ວັນທີ 19 ສິງຫາ 2022, ນະຄອນຫຼວງວຽງຈັນ - ກະຊວງສາທາລະນະສຸກ ແລະ ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ຮ່ວມກັບ ອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ໂດຍໄດ້ຮັບການສະໜັບສະໜູນດ້ານທຶນຈາກອົງການຮ່ວມມືສາກົນ ສ.ເກົາຫຼີ ປະຈໍາ ສ ປປ ລາວ (KOICA) ໄດ້ຈັດກອງປະຊຸມ ເພື່ອຮັບຮອງ ແລະ ເຜີຍແຜ່ ມາດຕະຖານການດໍາເນີນງານວຽກງານຕອບສະໜອງການບໍລິການເເກ່ຜູ້ທີ່ຖືກຄວາມຮຸນເເຮງ ສໍາລັບສະຖານທີ່ບໍລິການສຸຂະພາບ (The Health SOP).
ກອງປະຊຸມຄັ້ງນີ້ ມີຜູ້ເຂົ້າຮ່ວມ ທັງໝົດ 58 ທ່ານ, ຍິງ 45 ທ່ານ, ຊາຍ 13 ທ່ານ ແລະ ເຂົ້າຮ່ວມທາງອອນລາຍ ຈໍານວນ 28 ທ່ານ ຈາກຂະແໜງສາທາລະນະສຸກ, ບັນດາກະຊວງກ່ຽວຂ້ອງ , ຄູ່ຮ່ວມພັດທະນາ ແລະ ບັນດາຜູ້ຊ່ຽວຊານ. ເພື່ອເປັນການຮັບຮອງເອົາເອກະສານທີ່ສຳຄັນສະບັບນີ້. SOP ສະບັບນີ້ ໄດ້ຖືກພັດທະນາຂຶ້ນໂດຍຜ່ານການປຶກສາຫາລືດ້ານວິຊາການລະຫວ່າງຂະແໜງການສາທາລະນະສຸກ, ສັງຄົມ ແລະ ຍຸຕິທໍາ ພ້ອມທັງຄູ່ຮ່ວມພັດທະນາທີ່ສໍາຄັນ ພາຍໃຕ້ການນໍາພາຂອງກະຊວງສາທາລະນະສຸກ ແລະ ຄຊກມດ. SOP ຂອງຂະແໜງສາທາລະນະສຸກນີ້ ແມ່ນສອດຄ່ອງກັບ ຊຸດບໍລິການທີ່ຈໍາເປັນສໍາລັບ ແມ່ຍິງ ແລະ ເດັກຍິງ ທີ່ຖືກຄວາມຮຸນແຮງ ທີ່ໄດ້ຮັບການຍອມຮັບໃນລະດັບສາກົນ (the ESP), ນໍາໃຊ້ສໍາລັບການກວດຮ່າງກາຍ, ການປິ່ນປົວ ແລະ ການສົ່ງຕໍ່ຜູ້ລອດຊີວິດຈາກຄວາມຮຸນແຮງໃນສະຖານທີ່ໃຫ້ບໍລິການສຸຂະພາບ.
ທ່ານ ດຣ ໄພວັນ ແກ້ວປະເສີດ , ຮອງລັດຖະມົນຕີ ກະຊວງສາທາລະນະສຸກ , ປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ກະຊວງສາທາລະນະສຸກ ໄດ້ກ່າວເຖິງຄວາມສໍາຄັນຂອງ SOPs ໃນການເປິດຊ່ອງຫວ່າງໃນການຈັດຕັ້ງປະຕິບັດແຜນດໍາເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກ (2021-2025) ວ່າ: “ເມື່ອມີມາດຖານການດໍາເນີນງານ ການສະໜັບສະໜູນຜູ້ລອດຊີວິດຈາກຄວາມຮຸນແຮງໃນສະຖານທີ່ບໍລິການສຸຂະພາບກໍ່ຈະເປັນລະບົບດີຂຶ້ນ. ຜູ້ລອດຊີວິດຈາກຄວາມຮຸນແຮງບົນພື້ນຖານທາງເພດ ຈະໄດ້ຮັບການບໍລິການດ້ານສຸຂະພາບທີ່ມີຄຸນນະພາບ ແລະ ຖືກສົ່ງຕໍ່ໄປຫາຜູ້ສະໜອງການບໍລິການຈາກຂະແໜງ ການອື່ນໆ ຕາມຄວາມຕ້ອງການ. ບໍ່ວ່າຜູ້ລອດຊີວິດໄປຊອກຫາການບໍລິການຢູ່ໃສ ກໍ່ຈະໄດ້ຮັບການຕອບສະໜອງທີ່ມີການປະສານສົມທົບກັນ, ເຊິ່ງເປັນການຕອບສະໜອງທີ່ແທດເໝາະກັບສະພາບຂອງ ສ ປ ປ ລາວ ແລະ ໄດ້ຕາມມາດຕະຖານສາກົນ .”
ການສະກັດກັ້ນຄວາມຮຸນແຮງບົນພື້ນຖານທາງເພດ/ຄວາມຮຸນແຮງຕໍ່ແມ່ຍິງ ແມ່ນຄວາມໝາຍໝັ້ນຂອງ ສປປ ລາວ ຕໍ່ກອງປະຊຸມສາກົນກ່ຽວກັບປະຊາກອນ ແລະ ການພັດທະນາ “ICPD25” ທີ່ນະຄອນໄນໂຣບີ ແລະ ສາມາດ ສະໜັບສະໜູນການຈັດຕັ້ງປະຕິບັດຄໍາໝາຍໝັ້ນຂອງລາວຕໍ່ກັບສົນທິສັນຍາ ຊີດໍ, ເວທີການປະຕິບັດງານປັກກິ່ງ ແລະ ເປົ້າໝາຍການພັດທະນາແບບຍືນຍົງ. SOP ແມ່ນເຄື່ອງມືສໍາລັບການຈັດຕັ້ງປະຕິບັດຊຸດບໍລິການທີ່ຈໍາເປັນ: ການບໍລິການຜ່ານການປະສານງານຈາກຫຼາຍຂະແໜງການທີ່ມີຄຸນະພາບ ສໍາລັບແມ່ຍິງ ແລະ ເດັກຍິງ ທີ່ປະສົບກັບຄວາມຮຸນແຮງ. ການຈັດຕັ້ງປະຕິບັດຊຸດບໍລິການທີ່ຈໍາເປັນ ສາມາດຫຼຸດຜ່ອນຜົນກະທົບຂອງຄວາມຮຸນແຮງຕໍ່ສຸຂະພາບ, ຄວາມປອດໄພ ແລະ ຊີວິດຂອງແມ່ຍິງ ແລະ ເດັກຍິງ; ຊ່ວຍເຫຼືອໃນການຟື້ນຟູ ແລະ ສ້າງຄວາມເຂັ້ມແຂງໃຫ້ແມ່ຍິງ, ພ້ອມທັງປ້ອງກັນບໍ່ໃຫ້ຄວາມຮຸນແຮງເກີດຂຶ້ນໃໝ່ອີກ.
ທ່ານ ນາງ ມາຣຽມ ເອຄານ, ຜູ້ຕາງໜ້າອົງການ UNFPA ປະຈຳ ສປປ ລາວ ກ່າວວ່າ: “UNFPA ສະໜັບສະໜູນ ສປປ ລາວ ໃນການຈັດຕັ້ງປະຕິບັດຄຳໝາຍໝັ້ນດ້ານສິດທິມະນຸດໃນເວທີສາກົນທີ່ກ່ຽວຂ້ອງກັບຄວາມສະເໝີພາບລະຫວ່າງ ຍິງ-ຊາຍ. SOP ວຽກງານຕອບສະໜອງການບໍລິການເເກ່ຜູ້ທີ່ຖືກຄວາມຮຸນເເຮງ ສໍາລັບສະຖານທີ່ບໍລິການສຸຂະພາບສະບັບນີ້ ເປັນເຄື່ອງມືສໍາລັບການປະຕິບັດ, ນໍາໃຊ້ໂດຍພະນັກງານແພດເພື່ອກວດຮ່າງກາຍ ແລະ ລະບຸຜູ້ລອດຊີວິດຈາກຄວາມຮຸນແຮງ, ສະເຫນີວິທີການປິ່ນປົວ ພ້ອມທັງສະຫນັບສະຫນູນບັນຫາຕ່າງໆທາງດ້ານຮ່າງກາຍ, ຈິດໃຈ ແລະ ຄວາມຮູ້ສຶກຂອງຜູ້ລອດຊີວິດ. SOP ສະຫນອງກອບການດໍາເນີນງານ ແລະ ຄໍາແນະນໍາທາງດ້ານການແພດສໍາລັບໂຮງຫມໍ ແລະສະຖານທີ່ໃຫ້ບໍລິການສຸຂະພາບທັງຫມົດໃນປະເທດ".
