ວັນທີ 30 ສິງຫາ 2022, ນະຄອນຫຼວງວຽງຈັນ - ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ເດັກ (ຄຊກມດ) ຮ່ວມກັບອົງການສະຫະປະຊາຊາດ ກອງທຶນສໍາລັບປະຊາກອນ (UNFPA) ໂດຍໄດ້ຮັບການ ສະໜັບສະໜູນດ້ານທຶນຮອນຈາກອົງການຮ່ວມມືສາກົນ ສ.ເກົາຫຼີ ປະຈໍາ ສ ປປ ລາວ (KOICA) ໄດ້ຈັດກອງປະຊຸມເພື່ອຮັບຮອງ ແລະ ເຜີຍແຜ່ກ່ຽວກັບ ''ມາດຕະຖານການດໍາເນີນງານ ການຄຸ້ມຄອງ, ການປະສານງານ ແລະ ເສັ້ນທາງການສົ່ງຕໍ່ແມ່ຍິງ ແລະ ເດັກຍິງ ຜູ້ຖືກເຄາະຮ້າຍຈາກຄວາມຮຸນແຮງ”.
ກອງປະຊຸມຄັ້ງນີ້ໄດ້ຈັດຂື້ນຮ່ວມກັບພາກສ່ວນກ່ຽວຂ້ອງຈາກບັນດາຂະແໜງການຄື: ສາທາລະນະສຸກ, ສັງຄົມ, ຍຸຕິທຳ ແລະ ຕຳຫຼວດ ແລະ ບັນດາກະຊວງກ່ຽວຂ້ອງ ພ້ອມທັງຄູ່ຮ່ວມພັດທະນາ ທີ່ຮັບຜິດຊອບວຽກງານຕອບໂຕ້ຄວາມຮຸນແຮງບົນພື້ນຖານທາງເພດ.
ມາດຕະຖານການດໍາເນີນງານ (SOP) ການປະສານງານສະບັບນີ້ ແມ່ນໝາກຜົນຂອງການປຶກສາຫາລື ດ້ານວິຊາການຢ່າງເຂັ້ມຂຸ້ນ ລະຫວ່າງທຸກຂະແຫນງການທີ່ກ່ຽວຂ້ອງ ພາຍໃຕ້ການນໍາພາຂອງ ຄຊກມດ. ມາດຕະຖານການດໍາເນີນງານນີ້ ແມ່ນສອດຄ່ອງກັບ ຊຸດບໍລິການທີ່ຈໍາເປັນສໍາລັບ ແມ່ຍິງ ແລະ ເດັກຍິງທີ່ຖືກຄວາມຮຸນແຮງ ທີ່ໄດ້ຮັບການຍອມຮັບໃນລະດັບສາກົນ. ການສ້າງມາດຕະຖານດັ່ງກ່າວ ເປັນບາດກ້າວອັນສຳຄັນຂອງ ສປປ ລາວ ໃນການຮັບປະກັນໃຫ້ທຸກຂະແໜງການໃນການປະສານງານ ແລະ ຮ່ວມມືກັນ ແກ້ໄຂຄວາມຮຸນແຮງ ຕໍ່ແມ່ຍິງ ແລະ ເດັກຍິງ.
ຜົນການສຳຫລວດຂອງ ສປປ ລາວ ກໍ່ຄ້າຍຄືກັນກັບຜົນການການສຳຫລວດວາມຮຸນແຮງຕໍ່ແມ່ຍິງໃນທົ່ວໂລກ ຄື ຜົນການສຳຫລວດຄວາມຮຸນແຮງຕໍ່ແມ່ຍິງໃນລາວ ປີ 2014 ກໍ່ສະແດງໃຫ້ເຫັນວ່າ ແມ່ຍິງ 1 ໃນ 3 ຄົນ ໃນຊີວິດຂອງເຂົາເຈົ້າ ເຄີຍປະສົບກັບຄວາມຮຸນແຮງຢ່າງໜ້ອຍໜຶ່ງປະເພດ (ທາງກາຍ, ທາງເພດ ຫຼື ອາລົມຄວາມຮູ້ສຶກ). ຢ່າງໃດກໍ່ຕາມ, ມີພຽງແຕ່ປະມານ 10% ຂອງຜູ້ລອດຊີວິດລາຍງານ ຫຼື ຊອກຫາການຊ່ວຍເຫຼືອເຊັ່ນ ຈາກ ສຸກສາລາ, ອົງການຊ່ວຍເຫຼືອແມ່ຍິງ, ຫຼື ຕໍາຫຼວດ.
ການແກ້ໄຂຄວາມຮຸນແຮງຕໍ່ແມ່ຍິງໃນລາວ ຍັງບໍ່ທັນເປັນລະບົບ ແລະ ບໍ່ໄດ້ຢູ່ໃນຂັ້ນສະຖາບັນ. ຜ່ານມາແມ່ນນຳໃຊ້ວິທີການແກ້ໄຂແບບກະແຈກກະຈາຍ ແລະ ເປັນມາດຕະການແກ້ໄຂບັນຫາສະເພາະໜ້າ ເພາະຍັງບໍ່ມີກົນໄກການແກ້ໄຂທີ່ເປັນມາດຕະຖານ ແລະ ຮັບປະກັນການບໍລິການ ການຊ່ວຍເຫຼືອມີຄຸນນະພາບ.
ການສ້າງມາດຕະຖານການດໍາເນີນງານນີ້ ແມ່ນເພື່ອໃຫ້ທຸກພາກສ່ວນກ່ຽວຂ້ອງນຳໃຊ້. ມາດຕະຖານການປະສານງານສະບັບນີ້ ມີຄວາມສໍາສໍາຄັນຕໍ່ກັບການສ້າງຄວາມເຂັ້ມແຂງໃຫ້ລະບົບການບໍລິການ ແລະ ເປັນກອບວຽກ ສໍາລັບຂະແຫນງການຕ່າງໆໃນການເຮັດວຽກງານຂອງຕົນເອງ ທັງສາຍຕັ້ງ ແລະ ສາຍຂວາງ. ຊຶ່ງຫມາຍຄວາມວ່າ, ເມື່ອເຄາະຮ້າຍ/ຜູ້ລອດຊີວິດຕ້ອງການການຊ່ວຍເຫຼືອ ແລະ ຕັດສິນໃຈ ຍ່າງເຂົ້າຂໍຄວາມຊ່ວຍເຫຼືອຈາກພາກສ່ວນໃດໜຶ່ງ ບໍ່ໄດ້ຖືວ່າເປັນ "ປະຕູທີ່ຜິດ" - ບໍ່ວ່າຈະເປັນໂຮງຫມໍ, ຫ້ອງການສະຫະພັນແມ່ຍິງລາວ, ທີ່ພັກທີ່ປອດໄພ, ໂທຫາສາຍດ່ວນຂອງສະຫະພັນແມ່ຍິງລາວ ຫຼື ໄປຫາສະຖານີຕໍາຫຼວດທີ່ໃກ້ທີ່ສຸດ. ຫຼັງຈາກມີການເຜີຍແຜ່ມາດຕະຖານການປະສານງານນີ້ ຈະເຮັດໃຫ້ຜູ້ໃຫ້ບໍລິການຂອງທຸກຂະແໜງການສາມາດສະຫນອງການດູແລ, ການບໍລິການ ແລະ ຊ່ວຍເຫຼືອ ຕາມພາລະບົດບາດຂອງຕົນ. ພ້ອມດຽວກັນນັ້ນ ຜູ້ໃຫ້ບໍລິການຍັງຈະໄດ້ຮັບການຝຶກອົບຮົມ ເພື່ອສົ່ງຕໍ່ຜູ້ເຄາະຮ້າຍ/ຜູ້ລອດຊີວິດໃຫ້ຂະແຫນງການອື່ນທີ່ໃຫ້ບໍລິການ ແລະ ການຊ່ວຍເຫຼືອຜູ້ຖືກຄວາມຮຸນແຮງ.
ດຣ ອິນລາວັນ ແກ້ວບຸນພັນ , ຮອງປະທານຄະນະປະຈຳການ ຄຊກມດ ທັງເປັນ ປະທາສູນກາງສະຫະພັນແມ່ຍິງລາວກ່າວວ່າ: “ມາດຕະຖານການປະສານງານສະບັບນີ້ ຂອງ ສປປ ລາວ ສະບັບນີ້ ເປັນກອບວຽກແນະນຳໃຫ້ຜູ້ບໍລິການ ຜູ້ເຄາະຮ້າຍ/ຜູ້ລອດຊີວິດຈາກຄວາມຮຸນແຮງໃນທົ່ວປະເທດ. ສິ່ງສໍາຄັນແມ່ນແມ່ຍິງ ແລະ ເດັກຍິງທີ່ຖືກຄວາມຮຸນແຮງ ຕິດຕໍ່ຂໍຄວາມຊ່ວຍເຫຼືອຈາກຜູ້ໃຫ້ບໍລິການ ມີຄວາມຮູ້ສຶກປອດໄພ ແລະ ເຄົາລົບ, ພ້ອມທັງມີທາງເລືອກ ແລະ ໄດ້ຕັດສິນໃຈເລືອກການດູແລ ແລະ ການບໍລິການທີ່ພວກເຂົາຕ້ອງການດ້ວຍຕົວເຂົາເຈົ້າເອງ.”
ລັດຖະບານແຫ່ງ ສປປ ລາວ ໄດ້ສະໜັບສະໜູນການລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ໂດຍຜ່ານ ກົດໝາຍວ່າດ້ວຍການປ້ອງກັນ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ (2014), ແຜນດໍາເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກ (2021-2025), ແລະ ຄໍາໝາຍໝັ້ນຕໍ່ ກອງປະຊຸມສາກົນກ່ຽວກັບປະຊາກອນ ແລະ ການພັດທະນາ “ICPD25, ສົນທິສັນຍາສາກົນ ເພື່ອລຶບລ້າງທຸກຮູບການຈຳແນກຕໍ່ແມ່ຍິງ (CEDAW), ເວທີການປະຕິບັດງານປັກກິ່ງ.
ທ່ານນາງ ມາຣຽມ ຄານ, ຜູ້ຕາງໜ້າອົງການ UNFPA ປະຈຳ ສປປ ລາວ ກ່າວວ່າ: “ມາດຕະຖານການປະສານງານສະບັບນີ້ ໄດ້ເປັນກອບຊີ້ນຳການປະສານງານລະດັບຊາດ ໃຫ້ຄະນະຊີ້ນຳລະດັບສູງຈາກບັນດາກະຊວງຕົ້ນຕໍທີ່ສະໜອງການບໍລິການ ແລະ ການຊ່ວຍເຫຼືອ ສຳລັບຜູ້ຖືກຄວາມຮຸນແຮງ. ນອກນັ້ນມາດຕະຖານການປະສານງານສະບັບນີ້ ຍັງກຳນົດວິທີການສົ່ງຕໍ່ ສໍາລັບຜູ້ເຄາະຮ້າຍ/ຜູ້ລອດຊີວິດຈາກຄວາມຮຸນແຮງໄປສູ່ການບໍລິການອື່ນໆທີ່ມີຢູ່ ເຊັ່ນການຊ່ວຍເຫຼືອດ້ານການປິ່ນປົວທາງດ້ານສຸຂະພາບ, ດ້ານຈິດໃຈ - ສັງຄົມ, ການຊ່ວຍເຫຼືອຈາກພາກສ່ວນຕໍາຫຼວດ ແລະ ການຊ່ວຍເຫຼືອທາງດ້ານກົດຫມາຍ/ຍຸຕິທໍາ " .
ພາຍຫຼັງການຮັບຮອງ, ມາດຕະຖານການປະສານງານສະບັບນີ້ ຈະໄດ້ຖືກຈັດຕັ້ງປະຕິບັດໃນບັນດາແຂວງເປົ້າໝາຍ ກ່ອນຈະຂະຫຍາຍໄປທົ່ວປະເທດ.
****************************
ອົງການ UNFPA ແມ່ນໜ່ວຍງານໜຶ່ງຂອງອົງການສະຫະປະຊາຊາດທີ່ເຮັດວຽກໃນດ້ານ ສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ ລວມທັງ ສປປ ລາວ. ມີເປົ້າໝາຍໃນການຫຼຸດການຕາຍຂອງແມ່ທີ່ສາມາດປ້ອງກັນໄດ້ໃຫ້ເປັນ 0, ຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງໃຫ້ເປັນ 0, ຄວາມຮຸນແຮງບົນພື້ນຖານທາງເພດ ໃຫ້ເປັນ 0.
ສໍາລັບຂໍ້ມູນເພີ່ມເຕີມ ກະລຸນາຕິດຕໍ່ໄດ້ທີ່:
ທ່ານນາງ ສີສຸວັນ ວໍຣະບຸດ.
ຫົວໜ້າແຜນງານບົດບາດຍິງ-ຊາຍ
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: vorabouth@unfpa.org
ທ່ານ ນາງ Fatima Zahra Benyahia
ຜູ້ຊ່ຽວຊານດ້ານການຮ່ວມມື ແລະນະວັດຕະກໍາ,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: fbenyahia@unfpa.org
