ຕິດຕາມຄວາມຄືບໜ້າແຜນງານການວາງແຜນຄອບຄົວ

ນະຄອນຫຼວງວຽງຈັນ – ການວາງແຜນຄອບຄົວ (FP) ແບບທັນສະໄໝ ແມ່ນທາງເລືອກທີ່ດີທີ່ສຸດໃນການຫຼຸດຜ່ອນການຖືພາແບບບໍ່ຕັ້ງໃຈ ແລະ ບັນດາຄວາມສ່ຽງຕ່າງໆທີ່ພົວພັນກັບການຖືພາ ແລະ ການເກີດລູກ. ຢູ່ ສປປ ລາວ, ການນຳໃຊ້ການວາງແຜນຄອບຄົວ ສືບຕໍ່ເພີ່ມຂຶ້ນຢ່າງຊ້າໆ ໃນລະດັບ 1% ຕໍ່ປີ ນີ້ໝາຍຄວາມວ່າ ມີຄວາມເປັນໄປໄດ້ຍາກທີ່ ປະເທດ ຈະບັນລຸເປົ້າໝາຍ CPR (ອັດຕາການນຳໃຊ້ວິທີຄຸມກຳເນີດ) ໄດ້ 65% ພາຍໃນປີ 2025.

ການເພີ່ມຂຶ້ນທີ່ຊັກຊ້ານີ້ ແມ່ນຍ້ອນຫຼາຍປັດໄຈ, ໜຶ່ງໃນນັ້ນ ແມ່ນການນຳໃຊ້ວິທີຄຸມກຳເນີດໄລຍະສັ້ນ ເຊັ່ນ ຢາເມັດ ແລະ ຢາສັກຄຸມກຳເນີດ ຫຼາຍກວ່າ ວິທີການຄຸມກຳເນີດໄລຍະຍາວຊົ່ວຄາວ ເຊັ່ນ ການຝັງເຂັມ ແລະ ການໃສ່ຮ່ວງ (IUD); ຄຸນະພາບຂອງການບໍລິການ FP ເຊັ່ນ ທັກສະການໃຫ້ຄຳປຶກສາທີ່ຍັງຕ່ຳ ຂອງພະນັກງານ ຍັງສ່ອງແສງເຖິງການເພີ່ມຂຶ້ນຊ້າຂອງການນຳໃຊ້ວິທີຄຸມກຳເນີດ; ແລະ ຢາແລະຜະລິດຕະພັນການວາງແຜນຄອບຄົວທີ່ຂາດສາງເປັນປະຈຳ ຢູ່ສະຖານທີ່ບໍລິການສຸຂະພາບ ໝາຍຄວາມວ່າ ແມ່ຍິງບໍ່ສາມາດໄດ້ຮັບຜະລິດຕະພັນ ໃນເວລາທີ່ພວກເຂົາເຂົ້າມາໃຊ້ບໍລິການຢູ່ສະຖານທີ່ດັ່ງກ່າວ.

ການວາງແຜນຄອບຄົວ ແມ່ນໜຶ່ງໃນເສົາຫຼັກທີ່ສຳຄັນຕໍ່ການຫຼຸດຜ່ອນອັດຕາການຕາຍຂອງແມ່ ແລະ ເດັກເກີດໃໝ່ ແລະ ປັບປຸງສຸຂະພາບ ແລະ ຊີວິດການເປັນຢູ່ຂອງແມ່ຍິງ ແລະ ລູກຂອງພວກເຂົາ. ການວາງແຜນຄອບຄົວ ຊ່ວຍໃຫ້ແມ່ຍິງ ແລະ ຜູ້ຊາຍ ຕັດສິນໃຈວ່າຈະມີລູກ ຫຼືບໍ່, ມີເມື່ອໃດ, ມີຈັກຄົນ ແລະ ຫ່າງກັນປານໃດ. ໃນປີ 2019, ການນຳໃຊ້ການບໍລິການວາງແຜນຄອບຄົວ, ສາມາດຫຼີກລ້ຽງການຖືພາແບບບໍ່ຕັ້ງໃຈໄດ້ 257,000 ຄັ້ງ, ການເອົາລູກອອກແບບບໍ່ປອດໄພ ໄດ້ 61,000 ຄັ້ງ ແລະ ການຕາຍຂອງແມ່ ໄດ້ 230 ຄົນ.

ລັດຖະບານ ສປປ ລາວ ໄດ້ໃຫ້ຄຳໝັ້ນສັນຍາຕໍ່ກັບຂະບວນການ ການວາງແຜນຄອບຄົວສາກົນ ປີ 2020 (FP2020) ເພື່ອປັບປຸງການເຂົ້າເຖິງຂໍ້ມູນ, ການບໍລິການ ແລະ ຜະລິດຕະພັນ ການວາງແຜນຄອບຄົວແບບສະໝັກໃຈ ສຳລັບແມ່ຍິງ, ຜູ້ຊາຍ ແລະ ໄວໜຸ່ມ. ນະໂຍບາຍສຸຂະພາບທາງເພດ, ສຸຂະພາບຈະເລີນພັນ, ສຸຂະພາບຂອງແມ່, ເດັກເກີດໃໝ່, ເດັກນ້ອຍ ແລະ ໄວໜຸ່ມ ສະບັບປັບປຸງ (ປີ 2019-2030), ໄດ້ສຸມໃສ່ການວາງແຜນຄອບຄົວຄືນໃໝ່ ໃຫ້ກາຍເປັນການບໍລິການທີ່ຈຳເປັນພື້ນຖານ. ນະໂຍບາຍຍັງໄດ້ໃຫ້ຄຳໝັ້ນສັນຍາທີ່ຈະຂະຫຍາຍການບໍລິການຄອບຄົວ ໄປສູ່ລະດັບສຸກສາລາ ແລະ ບ້ານ ເພື່ອເພີ່ມການເຂົ້າເຖິງຂໍ້ມູນ ແລະ ການບໍລິການສຸຂະພາບຈະເລີນພັນ ສຳລັບໄວໜຸ່ມ, ໂດຍແນ່ໃສ່ການເພີ່ມຈຳນວນແມ່ຍິງທີ່ນຳໃຊ້ການບໍລິການວາງແຜນຄອບຄົວ.

ດ້ວຍເຫດນີ້, ກົມອະນາໄມ ແລະ ສົ່ງເສີມສຸຂະພາບ ພາຍໃຕ້ການຊີ້ນຳຂອງກະຊວງສາທາລະນະສຸກ, ໂດຍໄດ້ຮັບການສະໜັບສະໜູນຈາກອົງການສະຫະປະຊາຊາດ ກອງທຶນສຳລັບປະຊາກອນ (UNFPA) ຈຶ່ງໄດ້ຈັດກອງປະຊຸມຂຶ້ນ ໃນວັນທີເດືອນຕຸລາທີ່ຜ່ານມາ ເປັນເວລາ 1 ມື້ ເພື່ອທົບທວນຄວາມຄືບໜ້າ ແລະ ຜົນສຳເລັດ ຂອງແຜນງານ FP ໃນໄລຍະປີຜ່ານມາ, ເພື່ອຕົກລົງກັນ ກ່ຽວກັບອັດຕາ mCPR ຄາດຄະເນສຳລັບ ປີ 2019 ສຳກຳລັບບົດລາຍງານຄວາມຄືບໜ້າໃນການຈັດຕັ້ງປະຕິບັດ FP2020 ແລະ ກຳນົດຂໍ້ແນະນຳ ກ່ຽວກັບ ແຜນງານ FP ສຳລັບການວາງແຜນ ແຜນການ 5 ປີ ຂອງການພັດທະນາຂະແໜງສາທາລະນະສຸກ. ກອງປະຊຸມໄດ້ເປັນເອກະພາບກັນວ່າປີຫນ້າຈະເອົາຂໍ້ມູນຂອງຜູ້ຊົມໃຊ້ວິທີຄຸມກຳເນີດແບບທັນສະໄຫມທີ່ມາບໍລິການນຳພາກເອກະຊົນເຂົ້າໃສ່ເພີ່ມ ພ້ອມທັງສ້າງຄວາມອາດສາມາດໃຫ້ພະນັກງານໃຫ້ມີທັກສະໃນການໃຫ້ຄຳປຶກສາ.

ເປັນປະທານໃນກອງປະຊຸມດັ່ງກ່າວ ແມ່ນ ທ່ານ ດຣ. ພູທອນ ເມືອງປາກ, ຮອງລັດຖະມົນຕີ ກະຊວງສາທາລະນະສຸກ, ແລະ ທ່ານ ນາງ Mariam A. Khan, ຜູ້ຕາງໜ້າອົງການ UNFPA ປະຈຳ ສປປ ລາວ. ເຂົ້າຮ່ວມໃນກອງປະຊຸມ ລວມມີບັນດາຫົວໜ້າພະແນກ/ຮອງຫົວໜ້າພະແນກ ຈາກພະແນກສາທາແຂວງ ແລະ ພະນັກງານແມ່ແລະເດັກ ຈາກທັງໝົດ 17 ແຂວງ ພ້ອມທັງພະນັກງານຮັບຜິດຊອບ ຈາກກົມທີ່ກ່ຽວຂ້ອງພາຍໃນກະຊວງສາທາລະນະສຸກ ແລະ ຄູ່ຮ່ວມພັດທະນາທີ່ໄດ້ໃຫ້ການສະໝັບສະໜູນແຜນງານການວາງແຜນຄອບຄົວ.