ໃຫ້ບໍລິການດ້ານສຸຂະພາບມັກຈະເປັນຜູ້ທໍາອິດທີ່ຜູ້ລອດຊີວິດຈາກຄວາມຮຸນແຮງຕິດຕໍ່ຫາ ເພື່ອຂໍຮັບການປິ່ນປົວຫຼັງຈາກໄດ້ຮັບຄວາມຮຸນແຮງ, ໂດຍສະເພາະຄວາມຮຸນແຮງທາງດ້ານຮ່າງກາຍ ຫຼື ທາງເພດ. ຜູ້ໃຫ້ບໍລິການດ້ານສຸຂະພາບຕ້ອງໃຫ້ການດູແລທີ່ຈໍາເປັນຢ່າງເປັນມືອາຊີບ, ເກັບກໍາຫຼັກຖານທາງດ້ານນິຕິວິທະຍາໃຫ້ທັນເວລາ, ແລະ ສົ່ງຕໍ່ຜູ້ລອດຊີວິດໃຫ້ການບໍລິການອື່ນໆທີ່ຈໍາເປັນ ເຊັ່ນ ການບໍລິການທາງສັງຄົມ, ຕໍາຫຼວດ, ແລະ ຍຸດຕິທໍາ. ທັງໝົດເພື່ອປົກປ້ອງຄວາມປອດໄພ ແລະ ສະຫວັດດີການຂອງຜູ້ລອດຊີວິດ.
ພາຍຫຼັງການຮັບຮອງຄັ້ງນີ້, ພະນັກງານແພດໃນ 6 ແຂວງເປົ້າໝາຍຈະໄດ້ຮັບການຝຶກອົບຮົມກ່ຽວກັບການນໍາໃຊ້ SOP ສະບັບນີ້. SOP ນີ້ ແມ່ນສ່ວນຫນຶ່ງຂອງຊຸດບໍລິການທີ່ຈໍາເປັນ ແລະ ມັນໄດ້ເຊື່ອມຕໍ່ກັບ ມາດຕະຖານການດໍາເນີນງານຂອງຂະແໜງສັງຄົມ (The Social Sector SOP) ແລະ ມາດຕະຖານການດໍາເນີນງານຂອງການປະສານງານ (The Coordination SOP), ເຊິ່ງລ້ວນແລ້ວແຕ່ໄດ້ຮັບການສະຫນັບສະຫນູນຈາກUNFPA ແລະ ຈະຖືກຮັບຮອງໃນອາທິດຕໍ່ໜ້ານີ້.
***************
ອົງການ UNFPA ແມ່ນໜ່ວຍງານໜຶ່ງຂອງອົງການສະຫະປະຊາຊາດທີ່ເຮັດວຽກໃນດ້ານ ສຸຂະພາບທາງເພດ ແລະ ສຸຂະພາບຈະເລີນພັນ, ເຮັດວຽກຢູ່ຫຼາຍກວ່າ 150 ປະເທດ ລວມທັງ ສປປ ລາວ. ມີເປົ້າໝາຍໃນການຫຼຸດການຕາຍຂອງແມ່ທີ່ສາມາດປ້ອງກັນໄດ້ໃຫ້ເປັນ 0, ຄວາມຕ້ອງການດ້ານການວາງແຜນຄອບຄົວແຕ່ບໍ່ໄດ້ຮັບການສະໜອງໃຫ້ເປັນ 0, ຄວາມຮຸນແຮງບົນພື້ນຖານທາງເພດ ໃຫ້ເປັນ 0.
ສໍາລັບຂໍ້ມູນເພີ່ມເຕີມ ກະລຸນາຕິດຕໍ່ໄດ້ທີ່:
ທ່ານ ນາງ ສີສຸວັນ ວໍຣະບຸດ
ຫົວໜ້າແຜນງານບົດບາດທາງເພດ,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: vorabouth@unfpa.org
ທ່ານ ນາງ Fatima Zahra Benyahia
ຜູ້ຊ່ຽວຊານດ້ານການຮ່ວມມື ແລະນະວັດຕະກໍາ,
ອົງການ ສະຫະປະຊາຊາດ ກອງທຶນສຳລັບປະຊາກອນປະຈໍາ ສປປ ລາວ (UNFPA)
ອີເມວ: fbenyahia@unfpa.org
