຮງບົນພື້ນຖານທາງເພດ ແລະ ລະບົບຂໍ້ມູນເຫຼົ່ານີ້ດ້ວຍຕາຂອງພວກເຮົາເອງ ເພື່ອວ່າພວກເຮົາຈະສາມາດປັບໃຊ້ໃຫ້ເຂົ້າກັບສະພາບການຂອງລາວ ຂະນະທີ່ພວກເຮົາມີແຜນເປີດສູນປົກປ້ອງແມ່ຍິງ ແລະ ເດັກ 4 ແຫ່ງໃນປີນີ້”.
ການລົງຢ້ຽມຢາມ ສູນບໍລິການປະຕູດຽວຈາກຂະແໜງການຕ່າງໆ ເຊັ່ນ ຂະແໜງປ້ອງກັນຄວາມສະຫງົບ, ຂະແໜງສັງຄົມ ແລະ ໂຮງຫມໍໃນນະຄອນຫຼວງ ອູລານບັນຕາ (Ulaanbaatar) ແລະ ແຂວງ ດາຄານ (Darkhan) ໄດ້ໃຫ້ບົດຮຽນອັນລໍ້າຄ່າແກ່ລັດຖະບານລາວກ່ຽວກັບຄວາມປອດໄພ, ຄວາມໝັ້ນຄົງ ແລະ ການຖືເອົາຜູ້ລອດຊີວິດເປັນໃຈກາງຢູ່ສະເໝີ. ສູນບໍລິການປະຕູດຽວ ມີຈຸດປະສົງເພື່ອສະຫນອງການສະຫນັບສະຫນູນແບບຮອບດ້ານສໍາລັບຄວາມຮຸນແຮງບົນພື້ນຖານທາງເພດ, ດໍາເນີນກິດຈະກໍາປູກຈິດສໍານຶກເພື່ອປ້ອງກັນຄວາມຮຸນແຮງໂດຍຜ່ານການປ່ຽນແປງພຶດຕິກໍາ, ແລະ ເສີມສ້າງການປະສານງານຈາກຫຼາຍຂະແໜງການ ເພື່ອຮັບປະກັນວ່າ ຈະບໍ່ມີປະຕູໃດທີ່ຜູ້ລອດຊີວິດມາເຄາະ ເປັນ "ປະຕູທີີ່ຜິດ." ການສ້າງຕັ້ງ ສູນບໍລິການປະຕູດຽວ ກໍຍັງສອດຄ່ອງກັບແຜນປະຕິບັດງານແຫ່ງຊາດ ຄັ້ງທີ 2 ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ໃນ ສປປ ລາວ (2021-2025) (NPAVAW).
ທ່ານ Khalid Sharifi, ຫົວໜ້າຫ້ອງການ UNFPA ມົງໂກລີ ກ່າວວ່າ, “ພວກເຮົາພູມໃຈທີ່ໄດ້ສະໜັບສະໜູນຄະນະຜູ້ແທນລາວ ໃນການຢ້ຽມຢາມ ມົງໂກລີ ຄັ້ງນີ້ ເຊິ່ງໄດ້ແລກປ່ຽນການປະຕິບັດທີ່ດີກ່ຽວກັບການປ້ອງກັນ ແລະ ຕອບໂຕ້ຄວາມຮຸນແຮງບົນພື້ນຖານທາງເພດ. ການສ້າງຕັ້ງສູນບໍລິການປະຕູດຽວ ແລະ ການສ້າງຂໍ້ມູນເພື່ອກໍານົດທິດທາງນະໂຍບາຍ ແມ່ນຂັ້ນຕອນສໍາຄັນຕໍ່ກັບການແກ້ໄຂຄວາມຮຸນແຮງບົນພື້ນຖານທາງເພດຢ່າງມີປະສິດທິພາບ. ໂດຍການແລກປ່ຽນປະສົບການ ແລະ ຄວາມຮູ້ຂອງພວກເຮົາ, ພວກເຮົາຫວັງວ່າສາມາດປະກອບສ່ວນເຂົ້າໃນການພັດທະນາກົນໄກປົກປ້ອງຜູ້ລອດຊີວິດແບບຮອບດ້ານໃນ ສປປ ລາວ ແລະ ເພີ່ມທະວີການຮ່ວມມືໃຕ້-ໃຕ້ ໃນການຕໍ່ສູ້ກັບບັນຫາດ້ານສາທາລະນະສຸກໃນທົ່ວໂລກ.”
ການຢ້ຽມຢາມຄັ້ງນີ້ ຈະເລັ່ງລັດຜົນໄດ້ຮັບໃນການສ້າງຄວາມເຂັ້ມແຂງທາງດ້ານການບໍລິການດ້ານສັງຄົມ ແລະ ສຸຂະພາບໃຫ້ແກ່ຜູ້ລອດຊີວິດຈາກຄວາມຮຸນແຮງບົນພື້ນຖານທາງເພດ ແລະ ຮັບປະກັນໃຫ້ມີທີ່ພັກຫຼົບໄພທີ່ປອດໄພ ແລະ ສູນບໍລິການປະຕູດຽວທີ່ໄດ້ມາດຕະຖານສາກົນ, ເຜີຍແຜ່ເຖິງຄວາມສໍາຄັນໃຫ້ລັດຖະບານໄດ້ລິເລີ່ມ ແລະ ເປັນເຈົ້າການ ລະບົບຂໍ້ມູນການບໍລິຫານຄວາມຮຸນແຮງບົນພື້ນຖານທາງເພດແບບດິຈິຕອນ ພ້ອມທັງຮັດແໜ້ນສາຍພົວພັນລະຫວ່າງ ລາວ ແລະ ມົງໂກລີ ໂດຍຜ່ານການຮ່ວມມືສາມຫລ່ຽມໃຕ້-ໃຕ້ ລະຫວ່າງຄູ່ຮ່ວມງານຂອງລັດຖະບານທີ່ມີພັນທະໃນການຕອບໂຕຕໍ່ຄວາມຮຸນແຮງບົນພື້ນຖານທາງເພດ.
“ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນການລະເມີດສິດທິມະນຸດທີ່ແຜ່ຫຼາຍທີ່ສຸດໃນໂລກ. ຄວາມຮຸນແຮງປະເພດນີ້ບໍ່ຈໍາແນກວ່າຈະເລືອກເກີດຢູ່ສັງຄົມ, ເສດຖະກິດ ຫຼື ຊາດໃດ. ພວກເຮົາຂໍຂອບໃຈອົງການ UNFPA ປະຈໍາ ມົງໂກລີ ແລະ ລັດຖະບານມົງໂກລີ ທີ່ເຮັດວຽກຢ່າງໃກ້ຊິດກັບຄະນະຜູ້ແທນລາວ ເພື່ອເພີ່ມທະວີການແລກປ່ຽນຄວາມຮູ້ໂດຍຜ່ານການຮ່ວມມືສາມຫຼ່ຽມນີ້,” ກ່າວໂດຍ ທ່ານ ນາງ ມາຣຽມ ຄານ, ຜູ້ຕາງໜ້າ ອົງການ UNFPA ປະຈຳ ສປປ ລາວ.
***
ອົງການ UNFPA ແມ່ນອົງການ ສປຊ ທີ່ສົ່ງເສີມວຽກງານສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ, ລວມທັງ ສປປ ລາວ, ເພື່ອບັນລຸການເສຍຊີວິດຂອງແມ່ໃຫ້ເປັນສູນ, ການວາງແຜນຄອບຄົວທີ່ບໍ່ໄດ້ຮັບການສະໜອງ, ຄວາມຮຸນແຮງບົນພື້ນຖານທາງເພດເປັນສູນ.
ສໍາລັບຂໍ້ມູນເພີ່ມເຕີມ, ກະລຸນາຕິດຕໍ່:
