08 ທັນວາ 2022, ນະຄອນຫຼວງວຽງຈັນ, ສປປ ລາວ - ສະຖານທູດເຢຍລະມັນ ນະຄອນຫຼວງວຽງຈັນ ແລະ UNFPA ໄດ້ຮ່ວມກັນນໍາພາຈັດງານລະນຶກ 16 ວັນ ຕ້ານຄວາມຮຸນແຮງຕໍ່ແມ່ຍິງ ແລະ ເດັກຍິງ. ລັດຖະບານ, ຄູ່ຮ່ວມພັດທະນາ ແລະ ນັກສຶກສາໄດ້ເຕົ້າໂຮມກັນຢູ່ສະຖານທູດເພື່ອຮ່ວມກັນປະຕິເສດຕໍ່ຄວາມຮຸນແຮງບົດພື້ນຖານທາງເພດ ແລະ ສືບຕໍ່ຄວາມພະຍາຍາມເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນປີໜ້າທີ່ຈະມາເຖິງນີ້.
ປີນີ້, 76 ຄູ່ຮ່ວມມືໃນ ສປປ ລາວ ໄດ້ເຂົ້າຮ່ວມກັບ UNFPA ເພື່ອຮຽກຮ້ອງການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ຢ່າງສຳເລັດຜົນ ພາຍໃຕ້ຫົວຂໍ້ “ຮ່ວມກັນ! ເຄື່ອນໄຫວເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ”.
ພະນະທ່ານ ນາງ ອິນລາວັນ ແກ້ວບຸນພັນ, ກຳມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ຮອງປະທານ ຜູ້ປະຈຳການ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ), ຜູ້ທີ່ຊີ້ນໍາວຍກງານປົກປ້ອງສິດ ທິຂອງແມ່ຍິງ ແລະ ເດັກຍິງ ໃນ ສປປ ລາວ ກ່າວວ່າ “ຂ້າພະເຈົ້າຂໍຮຽກຮ້ອງມາຍັງທຸກພາກສ່ວນ ກະຊວງ-ອົງການ, ອົງການຈັດຕັ້ງທາງສັງຄົມ ແລະ ອື່ນໆ ຈົ່ງຮ່ວມກັນປ້ອງກັນຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຕາມພາລະໜ້າທີ ທີ່ໄດ້ລະບຸໄວ້ໃນ ກົດໝາຍ ແລະ ລັດຖະທຳມະນູນຂອງ ສປປ ລາວ.ໂດຍສະເພາະແມ່ນຜູ້ຊາຍ, ໃນການລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ຜູ້ຊາຍກໍ່ມີບົດບາດສໍາຄັນຕໍ່ກັບວຽກງານທີ່ຕ້ອງເຮັດຮ່ວມກັນດັ່ງກ່າວ.”
ສໍາລັບປີ 2022, ຄຊກມດ, ສູນກາງສະຫະພັນແມ່ຍິງລາວ ແລະ ອົງການ UNFPA ໄດ້ລິເລີ່ມຂະບວນການດັ່ງກ່າວໃນວັນທີ 25 ພະຈິກ ທີ່ ປະຕູໄຊ.ຈາກນັ້ນກໍ່ໄດ້ມີການສືບຕໍ່ຈັດກິດຈະກໍາຕ່າງໆຫຼາກຫຼາຍຢ່າງເຊັ່ນ:ສູນທອນພົດຂອງທ່ານນາຍົກລັດຖະມົນຕີ ເນື່ອງໃນໂອກາດ ວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ອອກສື່ໂທລະພາບ,ໜັງສືພິມ, ວິທະຍຸ ແລະ ອື່ນໆ, ຈັດປາຖະກະຖາ ເນື່ອງໃນຫົວຂໍ້ຕ່າງໆ ທີ່ຕິດພັນການການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ຍ່າງເພື່ອສຸຂະພາບ, ຈັດເວທີ່ ສົນທະນາລະຫວ່າງພາກລັດ ແລະ ອົງການຈັດຕັ້ງສາກົນ, ຄູ່ຮ່ວມພັດທະນາ ແລະ ອົງການຈັດຕັ້ງທາງສັງຄົມກ່ຽວກັບວຽກງານ ຕ້ານການໃຊ້ຄວາມຮຸນແຮງຕໍ່ແມ່ຍິງ, ຝຶກອົບຮົມ ໃຫ້ ຄວາມຮູ້ ແກ່ສື່ມວນຊົນ, ສຳພາດການນຳພັກ-ລັດ, ເປີດໄຟສີນ້ຳໝາກກ້ຽງໃສ່ປະຕູໄຊ, ປະກວດຮ້ອງເພັງ, ບົດລະຄອນ, ຈັດຫ້ອງຮຽນການສອນສິລະປະປ້ອງກັນຕົວໃຫ້ແມ່ຍິງ, ເດັກຍິງ, ແມ່ຍິງຂ້າມເພດ ແລະ ແມ່ຍິງເສຍອົງຄະ ແລະ ກິດຈະກໍາອື່ນໆ ໃນທົ່ວປະເທດຈາກບັນດາຄູ່ຮ່ວມມື 76 ອົງກອນ ເພື່ອເປັນການໂຄສະນາເຜີຍແຜ່ ຄວາມຮູ້ໃຫ້ທຸກພາກສ່ວນ ແລະ ມວນຊົນໃນທົ່ວສັງຄົມ ໄດ້ມີຄວາມຮັບຮູ້ເຂົ້າໃຈຖືກຕ້ອງວ່າ ຄວາມຮຸນແຮງຕໍ່ແມ່ແມ່ຍິງ ແລະ ເດັກຍິງ ເປັນການລ່ວງລະເມີດສິດທິມະນຸດຂັ້ນພື້ນຖານຂອງແມ່ຍິງ, ເປັນການຈຳແນກ, ແບ່ງແຍກ, ກີດກັ້ນ, ຂັດຂວາງບໍ່ໃຫ້ແມ່ຍິງໄດ້ເຂົ້າຮ່ວມ ແລະ ມີສ່ວນຮ່ວມໃນດ້ານຕ່າງໆ ອັນສົ່ງຜົນກະທົບຢ່າງຫຼວງຫຼາຍຕໍ່ການພັດທະນາແມ່ຍິງເວົ້າສະເພາະ, ເວົ້າລວມແມ່ນເປັນອຸປະສັກກີດຂວາງຕໍ່ການພັດທະນາປະເທດຊາດ ແລະ ບັນລຸເປົ້າໝາຍການພັດທະນາແບບຍືນຍົງ.
ທ່ານ ນາງ ມາຣຽມ ຄານ, ຜູ້ຕາງໜ້າ UNFPA ປະຈໍາ ສປປ ລາວ, ກ່າວວ່າ, “ປະຊາກອນໂລກມີຕົວເລກຈໍານວນຢູ່ທີ່ 8 ຕື້ຄົນ ເມື່ອບໍ່ດົນມານີ້ ແລະ ປະຊາກອນຂອງ ສປປ ລາວ ເອງກໍ່ຄາດວ່າຈະເພີ່ມຂຶ້ນເປັນ 8,1 ລ້ານຄົນໃນປີ 2030. ເຄິ່ງໜຶ່ງຂອງຈໍານວນປະຊາກອນໂລກ ແລະ ສປປ ລາວ ແມ່ນແມ່ຍິງ ແລະ ເດັກຍິງ, ແຕ່ຫາກເມື່ອສຶກສາຂໍ້ມູນລົງເລິກແລ້ວຈະພົບວ່າ ຄຸນະພາບຂອງການສຶກສາ, ສຸຂະພາບ, ການເຂົ້າເຖິງໂອກາດ ແລະ ຄວາມປອດໄພ ຂອງປະຊາກອນກຸ່ມນີ້ແມ່ນບໍ່ທັນໄດ້ຮັບຜົນປະໂຫຍດຢ່າງສະເໝີພາບເທື່ອ. ແຕ່ຂ່າວດີແມ່ນ: ໃນ ສປປ ລາວ, ບັນດາກົດໝາຍ ແລະ ນະໂຍບາຍຕ່າງໆໄດ້ຮັບການພັດທະນາຂຶ້ນເປັນຢ່າງດີ ເພື່ອປົກປ້ອງສິດທິຂອງແມ່ຍິງ ແລະ ເດັກຍິງ. ສະນັ້ນ ພວກເຮົາຍັງມີພື້ນທີ່ກວ້າງຂວາງໃນການສົ່ງເສີມ ແລະ ສົນທະນາກ່ຽວກັບບັນຫາດັ່ງກ່າວ, ດັ່ງນັ້ນພວກເຮົາຈຶ່ງສຸມໃສ່ຈັດຕັ້ງປະຕິບັດກົດຫມາຍ, ນະໂຍບາຍ ແລະ ຍຸດທະສາດເຫຼົ່ານີ້!”
ພະນະທ່ານ ນາງ ແອັນເນັດ ຄະໂນບຣ໋ອກ, ເອກອັກຄະລັດຖະທູດ ເຢຍລະມັນ ປະຈໍາ ສປປ ລາວ, ກ່າວວ່າ, “ເຢຍລະມັນເປັນປະເທດໜຶ່ງທີ່ໃຫ້ການຊ່ວຍເຫຼືອສຳຄັນທີ່ສຸດໃຫ້ກັບອົງການ UNFPA ແລະ ສະໜັບສະໜູນເປົ້າໝາຍຂອງອົງການສະຫະປະຊາຊາດ, ເຊິ່ງໄດ້ເອົາໃຈໃສ່ເປັນພິເສດຕໍ່ ສປປ ລາວ. ພວກເຮົາຍັງຈະຕ້ອງໄດ້ສືບຕໍ່ຮ່ວມມືກັນຢ່າງໃກ້ສິດເພື່ອເຮັດວຽກກັບລັດຖະບານລາວໃນການຢຸດຕິການໃຊ້ຄວາມຮຸນແຮງຕໍ່ແມ່ຍິງໄປຕາມເປົ້າໝາຍທີ່ວາງໄວ້ຊັດເຈນ.”
The ຂະບວນການລະນຶກ16 ວັນເພື່ອຕ້ານຕໍ່ຄວາມຮຸນແຮງບົນພື້ນຖານທາງເພດ ແມ່ນຂະບວນການສາກົນປະຈຳປີທີ່ເລີ່ມຂຶ້ນໃນວັນທີ 25 ພະຈິກ ກໍ່ຄື ວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ດຳເນີນໄປຮອດວັນທີ 10 ທັນວາ, ວັນສິດທິມະນຸດ. ຂະບວນການດັ່ງກ່າວໄດ້ຖືກລິເລີ່ມຂຶ້ນໂດຍບັນດານັກເຄື່ອນໄຫວຢູ່ໃນ ສະຖາບັນຜູ້ນໍາແມ່ຍິງສາກົນ ທີ່ເປີດຕົວໃນປີ 1991 ແລະ ຖືກນໍາໃຊ້ເປັນຍຸດທະສາດທີ່ຖືກຈັດຕັ້ງປະຕິບັດໂດຍບຸກຄົນ ແລະ ອົງການຈັດຕັ້ງໃນທົ່ວໂລກ.
***************
ອົງການ UNFPA ແມ່ນອົງການ ສປຊ ທີ່ສົ່ງເສີມວຽກງານສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ, ລວມທັງ ສປປ ລາວ, ເພື່ອບັນລຸການເສຍຊີວິດຂອງແມ່ໃຫ້ເປັນສູນ, ການວາງແຜນຄອບຄົວທີ່ບໍ່ໄດ້ຮັບການສະໜອງ, ຄວາມຮຸນແຮງບົນພື້ນຖານທາງເພດເປັນສູນ
ສໍາລັບຂໍ້ມູນເພີ່ມເຕີມ, ກະລຸນາຕິດຕໍ່:
